Эрдэнэс-Тавантолгой компанийн 1072 хувьцааны ногдол ашгийг өчигдөрөөс олгож эхэлсэн билээ. Ингэхдээ эхний ээлжид дансаа баталгаажуулсан 839 мянган иргэнд ногдол ашиг олгож байгаа.

Харин дансаа баталгаажуулаагүй иргэдийн мэдээллийг нягталж байгаа гэж мэдээлж байсан юм. Ногдол ашгийг зөвхөн хувьцааны дансаа нээж, баталгаажуулсан иргэдэд тараах учир иргэд ҮЦХ буюу үнэт цаасны компани болох брокерүүдэд дансаа нээлгэсээр байгаа. Гэтэл зарим нэг компаниуд иргэдийн данс руу мөнгийг шилжүүлэхгүй байгаа нь дансаа баталгаажуулаагүй гэх тайлбар өгч байгаа аж.

Иргэдийн зүгээс аль эртнээс дансаа нээлгэж, ажилтнуудаар нь баталгаажуулалтаа хийлгэсэн ч дахин нэвтрэн орохоор 1072 хувьцаа эзэмшээгүй эсвэл дансаа баталгаажуулаагүй гэсэн хариулт өгч байгаа нь тэднийг ихээхэн бухимдуулж, ажлын хариуцлагагүй байгаад сэтгэл дундуур байна. Жишээ нь АРД СЕКЮРИТИЗ ҮЦК нь жил гаруй өмнө бүртгэл хийлгэж, данс баримтаа бичиж байсан иргэнийг дахин утсаар дансыг нь баталгаажуулсан хэр нь одоо болтол баталгаажилт байхгүй, ногдол ашиг шилжүүлээгүй гэх мэтээр иргэдийг бухимдуулж байгаа олон тохиолдол байна. Түүнчлэн энэ төрлийн компаниуд утсаар иргэдэд үйлчлэх ачаалал нэмэгдэн хариулт өгөх газар ч ховор байна хэмээн мэдээлж байна.