Ерөнхий сайд асан Н.Алтанхуягийн ахлах зөвлөх Л.Гансүхэд анхан болон давж заалдах шатны шvvхээс 4.5 жилийн хорих ял оноогоод байгаа. Тиймээс тэрбээр хоёр шатны шүүхийн шийдвэрийг эсэргүүцэн Улсын Дээд шүүхийн Хяналтын шатны шүүхэд гомдол гаргахаа мэдэгдсэн.

Улмаар гомдлоо гаргаж, өмгөөлөгч Н.Цэндсүрэнгээрээ шүүхэд хүргүүлсэн ч түүний гомдлыг анхан шатны шүүх хүлээн аваагүй байна. Дээд шүүхэд гомдол гаргахдаа заавал анхан шатны шүүхээр дамжуулдаг журамтай. Энэ дагуу анхан шатны шүүхэд гомдлоо хүргүүлсэн ч хүлээн аваагvй аж. Шүүх гомдлыг хүлээн аваагүй шалтгаанаа "Л.Гансүх нь гомдлоо бичээд хамгийн сүүлийн хуудас дээрээ гарын үсэг зурсан, мөн хоригдож буй ангийн даргын гарын үсэг тамга тэмдэг байхгvй. Уг нь гомдлын бүх хуудас дээр гарын үсэг зурж, хоригдож буй ангийн даргын гарын үсэг тамга, тэмдгийг даруулсан байх естой" гэжээ. Гэвч хуулинд энэ тухай заагаагvй бөгөөд дээрх журам заалт байдаггүй аж. Мөн давж заалдах шатны шүүхээс Л.Гансүхийн ялын тогтоолыг энэ сарын 8-нд өөрт нь гардуулсан боловч тогтоол дээрээ нэгдүгээр сарын 6 гэж бичсэн байжээ. Ингэснээр Дээд шvvхэд хандах 14 хоногийн хугацаа нь өнгөрсөн лхагва гаригт буюу уржигдар дууссан байна. Ялын тогтоол дээр он сарыг зөв бичсэн бол Дээд шүүхэд хандах хугацаа өнөөдөр дуусах естой байжээ. Юутай ч хуулинд байхгvй зүйл ярьж гомдлыг хүлээн авалгүй, мөн тогтоол дээр он сарыг буруу бичиж, Дээд шүүхэд хандах хугацааг төөрөгдүүлсэнд Л.Гансүх ихэд гомдолтой байгаа аж.

Дашрамд дурдахад, давж заалдах шатны шүүхийн шийдвэр гарсны дараа ялтныг хорих ангид хуваарилдаг. Энэ дагуу Л.Гансүхийг ШШГЕГ-ын харьяа хорих 415 дугаар анги буюу Мөнгөнморьтод хуваарилсан байна. Л.Гансүхийг Шинэчлэлийн Засгийн газраас хэрэгжүүлсэн "Нүүрс" хөтөлбөрийн хөрөнгөнөөс ихээхэн хэмжээний мөнгө завшсан хэрэгт буруутган ялласан юм.