Сангийн сайд Б.Чойжилсүрэн болон Монголбанкны Ерөнхийлөгч Н.Баяртсайхан нар Тагнуулын Ерөнхий газарт Төрийн нууц задруулсан болон хорлон саатуулсан хэргээр шалгагдаж байна. Мөн АТГ-т төрийн албан тушаалтан эрх мэдлээ хэтрүүлэх гэсэн үндэслэлээр шалгагдаж байгаа юм.

Тэдний хийсэн мэдэгдэл нь Тагнуулын Ерөнхий газар болон АТГ-т шалгагдах болсон үндэслэл болжээ. Тодруулбал, Монголбанкны Ерөнхийлөгч Н.Баяртсайхан өнгөрсөн сарын 30-нд төв банкны дэд ерөнхийлөгчийг томилох чуулганы хуралдааны үеэр Монгол улсын валютын нөөц ­400 сая ам.доллар байна хэмээн мэдэгдсэн. Мөн энэ сарын 9-нд Сангийн сайд Б.Чойжилсүрэн “Монгол улсын зээлжих зэрэглэл дөрвөн шатлалаар буурсан. Улсын төсөв 1,8 их наяд төгрөгөөр тасарчээ. Монгол улсын нийт гадаад өр 23,5 тэрбум ам.доллар. Мөн Засгийн газрын нийт өр 21,3 их наяд төгрөг. Засгийн газрын өр энэ онд 17 их наяд 311 тэрбум төгрөг байхаар батлагдсан ч, оны эцэст 21,3 их наяд төгрөгт хүрч, энэ оны хүлээгдэж буй ДНБ-ий 78 хувьтай тэнцэхээр байна” хэмээн мэдээлсэн нь хорлон саатуулах, төрийн нууц задруулсан, эрх мэдлээ хэтрүүлсэн үйлдэл хэмээн үзэж өмгөөлөгч Г.Батбаяр 2016.08.19-ны өдөр тэднийг Тагнуулийн Ерөнхий газар болон АТГ-т ханджээ.

Энэ талаар өмгөөлөгч Г.Батбаяр: “Сангийн сайд болон Монголбанкны Ерөнхийлөгчийн хийсэн мэдээлснээс болж долларын ханш өсөхөд хүргэсэн. Мөн гадаадын хөрөнгө оруулалт, зээл, хандив, тусламжийг зогсоолоо. Ингэснээр улсын батлан хамгаалах хүч, эдийн засгийн хүчийн чадлыг сулран доройтуулсан гэж үзэж байна. Тиймээс ТЕГ-т Эрүүгийн хуулийн 87-р зүйл Төрийн нууц задруулсан, мөн хуулийн 85-р зүйлд хорлон саатуулах үйл ажиллагаа явуулсан байж болзошгүй хэмээн үзэж хандаад байгаа. АТГ-т Эрүүгийн хуулийн 264-р зүйлд Төрийн албан тушаалтан эрх мэдлээ хэтрүүлсэн байж болзошгүй гэсэн үндэслэлээр өгсөн.

Хэдийгээр ард түмний мэдээлэл авах эрх Үндсэн хуулийн 16.19-д заасан байдаг ч төр, хувь хүн, төрийн байгууллагатай холбоотой асуудлаар мэдээлэл авахыг хориглодог. Ийм байхад улсын нууц, төрийн нууцыг задруулсан гэж үзэж байгаа. Мөн тухайн албан тушаалтан өөрийн удирдаж байгаа байгууллагын дотоод асуудлыг Засгийн газрын хуралдаанд танилцуулж болох боловч эрх мэдлээ хэтрүүлэн цааш нь зарлаж байгаа нь албан эрх мэдлээ хэтрүүлсэн гэж үзэхээр байна. Энэ талаар эрх үүргэнд нь заагаагүй. Үүнээс болж улсад болон хувь хүнд их хэмжээний хохирол учирсан гэж үзэж байгаа.” Гэв.

Одоогоор мөрдөн шалгалтын ажил явагдаж байгаа юм. Монголбанкны Ерөнхийлөгч болон Сангийн сайдын шалгагдаж байгаа Эрүүгийн хуулийн заалтуудыг бүрэн эхээр нь хүргэе.

85 дугаар зүйл.Хорлон саатуулах

85.1.Монгол Улсын эдийн засаг, батлан хамгаалах хүчин чадлыг сулруулан доройтуулах зорилгоор аж ахуйн нэгж, байгууллагын үйл ажиллагааг саатуулсан бол арваас дээш арван таван жил хүртэл хугацаагаар хорих ял шийтгэнэ.

87 дугаар зүйл.Төрийн нууц задруулах

87.1.Төрийн нууцад хамаарах мэдээ, баримт бичиг, эд зүйл, обьект, үйл ажиллагааг итгэмжлэгдэн хариуцсан буюу албан тушаал, ажил үүргийн хувьд мэдсэн этгээд задруулсан нь эх орноосоо урвах, тагнуул хийх гэмт хэргийн шинжгүй бол таван жил хүртэл хугацаагаар хорих ял шийтгэнэ.

87.2.Энэ хэргийн улмаас хүнд хор уршиг учирсан бол таваас дээш найман жил хүртэл хугацаагаар хорих ял шийтгэнэ.

264 дүгээр зүйл. Төрийн албан тушаалтан эрх мэдлээ хэтрүүлэх

264.1.Төрийн албан тушаалтан албан үүргийн хувьд хуулиар олгогдсон эрх мэдлээ хэтрүүлснээс аж ахуйн нэгж, байгууллага, иргэдийн хууль ёсны эрх, ашиг сонирхолд үлэмж хэмжээний хохирол учирсан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасах буюу хасахгүйгээр хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ.

264.2.Энэ хэргийг давтан, эсхүл хүч хэрэглэж буюу хүч хэрэглэхээр заналхийлж үйлдсэн, түүнчлэн энэ хэргийн улмаас их буюу онц их хэмжээний хохирол учирсан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл таван жил хүртэл хугацаагаар хорих ял шийтгэнэ.

Тэдний гэм буруутай эсэхийг шүүх эцсийн байдлаар шийдвэрлэх юм. Бид энэ талаар эргэж мэдээлэх болно.

А.Баярмаа