Олон жилийн турш яригдаж, биеллээ олж чадахгүй байсан Хэвлэл Мэдээллийн Зөвлөлийг үүсгэн байгуулах чуулган өнөөдөр болсон юм. 

Монголын хэвлэл мэдээллийн салбарт өөрийн зохицуулалтын байгууллагыг аливаа ашиг сонирхлоос ангид, олон улсын жишгийн дагуу мэргэжлийн түвшинд байгуулахаар сэтгүүлч, судлаач, эвсэл холбоо болон төрийн бус байгууллага санал нэгдэн сүүлийн нэг жилийн туршид идэвхтэй ажилласан юм. 
Өнөөдрийн чуулганаар "Монголын Хэвлэл Мэдээллийн Ёс зүйн Зөвлөл" НҮТББ- ийг байгуулах, түүний дүрмийн төслийг танилцуулж, чуулганд оролцогчдын саналыг тусгаж олонхын саналаар дүрмийн төслийг баталгаажуулсан юм. 
"Засгийн газрын мэдээ" сонины Ерөнхий эрхлэгч С.Батбаатар Монголын Хэвлэлийн мэдээллийн салбарт түүхэн үйл явдал тохиож байгааг онцолж байсан бол МХЧБФ-ын тэргүүн У.Тамир ""Хэвлэл Мэдээллийн Зөвлөл" байгуулагдсанаар сэтгүүлчдийг шүүхийн хаалга татахаас сэргийлэх, олон нийтийн мэдэх эрхийг хангах, сэтгүүлчид ёс зүйтэй ажиллах зэрэг олон давуу талтай" гэв. 
Зөвхөн 1999 - 2011 оны хооронд ХМХ, сэтгүүлчийн эсрэг 297 иргэний, 16 эрүүгийн хэрэг шүүхээр орж байсан байна. 
Хэвлэл Мэдээллийн Зөвлөл нь хэвлэлийн эрх чөлөө, хэвлэл мэдээллийн нэр хүнд, сэтгүүлчийн эрх ашгийг хамгаалах, чөлөөт, хариуцлагатай сэтгүүл зүйг төлөвшүүлэх зорилгоор сэтгүүлчийн ёс зүй, мэргэжлийн хэм хэмжээг сахиулах чиг үүрэгтэй Монгол Улсын хэвлэмэл болон онлайн хэвлэл мэдээлэл, өргөн нэвтрүүлгийн салбарын өөрийн зохицуулалтын байгууллага байх юм.
Хэвлэл мэдээллийн зөвлөлд салбар тус бүрийн буюу сайт, телевиз, сонин, радио, сэтгүүл, төрийн бус байгууллагын, мэргэжлийн их, дээд сургуулийн төлөөлөл байх бөгөөд ингэхдээ эзэд, ажил олгогч, сэтгүүлч, хуульч, судлаач, багш, олон нийтийн байгууллагын төлөөллийг ханган ийнхүү байгуулагдаж байгаа юм.
Өнөөдрийн үүсгэн байгуулах чуулганыг урьтаж дээрх салбар тус бүр хуралдаж Хэвлэлийн Зөвлөлд ажиллах Удирдах зөвлөлийн болон Ёс зүйн зөвлөлийн гишүүдийг сонгоод байсныг үүсгэн байгуулах чуулганаар ийнхүү баталгаажууллаа. 
Монголын Хэвлэлийн зөвлөлийн Удирдах зөвлөл нь 15 гишүүнтэй, Ёс зүйн зөвлөл нь хоёр хороо бүхий 30 гишүүнтэй байх юм. 
Өнөөдрийн чуулганаар Хэвлэлийн зөвлөлийн:
- Удирдах зөвлөлийн даргаар Монгол ТВ-ийн Гүйцэтгэх захирал Ч.Номин, 
- Ёс зүйн зөвлөлийн Хэвлэмэл болон онлайн хэвлэл мэдээллийн ёс зүйн хороон даргаар "Өдрийн сонин" -ы хуулийн зөвлөх, "Нийслэл таймс" сонины ТУЗ-ийн дарга Ш.Сүхбаатар, 
- Ёс зүйн зөвлөлийн Өргөн нэвтрүүлгийн салбарын ёс зүйн хороон даргаар МУБИС-ийн доктор, профессор Ж.Батбаатар нар сонгогдлоо.