УИХ-ын чуулганы /2025*04*03/ үдээс хойших хуралдаанаар Хууль тогтоомжийн тухай хуульд нэмэлт, өөрчлөлт оруулах тухай хуулийн төслийг хэлэлцэв. 

Хэлэлцэж буй асуудалтай холбогдуулан Ц.Сандаг-Очир гишүүн асуулт асуув. Тэрбээр “Эрүүгийн хэргийн шүүхийн шийдвэр гүйцэтгэл 90 гаруй хувьтай байна. Гэтэл иргэний хэргийн шүүхийн шийдвэр биелэлтээр болж хүний эрх зөрчигдөх явдал түгээмэл байна. Гэр бүл салалт, хүүхдийн тэтгэмжээ өгөх байгаа хэргүүд дийлэнх хувийг нь эзэлдэг юм билээ. Үүнийг зохицуулах хуулийн зөрчлийн асуудлыг хэзээ оруулж ирэх вэ” гэв.

Үүнд Хууль зүй, дотоод хэргийн сайд О.Алтангэрэл “Иргэний хэргийн шүүхийн шийдвэр гүйцэтгэлийн тухай хуулийн төсөл энэ долоо хоногт бэлэн болж дууслаа. Одоо Эрүүгийн хэргийн шийдвэр гүйцэтгэл буюу хорих анги, хоригдлуудын хөдөлмөрийн чиглэлийн өөрчлөлтүүдээ хийгээд дуусчихвал ирэх Даваа гарагаас холбогдох байгууллагуудаас санал авна. Ингээд энэ чуулганы хугацаанд багтаан өргөн барихаар ажиллаж байна.

Гаднын орнуудын хуулиас авсан туршлагууд хуулийн төсөлд зонхилох хувь эзэлж байгаа. Тухайлбал, хүүхдийн тэтгэлэг өгөх үүргээ биелүүлдэггүй эцэг мянга мянгаараа байна. Ямар нэг хариуцлага яригддаггүй, аргалаад яваад байдаг. Энэ хүмүүст төрөөс үзүүлдэг үйлчилгээг ямар хүрээнд хязгаарлаж болох вэ, албадлагын ямар арга хэмжээ авч болох вэ гэдгийг тусгасан.

Мөн ямар нэг байдлаар хөдөлмөрийн чадваргүй, ажил хийх боломжгүй хүмүүсийн өгөх ёстой тэтгэлгийг Герман улсын жишгээр төрөөс бий болгосон сангаас өгөөд эргээд тухайн этгээдээс ямар нэг замаар олж авдаг систем рүү шилжихгүй бол болохгүй байна" гэдэг хариулт өглөө.