УНТЭ 2006 оны 8 дугаар сарын 09-ний өдөр эрхтэн шилжүүлэх үндэсний багийнхан анхны бөөр шилжүүлэх мэс заслыг амжилттай хийж байсан түүхтэй. Энэ үеэс хойш буюу өнөө өглөөний  07,00 цагт Бөөр шилжүүлэн суулгах багийнхан 100 дахь хагалгаагаа амжилттай хийсэн байна.

Энэ хүрээндээ  100 дахь хагалгаандаа зориулсан хүндэтгэлийн самбар байршуулах, шавь тавих ёслолын ажиллагаа боллоо. Уг арга хэмжээнд Эрүүл мэнд, спортын сайд Г.Шийлэгдамба, УНТЭ-ийн ерөнхий захирал,АУ-ны доктор Б.Бямбадорж, Хүний гавьяат эмч Л.Жамбалжав, УНТЭ-ийн бөөрний мэс заслын клиникийн зөвлөх эмч Д.Нямсүрэн нарын албаны хүмүүс оролцсон юм. Тус эмнэлэг эмч нараа Хятад, Солонгос, Тайланд, Банконг, Англи, Финлянд улсад сургаж туршлагажуулснаар өнөөдрийн ийм амжилтанд хүрэхэд нөлөөлжээ. Мөн энэхүү технологийг нутагшуулахад Англи, БНСУ-ын эмч сувилагч мэргэжилтнүүдийн нөр их хөдөлмөр шингэсэн байна.Цаашид 100 дахь бөөр шилжүүлэн суулгах хагалгаа, 20 дахь элэг шилжүүлэн суулгах хагалгаа 2 дахь ясны чөмөг, үүдэл эс шилжүүлэн суулгах эмчилгээнүүд хийгдэхээр  төлөвлөгджээ. Энэ үеэр УНЭТ-ийн Бөөрний мэс заслын тасгийн эрхлэгч Д.Баян-Өндөрөөс цөөн зүйлийг тодрууллаа.

-Манай иргэдийн дунд бөөрний өвчлөл хэр их байна. Ялангуяа энэ хагалгааны дараа юун дээр анхаарах ёстой вэ?

- Бөөр шилжүүлэн суулгах хагалгаа хийлгэх шаардлагатай хүн монголд олон бий.Яагаад гэвэл донорын асуудал шийдэгдээгүй байгаа. Харин гадаадын орнуудад хүн өөрийнхөө донор байх эрхийг бий болгосон байдаг. Хэрэв надад эрсдэл бий болох тухайлбал тархи үхэх шалтгаан гарах юм бол миний эд эрхтэнг бусад хүнд шилжүүлэн суулгаж амийг нь аварч болно гэсэн донор карт  гэж байдаг. Тиймээс энэ картыг манай улсад нэвтрүүлэх, сурталчилгаа хийх шаардлага их байгаа. Испани улс донор карттай болсноор эрхтэн шилжүүлэн суулгах хагалгаа, бусад хүмүүсийг аврах, эд эрхтэн дутагдалтай төгсгөлийн шатанд орсон хүмүүсийг эрүүл болгоход эрчимтэй ажиллаж байна. Харин манай улсын хувьд үүний араас явахад боломжгүй гэх зүйл байхгүй.

-Дэлхий нийтэд бөөр шилжүүлэн суулгах хагалгаа ямар түвшинд байдаг юм бэ. Үүнээс манайд ямар хувьтай байдаг юм бол?

-Манайх нэг сая хүнд оногдож байгаа бөөр шилжүүлэн суулгах статистик тоогоор 43 -т явж байгаа. Харин сүүлийн гурван жилийн тоог нэмэх юм бол урагшлах ёстой байх гэж бодож байна. Харин дэлхийн эрүүл мэндийн байгууллагын судалгаагаар нэлээд багасах болов уу. 3 сая хүн амтай манай улсад 100 хагалгаа гэдэг бол өндөр тоо.

-Цаашдаа энэ эмчилгээ үйлчилгээг хүртээмжтэй болгох тал дээр юу хийх вэ?

- Эрүүл мэндийн тенологи, эмчилгээ, стандарт таван жилээр шинэчлэгдэж байдаг. Бидэнд хөрөнгө оруулалтууд сайн хийгдсэн боловч энэ нь шат дараатайгаар шинэчлэгдэх ёстой. Хөгжлөө дагаад шинэчлэгдээд байх юм бол бид энэ хөгжлийг гүйцнэ гэсэн бодолтой байдаг. 

 

Д.Нэргүй