Улаанбаатар хотод албан татвараа төлөөгүй 165,238, хуулиар оногдуулсан торгуулиа төлөөгүй 266,044, олон улсын, улсын чанартай авто зам ашигласны төлбөрөө барагдуулаагүй 510,000 тээврийн хэрэгсэл байгаа бөгөөд энэ сарын 1-нээс зөрчил бүхий тээврийн хэрэгслийн хөдөлгөөнийг хязгаарлах зохицуулалт хийж эхлээд буй.

Торгох шийтгэлийг хуульд заасан хугацаанд төлөөгүй бол тээврийн хэрэгсэл жолоодох эрхийн үнэмлэх авах, сунгах, ангилал нэмэх, өөрчлөх, нөхөн авах, тээврийн хэрэгслийн эзэмшлийн шилжилт хөдөлгөөн хийх эрхийг хязгаарлах, нийтэд тустай ажил хийлгэх хуулийн зохицуулалттай байна.

Энэ талаар ТЦА-ны урьдчилан сэргийлэх хэлтсийн ахлах зохицуулагч, цагдаагийн ахмад Д.Ганхуяг "Торгуулиа хуульд заасан хугацаанд төлөөгүй жолоочийг тээврийн хэрэгсэл жолоодох эрхийн үнэмлэх авах, ангилал нэмэх, сунгах, өөрчлөх, тээврийн хэрэгслийн шилжилт хөдөлгөөн хийх эрхийг хязгаарлах арга хэмжээг Цагдаагийн байгууллагын болон АТҮТ-ийн алба хаагчид авч ажиллаж байна.

Торгох шийтгэлийг төлж дуусгах хүртэл хугацаанд тээврийн хэрэгслийн хөдөлгөөнийг хязгаарлаж, хууль, журамд заасны дагуу түр саатуулах хашаанд зөөж, шилжүүлнэ" гэж мэдээллээ.

Зөрчлийн тухай хуулийн 3.4 дүгээр зүйлийн 8 дахь хэсэгт:

Зөрчил үйлдсэн хүн, хуулийн этгээд Замын хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний акт зөрчсөнтэй холбогдуулан эрх бүхий этгээдээс оногдуулсан торгох шийтгэлийг хуульд заасан хугацаанд биелүүлээгүй бол тээврийн хэрэгсэл жолоодох эрхийн үнэмлэх авах, сунгах, ангилал нэмэх, өөрчлөх, нөхөн авах, тээврийн хэрэгслийн эзэмшлийн шилжилт хөдөлгөөн хийх эрхийг хязгаарлана.

Түүнчлэн уг хуульд торгох шийтгэлийг биелүүлээгүй бол торгох шийтгэлийг нийтэд тустай ажил хийлгэх шийтгэлээр тооцож солино гэж тус тус заажээ.

Нийтэд тустай ажил хийлгэх шийтгэлийг хөдөлмөрийн чадвараа бүрэн алдсан хүнд, биеийн эрүүл мэндэд шууд нөлөөлөхүйц нийтэд тустай ажил хийлгэх шийтгэлийг жирэмсэн эмэгтэй, 55-аас дээш насны эмэгтэй, 60-аас дээш насны эрэгтэй хүнд оногдуулахыг хориглодог байна.