Монголд поп дива дуучин гэгддэг гарын таван хуруунд багтдаг дуучин бүсгүйчүүд бий. Тэдний нэг нь Дуучин Сэрчмаа буюу Sally. Тэрбээр 1982 онд Улаанбаатар хотноо Самбуугийн гэрт охин нь болж мэндэлжээ. Түүний бага нас 4 дүгээр хороололд өнгөрсөн гэдэг. Дунд сургуульд байхдаа дуулж, бүжиглэж, олон тоглолтод оролцдог, нийгмийн  идэвхитэй нэгэн байсан нь түүнийг дуучин болоход нь нөлөөлсөн байх.

Монголын олон залуучуудын харцыг булааж байсан Сэрчмаа одоогоос 3 жилийн өмнө Өвөрмонгол залуутай сүр дуулиантай хуримаа хийсэн. Гэвч тэдний амьдрал удаан үргэлжлээгүй хоёр тийш болсон юм. Дуучин бүсгүй энэ талаараа "Гэр бүл оршин тогтнох гол хүчин зүйл нь хайр сэтгэл, бие биенээ ойлгож байж амьдрал сайхан байна. Бид хоёрын хувьд бол хоёр өөр орны хүмүүс , хоёр өөр соёл, заншилтай ер нь бүх зүйл маань өөр байсан. Үүнээс шалтгаалан салсан. Гэхдээ эхэндээ бол салж сарнина гэж гэрлэдэггүй шүү дээ. Болгоно, бүтээнэ л гэж гэрлэдэг. Мөн миний уран бүтээлийг дэмждэггүй байсан. Эдгээрээс шалтгаан салсан" хэмээн тайлбарыг хийж байсан билээ.

Тэрбээр хөөрхөн охиноо өөрөө өсгөж байгаа. Бяцхан гүнждээ Хураа хэмээх нэрийг хайрласан. Хувьтай хүн хур борооноор гэж бороо орж байхад төрсөн хэмээн бэлэгшээж өгсөн гэдэг.

Олон түмэнд "Хайрын дууч” хэмээн өргөмжлөгдсөн дуучин бүсгүй маань уран бүтээлээсээ түр хөндийрөөд байсан ч удалгүй “Freezone” хамтлагтай хамтран “Миний нулимасыг салхи л арчина” хэмээх  дууг  шинээр дуулан урлагийн тогооноо буцан ирж байсан удаатай.

Хамгийн анх түүнийг дууны урлагт орж ирэхэд манлай дуучин Б.Сарантуяа "Энэ хүүхэд их юм дуулгах болно. Нэг юм заавал дуулгах хүүхэд. Түүнд царай зүс, хоолой хоёр хослон заяажээ” гэж өндрөөр үнэлж түүнд урам зориг хайрлаж байсан юм.

Түүний хамгийн анхны шагнал нь 2003 онд Улан-Үдэд зохион байгуулагдсан  олон улсын наадамд түрүүлээд "ГранПри" авч байхдаа маш их баярлаж байсан гэдэг. Үүнээс хойш 2005 онд МУСТА цол тэмдгээр энгэрээ мялаасан.