Батлан хамгаалах салбарынхан "Монгол цэргийн өдөр", Зэвсэгт хүчний  94 жилийн ойн баярыг угтаж Зэвсэгт хүчний үйл ажиллагааг сурталчлах, иргэдийг эх оронч үзлээр хүмүүжүүлэх зорилготой "Монгол Улсын төлөө зүтгэе" телевизийн цуврал нэвтрүүлэг  хийж байна. Энэхүү нэвтрүүлгээ "ТВ9" телевизтэй хамтран бүтээж байгаа бөгөөд цэргийн албыг олон нийтэд сурталчлах, цэргийн алба хаах нь  эр хүн бүрийн гүйцэтгэх үүрэг гэдгийг ойлгуулах  зорилготой юм байна. Цэргийн алба хаана гэдэг төр улсынхаа тусгаар тогтнол, эрх чөлөөт бие даасан байдал, үндэсний эв нэгдэл, үзэл бодлыг дээдлэн, эх орныхоо түүх, соёл, зан заншлыг хайрлан  хүндэтгэх, ард түмнийхээ итгэлийг хүлээсэн эх оронч сэтгэлгээтэй иргэн болж төлөвшихөд чухал үүрэгтэй. Нэвтрүүлэг "Монгол цэргийн өдөр"-өөс эхлэн үзэгчдийн хүртээл болж эхэлнэ. Эр цэргийн албыг сурталчлах энэхүү нэвтрүүлэгт урлаг, спортын оддоос эхлээд малчин,судлаач, уурхайчин, багш, аврагч, инженер гээд салбар бүрийн  төлөөлөл оролцож  байгаа ажээ.   Тухайлбал, Соёлын тэргүүний ажилтан, дуучин Б.Хонгор, залуу уран бүтээлч Д.Найдандорж нарын 26-гаас  дээш насны 16 залуу оролцож байна. Эдгээр залуусын хувьд цэргийн албыг биеэр хаагаагүй  ч дүйцүүлэх болон мөнгөн төлбөрөөр хаасан юм байна. Нэвтрүүлэгт оролцогчдод Батлан хамгаалахын сайд Ц.Цолмон батламж гардуулж  амжилт хүссэн юм. Тэрээр "Зэвсэгт хүчний 94 жилийн ойг угтаж иргэдийг эх оронч үзлээр хүмүүжүүлэх, Монгол Улсын Үндсэн хуульд заасан иргэний журамт үүрэг, цэргийн алба хаах сонирхол, эрмэлзлэл, улс орноо батлан хамгаалахад иргэдийн оролцоог нэмэгдүүлэх зорилгоор телевизийн цуврал нэвтрүүлэг  хүрэх учиртай. Эх орноо хайрлая гэвэл эр цэргээ хайрла гэсэн сайхан үг бий. Тэгвэл энэ нэвтрүүлгээр цэргийн эрдэмд багахан ч атугай суралцаж, цэргийн амьдралын онцлогийг  харуулж чадна гэж найдаж байна. Оролцогчид маань цэргийн албаа биеэр хаалгүй, бусад хэлбэрээр хаасан ч гэлээ журамт үүргээ ухамсарлаж, нэвтрүүлэгт оролцож  байгаад тань талархая" хэмээгээд оролцогчдод амжилт хүссэн юм.