Боловсролын салбарыг дараалан удирдсан гурван эрхэм чухам юу ярьж зогсоог таашгүй ч нэгэн сэдэл төрж, бас дургүй хүргэнэ.     2008 оноос 2012 онд Монгол Улсын боловсролын салбарт Кембрижийн хөтөлбөрийг нутагшуулах гэж зүтгээд алдаа оноогоо дуудуулан байж халаагаа өгсөн Ё.Отгонбаяр, 2012-2014 он, хоёр жилийн турш АНУ-аас үлэг гүрвэлийн яс зөөж, түүнийгээ үндэсний соёл бахархал хэмээн мунхагласан Ц.Оюунгэрэл, өдгөө алба хашиж буй, Монгол хэл уран зохиолын хичээлийн хөтөлбөрөөс уран зохиолын цагийг шахсан Л.Гантөмөр гэсэн гурван сайд маань зогсож байна.      Зураг дээрээс харвал чамгүй чухал зүйл ярилцаж байгаа бололтой юм. Кембриж, үлэг гүрвэлийн яс, уран зохиолын гэсэн гурван өөр өнцгөөс ярьж зогсдог юм болов уу гэсэн элдэвтэй бодол ч төрж болохоор.      Юутай ч энэ гурван эрхэм гурвуулаа Монгол үндэстнийхээ эсрэг бодлого явуулж даяаршилд нэгдсэн хүмүүс. Ё.Отгонбаярын хувьд боловсронгуй бөгөөд цогц сургалтын системийг нутагшуулах гэж зүтгэсэн. Шууд утгаар нь буруутгах аргагүй. Гэхдээ нөгөө талаас үндэснийхээ өв соёл дээр гишгиж байж үүнийг нутагшуулах гэж зүтгэсэн нэгэн учраас яах аргагүй монголчуудынхаа эсрэг зүйл хийсэн хэмээн даруухнаар хэлж болохоор. Даяаршлын эрин зуунд дэлхий нийттэй хөл нийлүүлж алхах нь соёлт хүн төрөлхтний жам хэдий ч үндэсний бүхнээ огоорон зүтгэх нь төдийлөн ач холбогдолгүй мэт.      Ц.Оюунгэрэлийн хувьд сайдын сэнтийд заларсан цагаасаа хойш Ц.Элбэгдорж Ерөнхийлөгчтэй нийлэн үлэг гүрвэлийн яс ярьсан. Үүнийгээ ярьсаар байгаад Монгол Улсад авчирсан. Авчирсан хойноо ч үүний тухай ярьсаар байгаад суудлаа өгч байна. Монгол үндэсний аугаа их хэл соёлыг нэг муу араг ястай зүйрлэж байгаагаараа тэр үндэснийхээ эсрэг бодлого явуулсан гэж хэлэхэд буруудах зүйлгүй. Цаашилбал ихээхэн доромжлол мэт.      Отгон сайд Л.Гантөмөрийн хувьд Монгол хэл уран зохиолын хичээлийн хөтөлбөрөөс уран зохиолын хичээлийн цагийг хассан. Шуудхан хэлбэл монгол үндэстнээ доромжилсон хэрэг болсон. Нөгөө талаар үндэстнээ устгах томоохон бодлогын хөрс суурийг тавьсан хүн. Аливаа хүн төрөлхтнийг устгая гэвэл хэл соёлыг нь устгахад болдог хэмээсэн үг бий. Тэгэхээр сүүлийн хэдэн жилд ээлж дараалан боловсрол соёлын салбарыг удирдсан, удирдахдаа дандаа үндэстнийхээ эсрэг үйл ажиллагаа явуулсан энэ гурван эрхэм нийлэхээрээ чухам юу ярьж зогсоо нь хэний ч сонирхлыг татах биз ээ. А.Гал - See more at: http://www.unen.mn/content/43705.shtml?alias=politics#sthash.AK9yeu8W.dpuf