Тавантолгойн ордыг хөдөлгөх консорциумд багтсан Монголын “Энержи Ресурс” компанийнхан өнгөрсөн долоо хоногт УИХ-ын гишүүдийг хүлээж авч уулзан Тавантолгойн гэрээний төслийг дэмжээд өгөхийг  хүсчээ.

Уг асуудлаар улс төрд суудалтай, суудалгүй намуудаас эхлээд Монгол даяараа талцаж буй энэ цагт тэд мэдрэмжтэй үйлдэл гаргав.

Одоо бүх зүйл УИХ-ын дээр шийдэгдэнэ. Тиймээс үүнээс өмнө шийдвэр гаргах хүмүүсийг нь хүлээж авч уулзан эртнээс захиа, занаагаа хэлсэн нь энэ аж.Хятадын төрийн өмчит “Шенхуа” компани “Энержи Ресурс” компанид Тавантолгойн хувьчлалд оролцуулахгүй бол манайхан уг ажилд оролцохгүй гэдгийг сануулсан гэдэг. Үүнээс үүдэн Тавантолгойн 51 хувийг “Энержи Ресурс” ХК, Хятадын Шинхуад 49 хувийг хувьчлуулах заалтыг гэрээнд тусгасан байжээ.

 

Тиймээс “Энержи Ресурс” компанийхан уг асуудлыг УИХ-ын гишүүдтэй уулзах үеэрээ ярилцсан байх магадлалтай байгаа юм.

 

Гэхдээ гишүүд тэдний захисаны дагуу байх уу, үгүй юу гэдэг нь олны анхаарлыг ихээхэн татаж байна.Одоо үүсээд буй нөхцөл байдлыг харвал гишүүд Тавантолгойн гэрээг энэ хэвээр нь батлаад явуулахгүй нь тодорхой байгаа юм. 

 

Тодруулбал, УИХ дахь АН-ын бүлгийн гишүүд уг асуудлаар хоёр хуваагдаад байгаа ч дэмжихгүй нь дийлэнх нь байгаа гэж эх сурвалжууд мэдээлж буй. Тус намын гишүүн Л.Эрдэнэчимэг, Ж.Батзандан нар л гэхэд уг гэрээг батлахгүй гэдгээ үг, үйлдлээрээ тодорхой илэрхийлсэн.

 

Тус намын Гүйцэтгэх зөвлөл хуралдаж Тавантолгойн 51 хувийг “Энержи Ресурс”-т биш “Эрдэнэс Тавантолгой”- д эзэмшүүлэх нь зүйтэй гэдэг шийдвэрийг гаргасан. Сонирхолтой нь намынхаа Гүйцэтгэх зөвлөлийн шийдвэрийг бүлгийн ихэнх гишүүд дэмжиж байгаа сураг байгаа юм.

 

Тиймээс ч уг төслийг УИХ-аар хэлэлцэх ёстой юу, үгүй юу гэдгийг шийдэх ажлын хэсгийг гарган ажиллаж буй. Тус ажлын хэсэгт Л.Эрдэнчимэг, А.Бакей, Су.Батболд, О.Баасанхүү, Д.Ганхуяг, С.Ганбаатар, Б.Наранхүү, Д.Сумъяабазар, М.Сономпил, Б.Чойжилсүрэн нарын гишүүд орсон. Дээрх хүмүүсийн хувьд Тавантолгойн гэрээг эсэргүүцэгчид.

 

Тэгэхээр ажлын хэсэг Тавантолгойн гэрээг УИХ-аар хэлэлцүүлэхгүй байх шийдвэрийг гаргах магадлал өндөр байгаа юм. Гэхдээ тус ажлын хэсгийг консорцуимынхантай хэл амаа ололцох үүргийг хүлээсэн гэх мэдээлэл ч байна. Хэрвээ тэгэж чадахгүй бол маргаан цаашид үргэлжлэхээр байгаа юм.

 

Үүнээс гадна МАХН уг гэрээг дэмжихгүй гэдгээ илэрхийлсэн. Тэд ч мөн Тавантолгойн 51 хувийг Төр эзэмших ёстой, тэгэж байж иргэдийн хувьцаа идэхжинэ гэж байгаа билээ.

 

МАН дотор ч уг гэрээг эсэргүүцэгчид байгаа гэх мэдээлэл байна.

 

Тэгэхээр “Энержи Ресурс”-ийн УИХ-ын гишүүдэд захисан захиа биелэлээ олох эсэх нь их эргэлзээг дагуулж байна.

Т.Энхэлээ