АПУ компанийн гэрээт борлуулагч, “Ариун алтан тэвш” компанийн ажилтан Б.Алтанхуяг бусдын гарт харамсалтайгаар амиа алдсан хэрэг өнгөрсөн оны есдүгээр сард гарсан. Хэргийг нэхэн сануулбал, талийгаач 2014 оны есдүгээр сарын 15-ны өдөр 11.00 цагийн үед биедээ дөрвөн сая гаруй төгрөгтэй, “УНК 2983” улсын дугаартай ачааны саарал микро автобусандаа 7-8 сая төгрөгийн бараа ачин, Хонхороос Гачуурт чиглэлийн дэлгүүрүүдэд бараа тараах гэж гараад ор сураггүй алга болсон байдаг. 
 
Түүний цогцсыг цагдаагийн бие бүрэлдэхүүн алга болсноос нь хойш 15 хоногийн дараа Налайх дүүргийн III хороонд байрлах нэгэн уурхайгаас олж, төд удалгүй Баянзүрх дүүргийн XI хороонд байрлах хүнсний дэлгүүрийн эзэн П гэгч нь хөнөөсөн болохыг тогтоосон билээ. Одоогоор сэжигтэн П-д Монгол Улсын Эрүүгийн хуулийн 91,2.1-т зааснаар эрүүгийн хэрэг үүсгэж, ШШГЕГ-ын харьяа Цагдан хорих 461 дүгээр ангид саатуулан шалгаж буй. 
 
Албаны эх сурвалжийн мэдээлснээр энэхүү хэргийн мөрдөн байцаалтын ажиллагаа дуусах шатандаа орсон бөгөөд хэрэг прокурорт шилжээд байгаа аж. Харин мөрдөн байцаалтын явцад тангараг өргөсөн цагдаагийн алба хаагчид хүний эрхийг ноцтойгоор зөрчиж, гэрчийн мэдүүлэг өгч буй хоёр эмэгтэйн биед халдсан хэрэг гарчээ. 
 
Тодруулбал, эл хэрэгт гэрчээр байцаагдаж байгаа Налайх дүүргийн иргэн Б.Отгонцэцэг, Г.Дэлгэрцэцэг нараас мэдүүлэг авсан нэр бүхий хоёр мөрдөн байцаагч тэдэнд эрүү шүүлт тулган, улмаар зодож танхайрсан байна. Ингэхдээ хэргийг хүчээр тулгах гэж хүртэл оролджээ.
 
Энэ талаар эх сурвалж хэлэхдээ “Өнгөрсөн онд гарсан АПУ компанийн гэрээт борлуулагч, талийгаач Б.Алтанхуягтай холбоотой хэрэгт гэрчээр байцаагдаж байгаа Б.Отгонцэцэг, Г.Дэлгэрцэцэг нарт Налайх дүүргийн Цагдаагийн хэлтсийн хоёр мөрдөн байцаагч гэрчийн мэдүүлэг авахдаа эрүү шүүл тулгаж, зодож танхайрсан. Тангараг өргөсөн цагдаа нар гэрчийн биед халдана гэдэг байж болохгүй зүйл. Мөрдөн байцаах ажиллагааг явуулсан байцаагч нар хүний эрхэнд халдаж, эрүүдэн шүүж байцаалт авсан нь өөрөө хууль зөрчсөн хэрэг. Тиймээс нэр бүхий хоёр мөрдөн байцаагчид хариуцлага тооцох хэрэгтэй” гэв. 
 
Түүнчлэн эл хэрэгт гэрчээр байцаагдаж буй Б.Отгонцэцэг, Г.Дэлгэрцэцэг нар цагдаагийн алба хаагчид “Гэрчийн мэдүүлэг авахдаа эрүүл шүүлт тулгасан. Зодож танхайрсан. Улмаар хэрэг тулгах гэж оролдсон” гэх гомдлыг “Хүсэл зорилгоо нэгтгэе" үндэсний хөдөлгөөнд гаргаад байгаа аж. Тус хөдөлгөөний “Ээжүүд" холбоо нэр бүхий хоёр мөрдөн байцаагчид хариуцлага тооцохыг шаардаж, саяхан Улаанбаатар хотын цагдаагийн газар болон Цагдаагийн ерөнхий газрын удирдлагуудтай уулзахыг хүссэн ч хүлээж аваагүй байна. 
 
Тэд энэ талаар хэлэхдээ “Өнгөрсөн нэгдүгээр сард Б.Отгонцэцэг, Г.Дэлгэрцэцэг нар цагдаагийн алба хаагчид гэрчийн мэдүүлэг авахдаа биед нь халдсан талаар гомдол ирүүлсэн. Энэ асуудлаар бид Улаанбаатар хотын цагдаагийн газар болон, Цагдаагийн ерөнхий газрын удирдлагуудтай уулзахаар очсон. Биднийг удирдлагууд нь хүлээж аваагүй. Харин дээр хоёр байгууллагын хэвлэлийн ажилтнууд нь хүлээж авч, уулзсан. 
 
Тэдэнд учир байдлаа хэлсэн ч хүний эрхийг ноцтойгоор зөрчсөн хоёр байцаагчийнхаа нэрийг нийтэд зарлаагүй. Тэд хэлэхдээ "Хэрэг прокурорт шилжсэн. Хэрэв мөрдөн байцаах үйл явцтай холбоотой нотлох баримт байгаа бол прокурорт гомдол гаргах хэрэгтэй. Нотлох баримт үндэслэлтэй бол нэмэлт мөрдөн байцаалтад буцаах ёстой” гэсэн. Үүнээс гадна хоёр гэрч эмэгтэйн өргөдөл, нотлох баримт болох бичлэгийг дарга нартаа өөрсдийн биеэр өгнө гэдгээ дамжуулсан” гэсэн юм. Энэ талаар эргэн мэдээлэх болно. 
 
Б.Төрбат