Улсын дээд шүүхийн шүүгчээр ажиллаж, шүүхийн байгууллагатай 30 гаруй жил амьдралаа холбож яваа Л.Бямбаа шүүгч Шүүхийн хэвлэл мэдээлэл, олон нийттэй харилцах хэлтсийн даргаар тулгын чулуу тавилцан 3 жил ажилласан юм.

Шүүхийн ерөнхий зөвлөлийн дарга Н.Лүндэндорж "Өнөөдөр Шүүхийн ерөнхий зөвлөл хамгийн хүндтэй хүндээ гардуулдаг "Алтан фемида”-г Гавьяат хуульч Л.Бямбаад гардуулж, хүндэтгэл үзүүлж байна. Л.Бямбаа шүүх эрх мэдэлд том үүрэг гүйцэтгэсэн. 1992 оны шинэ Үндсэн хууль гарснаас хойш "Шүүхийн бие даасан, шүүгчийн хараат бус байдал” сэдвээр докторын зэрэг хамгаалсан анхны шүүгч. Эрдмийн ажилдаа бодлогын хүрээнд шүүх эрх мэдлийн тулгамдсан асуудлуудыг сөхөж тавьсан нь Шүүхийн тухай багц хууль болон гарах суурь болсныг зориуд тэмдэглэн хэлье. Хоёрдугаарт, Л.Бямбаа бол миний мэдэхийн гурван үеэрээ шүүхэд хүчин зүтгэсэн ганц хүн байж магадгүй. Улсын дээд шүүхэд өөрөө шүүгч хийж байсан, аав нь Улсын дээд шүүхийн дарга байсан, хүү нь мөн шүүх эрх мэдэлд хүчин зүтгэж явааг тэмдэглэн хэлэхэд таатай байна. Танай гэрийн бүлийн хүндтэй газар "Алтан фемида” заларч, аз хийморь, сайн сайхныг бэлгэдэж байх болтугай” гээд "Алтан фемида”-г гардууллаа.

Гавьяат хуульч Л.Бямбаа "Монгол Улсын шүүн таслах ажиллагаанаас Хэвлэл мэдээлэл, олон нийттэй харилцах хэлтсийг удирдан ажиллах үүрэг надад ноогдсон.Тэр үед шүүхийн хэвлэл мэдээллийн бодлого, үйл ажиллагаа хэрхэн явагдах тухай цаасан дээр үггүй байлаа. Шүүх эрх мэдлийг дөрөв дэхь засаглал хэмээгддэг хэвлэл мэдээлэл, сэтгүүл зүйтэй хэрхэн, яаж холбохыг ухаалаг, зохистой, уян хатан бодлогоор авч явахыг зорьж, хичээж ажиллалаа. Цаашид шүүхийн хэвлэл мэдээлэл, олон нийттэй харилцах ажлыг удирдлагын шударга үнэлгээгээр хандаж, үргэлжлүүлэн авч явахыг хүсье” гээд шүүхийн мэргэшсэн сэтгүүл зүйн үндсийг бүрдүүлж ажилласнаа онцолж хэллээ.

Шүүхийн ерөнхий зөвлөлийн дарга, гишүүд, ажлын албаны удирдлагуудтай дурсгалын зураг авахуулснаар хүндэтгэлийн үйл ажиллагаа өндөрлөв.

Шүүхийн хэвлэл мэдээлэл, олон нийттэй харилцах хэлтсийн дарга, Гавьяат хуульч, хууль зүйн ухааны доктор Л.Бямбаа Таны шударга ёсны төлөөх ариун үйлс тань батжин бэхжиж, амьдрал тань аз жаргалаар бялхаж байхын өлзийтэй ерөөлийг өргөн дэвшүүлье.