УИХ-ын гишүүн Г.Уянга Ерөнхий сайд Ч.Сайханбилэгийг огцруулах бичигт гишүүдийн гарын үсэг цуглуулж яваа. Ингээд гишүүд Ч.Сайханбилэгийг дургүй хүргэх л юм бол гарын үсэг зурна шүү гэсэн янзаар, айлгадаг болсон.

Ямартай ч одоогийн байдлаар гарын үсэг зурсан гишүүдийн тоо 16-17 болоод байгаа юм байна. Гэхдээ тэдэн дээр Н.Алтанхуяг, Х.Баттулга нар нэмэгдсэн байж магадгүй аж. Хэрэв 19 болбол УИХ-аар Ерөнхий сайдыг огцруулах эсэхийг хэлэлцэх юм.

Засаг солигдох бүрт халаа сэлгээний ажил хийсээр байгаад ард түмэнд ээлтэй улсын ажил зогсдог сөрөг талтай. Гэтэл эдийн засгийн хямралтай хүнд хэцүү цагт Засгаа унагаж тоглосоор байгаа нь ядарсан иргэдээ санаатайгаар зовоож байгаа үйлдэл болоод байна. Саяхан л Н.Алтанхуягийг татаж, унагаад Ч.Сайханбилэгийг тавьсан. Засгийг дахин огцруулаад хэнд ямар ашигтай, юу өөрчлөгдөх юм бэ. Хамгийн гол нь хайран цаг хугацааг юу ч хийхгүй өнгөрүүлэх болчихно. Тодруулбал огцруулах эсэх асуудал, дараагийн сайд томилох, засгийн бүтэц зэргийг ярьсаар, хэрэлдсээр дараагийн сонгуультай нүүр тулна гэсэн үг. Өөрөөр хэлбэл хэнийг ч хамаагүй огцруулах тухай ярьж, нэр хүндээ өсөхийг горилдог өчүүхэн жижиг гишүүдийн хийдэг өрөвдөлтэй улстөр гэж энэ байна.

Уянга болон бие даагчид угаас ард түмэнд таалагдахын тулд, дуугарах бүртээ эсрэг байр суурь илэрхийлдэг заншилтай. Тэд Ерөнхий сайдыг танхимтай нь унагачихвал сонгуулиар Оюу толгойг аварсан хэмээн өөрсдийгөө тунахаглах нэг том боломж гэж ойлгоод байгаа юм байна. Мөн тэдэнд огцруулах тухай хэрүүлээс өөр хийж, бүтээж чадах зүйл байхгүйтэй нь ч холбоотой байх. Ингээд нэг ёсондоо огцруулах тоглоомонд дуртай, онцгүй хүмүүсийг парламентад сонгоод, өөрийгөө төлөөлүүлэн явуулсан та бидний хохь болоод байгаа юм.

Хэн нэг нь дорвитой алхам хийнэ гэхээр л өөр нэгэн эсвэл шүүмжлэгч, эсэргүүцэгч гарч ирээд улстөрждөг. Энэ нь нэг ёсондоо улс эх орон, ард түмнээ бодсон зүйл огт биш гэдгийг дахин дахин хэлмээр байна. Амин хувиа бодож том асуудлын ярианд өөрийгөө хавчуулан нэр хүндээ өсгөх гэсэн л горьдлого.

Н.Ганаа