Сүхбаатар дүүргийн  10-р хороо буюу  бидний хэлдгээр  100 айлын  цагаан нийтийн байрныхан тэр дундаа 3,4-р байрныхан  энэ жил хүнд өвөлжих төлөвтэй байна.  Учир нь 3 болон 4-р байрны оршин суугчид шинэ орон сууцанд орно гэж найдан барилгын компанитай гэрээ байгуулан   нүүсэн байна.  Тэднийг нүүсэн даруйд нь  цонх болон хаалгыг нь авч,  дулааны шугамыг нь хүртэл тасалсан байна.  Үүний улмаас гэрээ байгуулаагүй үлдсэн  айлууд гудамжныхантай нэг дор  амьдарч байгаагаас ялгаагүй  орчинд амьдарч байна.  

Тодруулбал, 30 гаруй жилийн өмнө тойрог хэлбэрээр хоёр давхар 10 байр баригдсан байдаг. Жорлон нь гадаа ч нийтийнх болохоор  оршин суугчид зохицон саяхныг хүртэл  байсаар ирсэн. Харин 3,4-р байрны зарим айлууд жилийн хугацаатай  нүүсэн. Учир нь хот төлөвлөлт орсон  уг хэсгийг орон сууцжуулахаар болсон байна. 

 

 Ингэхдээ  Монгол улсад  бүртгэлгүй  “Гэзэгийн худаг” ХХК   байр барина хэмээн гэрээ хийж, Хот төлөвлөлтийн газартай гэрээгүй   “Өндөр Заяа” ХХК иргэдэд байр барьж өгнө хэмээн  оршин суугчдад  3.6 сая төгрөг өгч хөл толгой нь олдохгүй болжээ.  Зарим иргэд эхнээсээ   шүүхэд хандаад байгаа ч  шүүх хурал нь тодорхойгүй хугацаагаар  хойшлоод байгаа юм. Ийм байдлаас болж  өнөөдөр  3,4-р байрныхан траншейныхантай нэг дор амьдарч байна.

 

Тодруулбал жилийн дараа шинэ байранд орно хэмээн гэрээ байгуулсан айлуудыг  нүүмэгц гэрийнх нь хаалга болон цонхыг  хэн нэгэн нь авч, дулааны хоолойг таслан, шээс баас ханхалсан орчин болгосон байна.  Энд шөнөдөө  траншейныхан  архидан согтуурч, өтгөн шингэнээ гарган,  уг байранд амьдарч байгаа иргэдийг айлгаж ичээж байна.

 

 

 

 

 

“Гэзэгийн худаг”  ХХК-тай холбоо барихаар  лавлахуудаас асуухад бүртгүүлээгүй байна гэв. Улмаар Улсын бүртгэлийн газарт хандахад  Монгол улсад  ийм нэртэй  ХХК бүртгэлгүй байна. Өмнө нь ч байгаагүй хэмээсэн юм.  Харин асуудал дагуулаад байгаа  дараагийн компани болох  “Өндөр Заяа” ХХК -тай гэрээ хийж болохгүй гэдгийг  Хот төлөвлөлтийн газраас анхааруулсан байна.

Өнөөдөр 3-р байр  нэг талаасаа нурахад бэлэн болоод байгаа бөгөөд  үүнийг дараах зураг гэрчилнэ.  

Хотын төвийн энэ байршилд шунах хүн олон байгаа нь тодорхой. Тэглээ гээд  ийм тодорхойгүй байдал үүсчхээд байхад Хот төлөвлөлтийн газраас мэдээгүй юм шиг чимээгүй суугаад байж боломгүй мэт. Нөгөө талаас  иргэдийн эрүүл, аюулгүй орчинд амьдрах эрхийг хангахийн тулд энэ хавийг орон сууцжуулах тендерийг дахин зарлах учиртай.  Ингэхдээ улсад бүртгэлгүй  компанид  зөвшөөрөл олгохгүй байхыг анхаарна бизээ.  

 Бид  нөгөөдөр  энэ хэргийн талаар дэлгэрэнгүй хүргэх болно.

А.Баярмаа