ЦЕГ-ын дарга асан Б.Билэгтийг Засгийн газрын хуралдаанаар гэнэт томилсон шигээ гэнэт л “хуссан” билээ.

Б.Билэгтийн хувьд энэхүү шийдвэр нь хүндээр туссан болохоор шүүхийн байгууллагад хандсан,  ялсан гэх мэт ташаа мэдээллийг  “шарандаа” хүргэж байсан.

Тэгвэл үнэн хэрэгтээ Б.Билэгт  шүүхэд ялах нь битгий хэл  шүүхийн байгууллагад ч хандаагүй юм билээ.Б.Билэгтийг шүүхэд хандаагүй гэдгийг  Захиргааны хэргийн анхан шатны 20 дугаар шүүхийнхэн нэгэн дуугаар баталж байгаа.

Худал мэдээлэл тараасан нь илрээд ирэхээр Б.Билэгт бантав бололтой “Би захиргааны хэргийн шүүхэд бус Иргэний хэргийн шүүхэд хандсан”  хэмээн  ярьж яваа ажээ.  Иргэний хэрэг  тэр хүний өргөдлийг хүлээж авах хууль эрх зүйн ямар ч үндэслэл байхгүйг Б.Билэгт уг нь мэдэхийн дээдээр мэдэж байгаа.  

Тэгэхээр  Б.Билэгт ЦЕГ-ын даргын суудлаа хэнд ч алдахгүйгээр, улайран тэмцэх нь зөв гэж үзэж байгаа бололтой. Үүндээ ч итгэлтэй байгаа бололтой.  ЦЕГ-ын даргын албан хэрэгцээнд хэрэглэдэг машиныг жолоочтой нь ашиглаж байгаа гэнэ.  Үүнийг нь уржигдар харсан хүн  ч байна. Хэрвээ Б.Билэгт  ЦЕГ-ын албан хэрэгцээний машиныг ажлаа өгсөн хойноо  ашиглаж байгаа бол энэ нь Эрүүгийн хууль зөрчиж байгаа хэрэг юм.  Тэгэхээр  энэ асуудлыг АТГ-ынхан  шалгаад хянахад нэг их буруудахгүй л болов уу.   

Үнэн хэрэгтээ  Б.Билэгт ЦЕГ-ын дарга байхдаа  ажлаас нь олон хүнийг үндэслэлгүй халж, шүүх болон  ЦЕГ-ийн хуулийн хэлтэсийн ачааллыг багагүй нэмсэн нь үнэн.  Өнөөдөр өөрөө үндэслэлгүй ажлаас халагдсан хүмүүсийнхээ дунд ороод  “гонжирч” байгааг хараад эгдүүцэх хүн цөөнгүй байна.  

Цагдаагийн ерөнхий газрын дарга байсан хүн хуулиа мэдэхгүй царайлан ийнхүү гүрийж байгаа нь ямар нэгэн ашиг сонирхлын зөрчил байгаа юм биш байгаа гэсэн хардлагыг эрхгүй төрүүлж байна.  

А.Баярмаа