Торгуулиа төлөөгүй, тээврийн хэрэгслийг үзлэгт оруулаагүй иргэдийг ирэх сарын нэгнээс замын хөдөлгөөнд оролцохыг хязгаарлах шийдвэр гараад буй.

Улаанбаатарт хуулиар оногдуулсан торгуулиа төлөөгүй 266,044 тээврийн хэрэгсэл байгаа аж.

Энэ талаар сайд, 20 минутын үндэсний хорооны дарга Р.Эрдэнэбүрэн "Улаанбаатар хотын нэн тулгамдсан асуудал болох авто замын түгжрэлийг бага багаар, зохицуулалтын болон эдийн засгийн аргаар бууруулах цогц төлөвлөгөөний нэг хэсэг нь нийт түгжрэлийн 30%-ийг эзэлж буй зохиомол түгжрэл юм. Үүнийг бууруулах гол арга нь зөрчил гаргаж, түгжрэл үүсгэж торгуулчхаад торгуулиа төлдөггүй иргэдийг замын хөдөлгөөнд оруулахгүй байх явдал.

Замын хөдөлгөөний зөрчил гаргаж торгуулчхаад төлдөггүй иргэдийг цаашид зөрчил гаргахгүй болтол нь буюу торгуулиа төлж дуустал нь замын хөдөлгөөнд оруулахгүй байх тухай мэргэжлийн байгууллагын саналыг 100% дэмжиж ажиллана" гэж  мэдэгджээ.

Шийтгэл оногдуулснаас хойш 15 хоногт багтан торгуулиа төлбөл тухайн торгуулийн дүнг 50 хувь хөнгөрүүлнэ. Харин энэ хугацаа дууссанаас хойш буюу 16 дахь хоногоос эхлээд сар бүр үндсэн торгуулийн хэмжээг 10 хувь нэмэгдүүлэх журмын зохицуулалт хийгдсэн болохыг Тээврийн Цагдаагийн Алба(ТЦА)-ны дарга, цагдаагийн хурандаа Б.Дэлгэрсайхан хэлж байсан юм.