Нийтийн тээврийг дагасан олон асуудал бий. Тухайлбал, "Автобус-1" компанийн Шархад- III, IV хороолол чиглэлийн 13 дугаарын автобусыг иргэд  "галзуу хулгана" хэмээдэг.

Энэ чиглэлд нийтдээ 20 том оврын автобус үйлчилгээнд гардаж аж. Харин жолооч нар нь өөрсдийн явах цагаасаа хоцрохоороо галзуу давхидаг гэдгийг хэн хүнгүй мэднэ. Иргэд тэдэнд "та нар мал ачиж яваагүй шүү, аятайхан яваач ээ" гэхэд "өөр унаандаа суухгүй яасан юм бид цагаасаа хоцорчихоод байна" гээд л зандчаад эхэлдэг. Тэгвэл автобусныхаа эцсийн буудал дээр зогсохгүй дутуу эргэлт хийдэг гэх гомдлыг манай редакцид ирүүлсэн юм.

Тодруулбал, энэ сарын 07-ны өдөр буюу өчигдөр орой 18:40 цагийн орчимд Шархад- III, IV хороолол чиглэлийн 24-20 УБЧ улсын дугаартай, 1-120 гэсэн автобус баазын дугаартай автобусаар үйлчлүүлэхэд хорооллын эцэс дээрээ зорчигчдоо буулгаагүй байна. Жолооч Өргөө кино театрын автобусны буудлаас уруудан урд талын буудал дээр зогсолт хийн зорчигчдыг "энд бууцгаа эцэс рүүгээ зам түгжрээтэй байна" гэжээ. Буух ёстой буудал дээрээ буулгахгүй яаж байгаа юм бэ, тэд нар чинь мөнгөө төлөөд үйлчлүүлж байгаа гэж зорчигчийг хэлэхэд автобусны кондуктор нь зүй бус үгээр доромжилжээ. 

Ингээд тус компанийн 11-341734 дугаарын утас руу холбогдон ээлжийн инженерт гомдлоо хэлсэн байна. Ээлжийн инженер н.Мөнхбаяр "Манайх наад асуудлыг нь хурал дээрээ байнга ярьж жолооч нартаа эцсийн буудал дээрээ зогсож бай. Дутуу эргэлд битгий хийж байгаа гэж хэлж сануулдаг байгаа. Иргэн таны гомдлыг хүлээж авлаа" гэсэн юм. 

Эх сурвалжын хэлж буйгаар хотын төвөөрөө хорооллын эцсээс үйлчилдэг ганц хоёрхон автобус байдаг юм байна. Тийм болохоор энэ автобусаар байнга үйлчлүүлдэг гэнэ. Харин үдээш хойш болохоор эцэс дээр зогсохгүй дутуу эргэлт хийдэг асуудал их гардаг гэлээ. Түүнчлэн мөнгөө төлөөд үйлчлүүлж байгаа бид нарыг кондуркор нь хүртэл элдэв үгээр дуудаж доромжилдог. Ийнхүү эцсийн буудал дээрээ зогсохгүй болохоор сургуулийн насны хүүхэд ганцаараа гэр лүүгээ холоос алхахад хүндрэлтэй байна гэдгийг учирлаж байлаа. 

Нийтийн тээврийн жолооч, кондуктор нарыг харилцааны соёлгүй гэх шүүмжлэлийг байнга гардаг. Мөнгөө төлөөд зорчиж байгаа гээд ажлаа хийж яваа жолооч, кондуртой ёс бус харилцаж бас болохгүй. Гэхдээ эцсийн буудал дээрээ зогсох ёстой жолоочид шаардлага тавихад зорчигчоо доромжилно гэдэг байж боломгүй асуудал баймаарсан. 

Х.Даваа