УИХ-ын гишүүн, МоАХ-ы дарга Х.Баттулгад Улсын ерөнхий прокурорын тушаалаар, АТГ, ЦЕГ-ын хамтарсан ажлын хэсэг шинэ төмөр зам төслийг хэрэгжүүлэх үедээ улсад онц ноцтой хэмжээний хохирол учруулсан хэргээр эрүүгийн хэрэг үүсгэж, сэжигтнээр тооцсон билээ.

 

Үүнтэй холбоотойгоор УИХ-ын гишүүн Х.Баттулгын эзэмшлийн "Баянгол" зочид буудалд үйл ажиллагаа явуулдаг "Баялагийн хувь", "Түмэн хишигтэн" гэх хоёр компанид энэ сарын 11-ны өдөр ЦЕГ-ын газраас санхүүгийн шалгалт ч хийсэн.

 

Эрүүгийн цагдаагийн газрын эдийн засгийн гэмт хэрэгтэй тэмцэх хэлтсийн мөрдөн байцаагч, цагдаагийн хошууч Б.Оргилын өгүүлж буйгаар : "Шалгалтын явцад эдгээр аж ахуйн нэгжийн захирал, нягтлан бодогчийн нэрээр эх үүсвэр нь тодорхойгүй 10 гаруй тэрбум төгрөгийн гүйлгээ хийсэн нь тогтоогдсон. Гишүүний туслахаар ажиллаж байсан хүмүүс хууль бус шийдвэр гаргахад нөлөөлөх хэмжээний албан тушаалд ажиллаж байсан. Шинэ төмөр замын ажлыг хэрэгжүүлэх төслийг Монголын төмөр зам ТӨХК-д концессын гэрээгээр хэрэгжүүлэх эрхийг олгосон юм.

 

Гэтэл Зам тээврийн яам, Монголын төмөр зам ТӨХК-ийн албан тушаалтнууд Монгол улсын хууль тогтоомжийг зөрчиж, ерөнхий гүйцэтгэгчээр БНСУ-ын хөрөнгө оруулалттай компаниудыг сонгосон байна.Улмаар ерөнхий гүйцэтгэгч компани нь хуурамч бичиг баримт үйлдэж, 20 гаруй сая ам. долларын хохирол учруулсан нь үндсэндээ тогтоогдсон" гэсэн юм.

 

Үүнтэй зэрэгцэн уржигдар мөн л УИХ-ын гишүүн Н.Алтанхуягийг ирж тайлбар өгөхийн шаардсан бичиг Улсын Мөрдөн Байцаах газраас ирсэн тухай мэдээлэл ил болсон. Энэ тухай ч Н.Алтанхуяг Ерөнхийлөгчийн тухай мэдээлэл хийсэнтэй холбоотой ийм асуудал болж байна гэсэн тайлбар хийсэн. Тэгвэл Улсын Ерөнхий Прокурорын Газар үүнийг : "Авилгатай тэмцэх газар,Улсын Мөрдөн байцаах газрын Онц хүнд гэмт хэрэгтэй тэмцэх хэлтэс хамтарсан ажлын хэсэг шалгаж байгаа эрүүгийн хэрэгт Ерөнхий сайд асан Норовын Алтанхуягаас байцаалт авхаар зарлан дуудах хуудас өгсөн.

 

Түүнээс Ерөнхий сайд асан Н.Алтанхуягийг 2016 оны 04 сарын 04-ний өдөр хийсэн мэдэгдэлтэй нь холбогдуулан байцаалт авхаар дуудаагүй байна. Дээрх хамтарсан ажлын хэсэг шалгаж байгаа хэрэгт мөрдөн байцаалт хийгдэж байгаа тул хэргийн ажиллагааны талаар дэлгэрэнгүй мэдээлэх боломжгүй юм." хэмээн тайлбарласан юм.

 

Өөрөөр хэлбэл УИХ-ын гишүүн Х.Баттулга, Н.Алтанхуяг нарт эрүүгийн хэрэг үүсгэн шалгаж байгаа нь тодорхой боллоо. Хуулиар УИХ-ын гишүүнийг дуудан, тайлбар, мэдүүлэг авах эрх нь нээлттэй ч гэмт хэрэгт холбогдуулан нарийвчлан шалгах боломж хязгаарлагдмал байдаг. Тиймээс дээрх УИХ-ын гишүүдэд үүсгэсэн эрүүгийн хэрэгтэй холбоотойгоор бүрэн эрхийг нь түтгэлзүүлэх хүсэлт гаргах нь зөвхөн цаг хугацааны асуудал болсон тухай эх сурвалж өгүүлж байна.

 

П.Мандах

sonin.mn