Арваннэгдүгээр сарын 17-ны өдөр Өмнөговь аймаг дахь Шивээхүрэнгийн боомтоор БНХАУ-руу гарах чиглэлд явж 15-12 ӨМА улсын дугаартай саарал өнгийн фургон маркийн тээврийн хэрэгслийг Цагдаагийн байгууллага, Гаалийн байгууллагаас хамтран саатуулж, үзлэг шалгалт хийжээ.

Түр саатуулсан тухайн автомашины жолооч Өмнөговь аймгийн Гурвантэс сумын иргэн Н-г байлцуулан тээврийн хэрэгсэлд нарийвчилсан үзлэг шалгалтыг хийхэд, тээврийн хэрэгслийн дотор хана таазыг зориудаар тоноглож, тухайн хэсэгтээ 125 кг улаан өнгийн байгалийн хас чулууг нуун далдалсан байсан нь илэрчээ.

Зөрчлийн улмаас саатуулагдсан 125 кг улаан өнгийн байгалийн хас чулууны дээжийг мэргэжлийн байгууллагын шинжилгээнд хүргүүлж, 15-12 ӨМА улсын дугаартай фургон маркийн тээврийн хэрэгслийг Гаалийн тухай хуулийн 291.2 дугаар зүйлд зааснаар хураан авч, улсын орлого болгохоор шийдвэрлэсэн байна.

Гаалийн ерөнхий газрын харьяа Шивээхүрэн дэх Гаалийн газар нь 2014 онд  зөвхөн улаан хас чулуу болон байгалийн чулууг улсын хилээр хууль бусаар хилийн чанадад гаргахыг завдсан 66 зөрчил илрүүлж, гаалийн тухай хууль тогтоомж зөрчсөн 66 иргэнд  2.540.000 төгрөгний  торгууль ногдуулан, зөрчилд холбогдсон 1300 кг байгалийн чулууг хураан авч улсын орлого болгосон аж.

Мөн МУ-ын иргэн М-н улсын хилээр хууль бусаар хилийн чанадад гаргахыг завдсан 420 кг улаан хас чулуу,  хагас үнэт 128 кг анар чулууг гаалийн шалгалтаар илрүүлж,  эрүүгийн хэрэг үүсгэн шалгуулахаар Цагдаагийн байгууллагад шилжүүлээд байна хэмээн Гаалийн Ерөнхий газраас мэдээллээ.

Зориуд бэлтгэж нүх гаргасан хананы хэсэг

Зориуд бэлтгэж нүх гаргасан таазны хэсэг