Т.Аюурсайхан, Л.Оюун-Эрдэнэ, Ж.Энхбаяр тэргүүтэй УИХ дахь МАН-ын бүлгийн гучин гишүүн Ерөнхий сайд Ж.Эрдэнэбатыг огцруулах саналыг УИХ-д албан ёсоор хүргүүлээд байна. Хуулийн дагуу уг асуудлыг 14 хоногийн дотор шийдвэрлэх учиртай. УИХ дахь АН-ын 9 гишүүн, бие даагч С.Жавхлан нараас гадна Ц.Нямдорж, Ө.Энхтүвшин нар Ерөнхий сайдыг огцруулах санал гаргасан дээрх гучин гишүүнийг дэмжих магадлал өндөр тул Засгийн Газар огцрох нь бараг тодорхой болжээ.

Иймээс Засгийн Газрыг хамгаалж үлдэхээр хичээх нь  нэгэнт үр дүнгүй хэрэг болох тул дараагийн Ерөнхий сайдад өөрийн хүнээ зүтгүүлэхийг МАН-ын фракциуд онцгой ач холбогдолтой гэж үзэн, идэвхтэй яриа хэлэлцээр явуулж байна.

Тодруулбал УИХ-ын дарга, МАН-ын дарга М.Энхболдын онцгой дэмжлэгтэй, Ерөнхий сайд Ж.Эрдэнэбат, Хөдөлмөр, Нийгмийн Хамгааллын Сайд Н.Номтойбаяр нарын фракци ЗГХЭГ-ийн дарга, Монгол Улсын Сайд Ж.Мөнхбатыг Монгол Улсын Ерөнхий сайдад нэр дэвшүүлэхээр дотроо ярилцан, шийдээд бусад бүлэглэлүүдтэй яриа хэлэлцээрт орж эхэлжээ. Мөн Шадар сайд У.Хүрэлсүх, УИХ-ын гишүүн Н.Энхболд нарыг санал болгож буй бүлэглэлүүд  МАН дотор байгаа нь нэгэнт тодорхой болоод буй билээ.

 

Л.Ганзориг

sonin.mn