Энэ намрын улс төрийг улайсгаж мэдэх үйл явдлууд удахгүй ар, араасаа өрнөх нь. Засгийн газрыг огцруулах асуудлыг ирэх сард багтааж шийдвэрлэнэ гэх яриа Төрийн ордонд гараад удаагүй байтал хошин шогийн гэмээр нэгэн үйл явдал болж мэдэхээр байна. Тодруулбал, УИХ-ын гишүүн О.Баасанхүү МАН-д элсэх гэж буй талаар эх сурвалж мэдээллээ. Түүний хувьд МАХН-ын гишүүн бөгөөд Н.Энхбаярыг баларч явахад өмгөөлөгчөөр нь ажилласныхаа шанд УИХ-ын гишүүн болсон гэдэг. Өнгөрсөн гурван жилд Н.Энхбаярын төлөө идэвхтэй дуугарч, хамгаалж, хаацайлж ирсэн тэрбээр ойрноос намын даргатайгаа таарамж муутай байгаа аж.

Н.Энхбаяр О.Баасанхүүгээ жийж эхэлсэн цаг хугацаа аль нэг жилийн өмнөөс эхлэлтэй. Харин сүүлийн үед дээрх асуудал улам хурцдаж хүн чинээ тоохоо больсон сурагтай.

Саяхан МАН-ын огцорсон зургаан сайдын орны хүмүүсийг томилох үйл ажиллагаа болж өнгөрсөн. Энэ үеэр "Шударга ёс" эвсэл болон АН-ынхан сайдад нэр дэвшигчдээ тодруулж, хэн, хэнийг сайд болгохоо ярилцах үеэр О.Баасанхүүгийн гомдол хүчээ авсан гэнэ. Түүнд сайд болох хүсэл их байсан ч намын дарга Н.Энхбаяр жийж оронд нь З.Баянсэлэнгийг сайд болгосон гэх. Мөн Өршөөлийн хуульд нэмэлт, өөрчлөлт оруулах асуудлыг хэлэлцэх үеэр Н.Энхбаяр О.Баасанхүүгийн өрөөний хаалгыг өшиглөн орж "Чи хуралдаа очиж суул даа" хэмээн загнасан гэдэг. Гадны төлөөлөгчтэй уулзаж байхад гаднаас хаалгыг нь өшиглөж орж ирэн жаахан хүүхэд шиг загнаж орхисон Н.Энхбаярын энэ үйлдэл О.Баасанхүүгийн тэвчээрийн хязгаарыг барж орхисон аж.

Н.Энхбаяр ингэх болсон шалтгаан нь өөрийнх нь авлига, албан тушаалын гэмт хэргийг өршөөх хуулийн төслийг хэлэлцэж, шийдвэрлэх үеэр ганц хүний санал ч дутаж мэдэхээр байсантай холбоотой.

Энэ мэт асуудлууд хуримтлагдсаар О.Баасанхүү гишүүнийг эргэж харахааргүй болтол гомдоожээ. Тиймээс л тэрбээр нэгэн цагт хайр зарлаж "үхэж, хатсан ч хамт" байна гэж байсан даргаасаа холдохоор болжээ.

УИХ-ын гишүүн О.Баасанхүү Засгийн газрыг огцруулах асуудлыг шийдвэрлэсний дараа буюу ирэх сараас МАН-д элсэх сурагтай.

Т.Энхэлээ

Эх сурвалж: www.24tsag.mn