Төрийн албанд ажиллах хүчнийг хуулийн дагуу сонгон шалгаруулалт явуулж авдаг гэдэгт иргэд итгэдэг. Харамсалтай нь төрийн албанд хууль бусаар томилогдсон томилгоо цөөнгүй хийгдсэн байдаг юм. Мөн Ерөнхий сайдаасаа эхлээд Төрийн албыг төрлийнх байх ёсгүй хэмээн үзэж, төрийн албаны шинэчлэл, сахилга хариуцлагыг чангатгах талаар нэлээдгүй ярьж, Төрийн албаны тухай хуулийг шинэчлэн баталсан.

Тэгвэл 2019 оны нэгдүгээр сарын 01-ний өдрөөс эхлэн чандлан дагаж мөрдөгдөж ирсэн уг хуулийн дагуу шударга сонгон шалгаруулалтыг Төрийн албаны зөвлөл хийж чадаж байгаа юу? Тус зөвлөл өдгөө хэд хэдэн албан тушаал дээр сонгон шалгаруулалт зарлажээ.

Авилга албан тушаалын зөрчилгүй, хуулийн дагуу сонгон шалгаруулалтын шалгуурыг хангасан иргэнийг Төрийн албаны зөвлөл сонгож, төрлийн алба болохоос сэргийлж чадна гэдэгт найдаж байна. Аль ч засгийн үед аливаа нэг газрын дарга удирдлагаар заавал ажиллах ёстой мэт хандаж төрөл садан, ойрын хүнээ хууль бусаар томилж байсан нь хэдэнтээ ил болж байсан удаатай. Тэгвэл Ерөнхий сайдаасаа эхлээд энэхүү бичигдээгүй тогтсон жишгийг халахыг амлаж, үүнд анхааран ажиллаж байгаа энэ цаг үед төрийн алба хэн нэгний хэсэг хугацаанд орогнох газар битгий байгаасай.  Төрийн албаны зөвлөлийнхэн өдгөө зарлагдаад буй хэд хэдэн албан тушаал дээр салбартаа мэргэжлийн болон мэргэшсэн багц сургалтандаа хамрагдсан хийгээд төрийн албандаа ажилласан туршлагатай зэрэг хуулиндаа заагдсан заалтын дагуу хүмүүсээ сонгох биз ээ.

 

23 дугаар зүйл.Төрийн албан тушаалд тавих тусгай шаардлага

23.1.Төрийн улс төрийн болон тусгай албан тушаалд тавих тусгай шаардлагыг холбогдох хуулиар тогтооно.

23.2.Хуульд өөрөөр заагаагүй бол доор дурдсан төрийн захиргааны албан тушаалд энэ хуулийн 22.1-д заасан нийтлэг шаардлагаас гадна дараахь тусгай шаардлагыг хангасан иргэнийг томилно:

23.2.1.тэргүүн түшмэлийн ангилалд хамаарах албан тушаалд томилогдох бол төрийн албанд 16-аас доошгүй жил, үүнээс эрхэлсэн түшмэлийн албан тушаалд 8-аас доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх;

23.2.2.эрхэлсэн түшмэлийн ангилалд хамаарах албан тушаалд томилогдох бол төрийн албанд 12-оос доошгүй жил, үүнээс ахлах түшмэлийн албан тушаалд 4-өөс доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх;

23.2.3.ахлах түшмэлийн ангилалд хамаарах албан тушаалд томилогдох бол төрийн албанд 8-аас доошгүй жил, үүнээс дэс түшмэлийн албан тушаалд 4-өөс доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх.

Дээрх хуулийн заалтын дагуу Төрийн албаны зөвлөл сонгон шалгаруулалтад оролцож байгаа иргэний бүрдүүлсэн материалыг авдаг ажээ.