"Ноорог" медиа студийн хамт олныг энэ сарын 17-18-нд шилжих шөнө цагдаагийн байгууллагаас саатуулан шалгаж эхэлсэн. 

Ингэхдээ студийн тоног төхөөрөмжүүдийн хураан аваад байгаа юм. Хэдийгээр "Ноорог"-ийнхныг хэвлэн нийтлэх үйл ажиллагаатай нь холбогдуулж шалгаагүй гэж байгаа ч техник хэрэгслүүд, хард нь хураагдсанаар ажлаа хэвийн үргэлжлүүлэх боломжгүй болоод байгаа. 

Хууль зүй, дотоод хэргийн сайдын хэлснээр шалгагдаж буй этгээдүүдийн зургаан дансаар 9.3 тэрбум төгрөгийн цахим мөрийтэй тоглоомын гүйлгээ хийгдсэн гэж буй. Тэгвэл "Ноорог" медиа студийн ажилтны ах А.Баяржавхлан өчигдөр цахим орчинд энэ талаар мэдээлэв.

Тэрбээр "Би дэлхийн зах зээл дээр форекс арилжаа хийдэг анализын багийг удирддаг, Торгоны зам гэх онлайн мөрийтэй тоглоомын газрын албан ёсны эзэн гэж явна. Би "Ноорог"-ийн залуустай холбоотой гэгдэх 9.3 тэрбум төгрөгийн гүйлгээний талаар мэдээллийг өгнө. Онлайн мөрийтэй тоглоом гэх салбарт хоёр жил ажилласны хувьд энэ салбарт нуугдсан гашуун үнэнийг ил гаргана.

Манай дүү А.Очбаяр 2025 он гараад "Ноорог"-т ажилд орсон юм билээ. 2025 оны гуравдугаар 18-ны үед "Ноорог"-ын ажлын газарт цагдаа нар шалгасан. Энэ үед манай дүү хамт байсан бөгөөд дансны мэдээлэл нь ил гарсан. Онлайн мөрийтэй тоглоомын ажилд дүүгийнхээ дансыг 6-7 сар орчим хэрэглээд өнгөрсөн оны дөрөвдүгээр сард хэрэглэхээ больсон. 6-7 сарын хугацаанд дансаар нь 9.3 тэрбум төгрөг орж бас гарч байсан юм билээ. Түүнийг нь цагдаагийн байгууллагын алба хаагчид олж мэдсэн. Ингээд "Ноорог"-ийн залуусыг хууль бус мөрийтэй тоглоомтой холбож сошиал орчинд нэлээд явлаа. 

Торгоны зам клуб болон "Ноорог" хоорондоо ямар нэг харилцаа хамаарал байхгүйг албан ёсоор мэдэгдье" хэмээв.

Түүнчлэн цахим мөрийтэй тоглоомын салбарын талаар "Гэр бүлийн санхүүгийн нөхцөл байдал хүндэрснээр эхнэр бид хоёр Хос тамга гэх цахим мөрийтэй тоглоомын газарт нэг нь тогоочоор, нэг нь админаар ажилд орсон. Найман сар орчим ажилласан. Энэ хугацаанд Хос тамга клубийн нэг дансанд Сонгинохайрхан дүүргийн нэр бүхий цагдаа баримт хийсэн. Тэр цагдаа өөрөө холбогдоод Хос тамгын удирдлагуудтай тохиролцоод жил гаруйн хугацаанд хамтарч ажилласан сураг байсан. Тэр хүний нэр, сард хэдэн төгрөг авдаг байсан тухай мэдээлэл нь надад бий. Тохиромжтой цагт нь хууль хүчний байгууллагад ил гаргаж тавина. 

Хос тамга клубт ажиллаж байгаад өөрөө клуб нээх ажиллах санаа төрөөд тусдаа клубээ нээгээд хөгжүүлээд явж байсан. Манай клуб ажиллаад гурван сарын дараа манай нэг дансанд барилт орж ирсэн. Ингээд больё гэж бодтол Кибер гэмт хэрэгтэй тэмцэх хэлтсийн ажилтан өөр хүнээр дамжуулж надтай холбогдсон. Танай ажил ямар ч асуудалгүй, цаашаа явж болно. Клубээ хөгжүүл, ашиг сайн ол гэсэн. Тэр хүнтэй тохиролцоод манай клубтэй найман сар хамтарч ажилласан. Найман сарын хугацаанд 400 орчим сая төгрөг авсан.

2023 оны 10-11 дүгээр сарын үед цахим мөрийтэй тоглоомд чиглэсэн арга хэмжээ явагдсан. Энэ үед маш олон клуб зогсож, дансаа бариулж байсан бол манай клуб өнчин ишигний хохиролгүйгээр тэр аяныг давж гарсан. Манай ард талд Кибер гэмт хэрэгтэй тэмцэх хэлтсийн тэр хүн байсан учраас давсан гэж ойлгодог, тэгж ч ойлгуулдаг байв.

2024 оны 2-3 дугаар сарын үед нөгөө хүн маань шунал нь ихсэж эхэлсэн. Зохиомлоор данснуудыг бариад, өгдөг мөнгөө нэмэхгүй бол шийдэх асуудал хүнд болоод байна. Нэмбэл асуудал гайгүй явна гэж тэр хүн бид хоёрын дунд байдаг дундын хүнээр хэлүүлсэн. Тавьсан шаардлага нь маш хүнд, маш их хэмжээний мөнгө хүсэж байсан. Бараг тэр хүнийг аятайхан амьдруулахын тулд ажиллаж байсан юм шиг болох гээд байсан тул саналаас нь татгалзсан.

Ингээд Кибер гэмт хэрэгтэй тэмцэх хэлтэст ажилладаг өөр хүнийг олж, үйл ажиллагаагаа үргэлжлүүлсэн. Тэр хүнтэйгээ 10 сар орчим хамт ажиллаж байна. Эхлээд сард 50 саяыг өгдөг байсан, сүүл рүүгээ өсгөж 75 болгосон. Сар бүрийн 20-нд 75 саяыг төлдөг. 

Сая төлөх ёстой хугацаа нь гуравдугаар сарын 20-нд байсан боловч "Ноорог"-ийн залуучуудтай холбоотойгоор бүх зүйл бол эсрэг тийш эргэсэн тул тэр хүнд мөнгө төлөөгүй эхний сар нь боллоо" гэв.