Өчигдөр орой МАХН-ын ЕНБДарга, Эрүүл Мэнд, Спортын Сайд Г.Шийлэгдамбыг баривчилсан билээ. Түүнийг авлига буюу 500 000 сая төгрөгтэй дүйцэхүйц ам.доллар бэлнээр бусдаас авч байх үед нь саатуулсан гэгдэж буй бөгөөд туслах, жолоочтой нь хамт хорьжээ.

Мөн өнөө өглөөний турш АТГ-ын ажилтнууд УИХ-ын гишүүн, Барилга хот байгуулалтын сайд З.Баянсэлэнгийг хайн, яаман дээр нь очсон гэсэн мэдээлэл явсан юм.Харин тэрээр энэ тухай : "Эрүүл мэнд спортын сайд Г.Шийлэгдамбыг баривчилсантай холбоотой намайг шалгаж байна гэсэн мэдээлэл цацагдлаа. Би өглөөнөөс хойш ордонд байсан. Намайг шалгаж, мэдүүлэг авах гэсэн нэг ч хүн ирээгүй. Утсаар ярьсан ч хүн байхгүй. Тиймээс надтай холбоотой асуудлаар тайлбар өгөөч гэсэн албан бичгийг АТГ-т хүргүүлэхээр төлөвлөөд байна. Ер нь би аливаа асуудалд улс төрийн болоод хувийн ашиг сонирхлын үүднээс хандаж байсан удаа байхгүй. Цэвэр, шударга, зарчимч байр сууринаас өөрийнхөө үзэл бодлыг чөлөөтэй илэрхийлж байсан. Миний байр суурь улс төрийн фракци намын тоглоом болох ёсгүй гэж бодож байна. Хэрэв намайг буруу зүйл хийсэн гэж үзэж байгаа бол шалгуулахад бэлэн байна” гэв.

Эх сурвалжуудын өгүүлж буйгаар хуулийн байгууллагууд МАХН-ын удирдлагууд дээр олон сарын өмнөөс гүйцэтгэх ажиллагаа явуулж эхэлсэн бөгөөд одоо ил гарч буй нь энэ аж. Үүнийг ч МАХН-ын дарга Н.Энхбаяр мэдэн, МАН-ынхнаас аврал эрэн тохиролцохоор ажиллаж эхэлжээ. Ингэхдээ эвслийн квотод шунахгүй гэдгээ илэрхийлж, МАН, МАХН-ын эвслийн даргыг ч МАН-аас тодруулахыг зөвшөөрсөн байна. Өөрөөр хэлбэл намаа МАН-д зарах маягаар эрх чөлөө, эрх мэдэлтэй болохыг зөвшөөрсөн гэсэн үг. Товчхондоо бол "бууж өгч" байна. Гэсэн ч түүний уг үйлдэл дэндүү оройтсон байж мэдэх бөгөөд Н.Энхбаяр, З.Баянсэлэнгэ нарыг барьж, хорьсноор МАХН удирдлаггүй болох эрсдэл ч үүсээд буй ажээ. Хамгийн сүүлд эх сурвалжуудаас авсан мэдээллээр МАХН-ын дарга Н.Энхбаяр ТЕГ-ын дарга, ЦЕГ-ын дарга нартай уулзахаар хөөцөлдөж буй бололтой.

С.Сарнай

http://www.sonin.mn