Монголын бизнес эрхлэгчид болон БНХАУ- ын Жилинь мужийн хөрөнгө оруулагчдын эдийн засгийн уулзалт болж өнгөрлөө.

Монгол Улсаас 20 гаруй компани оролцсон бол Жилинь мужаас 50 гаруй бизнес эрхлэгч бүртгүүлснээс 20 гаруй компанийн төлөөлөл ирсэн байв. УИХ-ын гишүүн, МҮХАҮТ-ын дарга С.Дэмбэрэл “Монголын бизнесийн орчин, эрх зүй цэвэршиж байгаа. Хөрөнгө оруулалтын таатай нөхцөл бүрдэж байна. Тиймээс Хятадын хөрөнгө оруулагчдад сайхан боломж бүрдсэн” гэв.

БНХАУ-ын Жилинь муж нь 274 сая хүн амтай, газар зүйн байрлалын хувьд Зүүн хойд Азийн бүс нутаг бөгөөд Хятадын аж үйлдвэрлэл, худалдаа, газар тариалангийн суурь юм. Эрчимтэй хөгжиж буй энэ мужийн бизнесийн төлөөлөгчид манай улсад хөрөнгө оруулахаар ирсэн нь Монгол Улсын хувьд сайхан боломж хэмээн хуралд оролцогчид хэлж байв. Хэнтий аймгийн “Хэрлэн талст” компанийн захирал Н.Ганбаатар “Бид орон нутагтаа хөнгөн блок үйлдвэрлэхийг хүсч байна. Орон нутагт төсөв, хөрөнгө бага байдаг учир гадаадын хөрөнгө оруулалт авахын тулд энэ уулзалтыг зорьж ирлээ. Гэвч барилгын чиглэлээр үйл ажиллагаа явуулдаг компаниуд ирээгүй байна” гэв.

Харин Жилинь мужийн хөрөнгө оруулагчид мал аж ахуй, ноос ноолууран бүтээгдэхүүний чиглэлээр хамтарч ажиллах сонирхол ихтэй байгаагаа илэрхийллээ. Хүнс, хөдөө аж ахуйн ассоциацийн эрдмийн зөвлөлийн гишүүн Ц.Өлзий “Бид дотооддоо шар буурцаг тарьж, хүлэмжийн аж ахуй эрхлэх хүсэлтэй байгаа. Харин хятадууд манай оронд мал нядалгааны газар байгуулж, бусад улсад махан бүтээгдэхүүн нийлүүлэх хүсэлтэй байгаа” хэмээсэн. Хэрэв хоёр орны Засгийн газар мах экспортлох талаар нэгдсэн ойлголцолд хүрвэл урд хөрш хөрөнгө оруулалт хийх аж. Тэгвэл тус уулзалтыг зохион байгуулагч, Хөрөнгө оруулалтын газрын Сурталчилгаа зөвлөх үйлчилгээний хэлтсийн дарга Д.Ирмүүн “Хоёр сарын хугацаанд Польш, Герман, Австри, Испани зэрэг улстай хөрөнгө оруулалтын хамтарсан 20 гаруй уулзалт, арга хэмжээ зохион байгууллаа. Үүнд 1500 гаруй бизнес эрхлэгчдийг цуглуулсан байна. Үүний үр дүнд 12 гэрээ хэлэлцээр хийж, шинэ үйлдвэр байгуулах гурван сая ам.долларын хөрөнгө оруулалт орж ирсэн. Тухайлбал, Итали технологиор хиам, махан бүтээгдэхүүнийг манай улсад үйлдвэрлэхээр болж байна” гэж ярив.