Хүн болгоны аман уншлага болсон цалингаас цалингийн хооронд амьдрах асуудалтай байна гэх үг өнөөдрийг хүртэл яригдаж байгаа. 

Эдийн засаг хүндрэлд орсон энэ үед цалингаа ч авч чадахгүй байна гэх яриа хаа сайгүй яригдах болсон гэхэд болно. Ажлынхаа хөлсийг цагтаа өгдөг байгууллага хуруу дарам цөөрсөөр...

Ам.долларын ханш он гарсаар нэмэгдэж явсаар өнгөрсөн дөрөвдүгээр сарын дунд үеэс буурсаар одоогийн байдлаар нийт 50 төгрөгөөр буурсан үзүүлэлтэй байна. 

Тэгвэл өрхийн орлого нэмэгдсэн тухай судалгаа гарчээ. Энэ оны эхний улирлын судалгаагаар нэг өрхийн сарын дундаж мөнгөн орлого 941.5 мянган төгрөг болж, өмнөх оны мөн үеийнхээс 56.5 мянган төгрөг буюу 6.4 хувиар нэмэгджээ. Өөрөөр хэлбэл, ажиллаж хөдөлмөрч байгаа иргэдийн дундаж орлого 941.500 төгрөг болсон гэсэн үг. 

Харин бусад орлого 22.2 мянган төгрөг, хөдөө аж ахуйн бус үйлдвэрлэл, үйлчилгээний орлого 16.7 мянган төгрөгрөөр буурсан байна.  Ийнхүү буурсан хэдий ч хөдөө аж ахуйн үйлдвэрлэлийн орлого 46.3 мянган төгрөг буюу 66.0 хувь, тэтгэвэр, тэтгэмж, нөхөн олговрын орлого 12.4 мянган төгрөг буюу 8.9 хувь, цалин хөлсний орлого 36.7 мянган төгрөг буюу 8.1 хувиар өссөн нь нөлөөлжээ.

Тэгвэл үнийн нөлөөллийг арилган тооцоход нэг өрхийн сарын дундаж бодит мөнгөн орлогын хэмжээ 2015 оны эхний улиралд 861.4 мянган төгрөг болж, өмнөх оны мөн үеийнхээс 23.6 мянган төгрөгөөр буурсан байна.

Нэг өрхийн сарын дундаж мөнгөн зарлага 2015 оны эхний улиралд 963.3 мянган төгрөг болж, өмнөх оны мөн үеийнхээс 81.8 мянган төгрөг буюу 9.3 хувиар өссөн байна. Нэг өрхийн сарын дундаж мөнгөн зарлага нэмэгдэхэд хүнсний бүтээгдэхүүний зарлага 23.7 мянган төгрөг буюу 10.4 хувиар, хүнсний бус бараа, үйлчилгээний болон бусад зарлага 62.9 мянган төгрөгөөр буюу 10.1 хувиар өссөн нь голлон нөлөөлжээ.

Нэг өрхийн сарын дундаж мөнгөн орлого, зарлагыг бүлэглэн авч үзвэл 2015 оны эхний улирлын байдлаар 300.0 мянган төгрөгөөс доош орлоготой өрх нийт өрхийн 11.1 хувийг, мөн энэ хэмжээний зарлагатай өрх 7.9 хувийг, 300.0-900.0 мянган төгрөгний орлоготой өрх нийт өрхийн 47.8 хувийг, мөн энэ хэмжээний зарлагатай өрх 49.4 хувийг эзэлж байна. Харин 2100.0 мянган төгрөгөөс дээш орлоготой өрх нийт өрхийн 5.7 хувийг, мөн хэмжээний зарлагатай өрх 5.8 хувийг эзэлж байна гэдгийг статистикчид гаргав.

Ийнхүү орлогоосоо давсан зарлагатай иргэд цалингаас цалингийн хооронд өрнөөс өрний завсар явах нь арга ч үгүй юм уу даа. Цалин, тэтгэвэр нэмэгдлээ гэхэд хүнсний гол нэрийн бараа, бүтээгдэхүүний үнэ нэмэгдээд байвал орлогоо давсан зарлагатай хэвээр байна. 

 

Х.Даваа