Энэ долоо хоногт улс оронд олон үйл явдал өрнөлөлөө. Баяртай мэдээг эхэнд дуулгая, Олон улсын хэмжээний мастер Э.Бэхбаяр Азийн аварга боллоо. Мөн Ой тогтоолтын ОУ-ын аварга Т.Энхжин “дэлхийн рекорд” -ыг эвдэж Монголчуудын зүрхийг омогшуулаад авсан бол "Хөсөгтөн" хамтлаг Авьяаслаг Азичууд шоуны сүүлийн шатанд тэнцсэн сайхан мэдээтэй долоо хоног болж өнгөрлөө. 

Сайны хажуугаар саар заавал байдаг жамтай бололтой. Чөлөөт бөхийн Ази тивийн аварга шалгаруулах тэмцээнд оролцохоор Катарыг зорьсон зарим тамирчин визний асуудлаас болоод саатуулагдан, улмаар нутаг буцах болсон талаар бид мэдээлж байсан билээ. Тэд өчигдөр эх орондоо ирсэн юм.

Дасгалжуулагч Б.Баяраа: Би гомдож, гутарч байна "Бид визний зүгээр нэг зөрчил ч биш хуурамч визний асуудалд орооцолдсон. “Хуурамч визийг хэн хийсэн Кувейтын ямар байгууллагатай холбоотой байсан” гээд энгийн харилцаагаар биш шаардаж эхэлсэн. Бидэнтэй гэмт хэрэгтэнтэй харьцаж байгаа юм шиг зандарч дээрэнгүй харьцсан. Хэн та нарт виз өгсөн, дарга нар ч хэн бэ гэхэд "Манай дарга Катарт байгаа. Аварга хүн бий. Та нар яриад хаач бидэнд ч хэцүү байна" гэсэн. Катарын Ази тивийн аварга шалгаруулах тэмцээн зохион байгуулагчидтай холбогдсоны дараагаар “Тэмцээнд оролцох тамирчдын дунд та нарын нэрс, мэдээлэл алга” гэсэн. Ингээд л шууд биднийг хорьсон. Бид хуурамч визний асуудал цаашлаад гэмт хэрэгт холбогдох нь гэж айгаад хоригдохгүй гэж эсэргүүцэл илэрхийлсэн. Гэтэл цэргийн хүмүүсээр хамгаалуулж шууд хорьсон. Хоригдсон газар бохир заваан, үнэр танар гэж авах юмгүй. Хүйтэн шаланд, жорлонгийн үүдэнд хүртэл хүмүүс хувцсаа дэвсээд хэвтэж байсан. Монгол Улсыг тив, дэлхийд төлөөлж цаашлаад олимпод бэлдэж буй тамирчид ийм муухай газар орж юм, юм үзнэ гэдэг арай л хэтэрхий байлаа" хэмээн тэрбээр болсон бүх үйл явдлыг хэвлэлийнхэнд ярилаа. 

 

 

-Монгол хожигдчихжээ-

Дэлхийд саарыг нь нууж, сайныг нь сурталчлах мэргэжлийн пиарын баг ажиллуулъя

УИХ-ын гишүүн Л.Энх-Ам­га­лан­гийн өчигдөр цахим ер­төнцөд жиргэсэн жиргээ олны ан­хаарлыг татлаа. Тэрбээр, өөрийн твит­тер хуудсандаа “Английн Рио­той хэрүүлтэй, Канадын Хан ре­сурстой шүүхтэй, Францын Аре­ваг хулхидсан, Германы Siemens-ийг гомдоосон, Peadoby ну­таг буцсан. Хэн хожив” хэмээн жир­гэсэн байсан юм. Мэдээж энд хэн ч хожоогүй.
 
Монголын нэр хүнд дэл­хий дээр унаж байгааг эдгээр цөөхөн компанийн жи­шээ л харуулж байгааг УИХ-ын гишүүний хувиар хөндсөн хэрэг биз. Дээрх нэр дурьдсан ком­паниуд дандаа тухайн улс­даа нэр хүндтэй, дэлхийн олон ч оронд уул уурхай болон бусад сал­барт лиценз эзэмшиж, баялаг бүтээхдээ бүтээчихсэн “луух­гар”-ууд.  Харамсалтай нь Монгол Улсад ирээд тэд өөд нар харсангүй. Зарим нь ком­па­нийнх нь хэрэг шүүхийн шатанд байх үед захирал нь Монгол Улсад ирчихсэн байхдаа учир би­түүлгээр амиа алдчихлаа. Олон орны хэвлэл мэдээлэл энэ мэт хэр­гүүдийг олзолж авчихаад Мон­гол бол “Hotel Mongolia” хэмээн дэлхий нийтэд зарлан тунхаглаж байна. Бид одоогоор үндэстэн дамнасан гурван том корпорацитай шүүхийн асуу­далтай байгаа. 

Баялгийн үндэсний үзэл гэгчийн синдром жинхэнэ утгаараа энэ улсад нүүрлэчихсэн. Хууль баталж тоглодог, том ордуудаа эзэмших гэж улайрдаг, хувь эзэмших хүслээ хүчээр тулгах, үндэстэн дамнасан корпорациудтай үр­­гэлж зөрчилдөх зэргээр илэр­дэг синдром энэ үзлээр илэрдэг хэмээн улс төр судлаачид хэлдэг.  Уул уурхай, Гадаад хэ­рэг, Аж үйлдвэр зэрэг баялаг бү­тээгч яамдууд хөрөнгө оруу­лах сонирхолтой хар шар зү­сэн зүйлийн хүмүүсийн хөлд дарагд­чихсан байдаг цаг. Гэтэл гадны хөрөнгө оруулагчдын ба­раа зүс эдгээр яамдуудаар ха­рагдахаа больсныг нуугаад яах вэ. Нүсэр техникийн дуу тэн­­гэрт хадаж байх хаврын ули­рал дуусах дөхөж байхад гад­ны хөрөнгө оруулалт сэр­гэхгүй байна. Доллар орж ирэх­гүй нь. 

Нүүрсний үнэ улам унаж байна гэсэн таагүй мэ­дээл­лийг салбарын яамнаас хий­лээ. Хүн нэрээ тогос өдөө гэ­дэг. Харин Монгол Улсын төр засгийн өндөрлөгт суугаа эрх­мүүдэд энэ үг хамаагүй бо­лолтой. Гадны олон ч хурал уул­залтад Төрийн тэргүүнээсээ эх­лээд очиж “Монголд тавтай мо­рил” хэмээн урьж залсан ч тэд ирсэнгүй. Эхлээд бодлогоо то­дорхой болгочих. Дараа нь бид оч­но гэсэн шаардлага тавьдаг гэнэ.  Дампуурлаа зарлахыг хүсээгүй л бол Монгол Улсад битгий хөрөнгө оруул хэмээн нууц далд сүлбээний уулзалт хур­лын үеэр уриалдаг талаар Мон­голд хөрөнгө оруулах хү­сэлтэй байсан ч мөн л шүүхээс са­лахаа больсон танил Япон маань ярьж байв. Тэд тус бүр­тээ үйл ажиллагаа явуулдаг, сал­бартаа хүчтэй өрсөлдөгчид  ч хөрөнгө оруулсан улс орнуу­дын­хаа талаар мэдээлэл ямагт солилцдог аж. 

Тэр үед бидний талаар үргэлж таа­гүй мэдээлэл хуваалцах болс­ныг энд зориуд онцлон хэлье. Канадын “Саусгоби Сэндс” компанийн нягтлан бо­догчоор ажиллаж байсан Фи­лип­пиний ир­гэн Хиларион Ка­жу­ком “Ми­ний карьер үгүй бол­чих­лоо. Би энэ улсаас хэзээ явахаа мэдэхгүй байна” хэмээн ярьж байсныг “Блүүмбэрг” са­нуулж байсан удаатай. “Үнэ­хээр гайхамшигтай. Яг л Хол­ли­­вудын кинонд гардаг шиг на­майг баривчилсан. Харин яагаад баривчилсан бэ гэдгээ на­дад тайлбарлаагүй. 

Барууны ком­панийн засаглалын та­лаар цагдаа нарт мянга түм тайл­барласан ч тэд намайг ойл­гоогүй. Тийм зүйл мэдэхгүй гэж хэлсэн” хэмээн Монгол Ул­саас гарах эрхээ хоёр жил ха­суулсан Австралийн иргэн Сара Армст­ронг дэлхийн хэдэн зуун хэвлэлд ярилцлага өгөхдөө ярьж байлаа. Хилс хэрэгт гүтгүүлсэн хэмээн улсынх нь Ерөнхийлөгчийн уучлалыг хүр­тээд буцсан Саусгоби Сэнд­сийн удирдлагууд өнөөдөр дэл­хий нийтэд бидний тухай аль бү­тэхгүй талаас нь ярьж явна. 

Ийм байхад хөрөнгө оруулалтын та­лаар ярих хэрэг байна уу. Хөг­жих тухай мөрөөдлөөр сэт­гэлээ ч хуурах шаардлага ал­га. Бид баялгаа ашиглуулж байж л хөгжих учиртай. Хоёр та­лаасаа хүчирхэг том гүрнээр тү­шүүлсэн, далайд гарцгүй ул­сын хувьд дангаараа уул уур­хайгаа ашиглаад хэзээ ч Азийн бар улс болж чадахгүй. Нүүрс, зэс, алтны арвин их нөөц­тэй ч техникийн хүчээр зодож буй акулуудын дэргэд бид голын жижигхэн жараахай төдий. 

Үргэлжлэлийг эндээс 

-Газар олголтын “балаг дуусахгүй нь ээ”-

Засаг замбараагүй газар олголтыг эрх мэдэлтнүүд халаас зуузаантангуудад өгчихдөг. Барилга барих гэж буй нөхдүүд ч гэсэн барьж л байвал болоо гэсэн шиг хотын төвд л бол хамаагүй ханддаг болоод удаж байна. Нийтийн эзэмшлийн газар орон сууц барьж болохгүй хэмээсээр байхад барилга барих сууриа ухаж хэдэн давхар байшин сүндэрлүүлж орхидог нөхдүүдэд сургамж болсон үйл явдал өнгөрөгч сарын сүүлээс эхлэн өнөөг хүртэл үргэлжилсээр байгаа юм. 

Баянгол дүүргийн 14 дүгээр хорооны нутаг дэвсгэрт байрлах 16 дугаар орон сууцыг цагдаагийнхан хамгаалалтад авч Мэргэжлийн хяналтын ерөнхий газраас ажлын хэсэг гарган хяналт шалгалт хийсэн.

Мэргэжлийн хяналтын улсын байцаагч нар эхлээд 16 дугаар байрны дөрвөн булан болон арван цэгт түр тэмдэг тавиад геодезийн хэмжилт хийжээ. Барилгын оройн хэсгийг суурийн хэсэгтэй харьцуулж үзэхэд дөрвөн см хазайлттай гарсан гэдгийг мэдээлсэн. Гэвч үүнийг хөрс хөндөгдсөнөөс болоогүй гэдэг дүгнэлтийг МХЕГ-ын газрын дарга өөрийн амаар хэлсэн. Барилга хазайсан тухай олон хүний янз бүрийн тайлбар сонссоор “толгой нь эргэсэн” Э.Бат-Үүл дарга сүүлдээ “Иргэд нь болохоор барилгын суурь нүх ухсан зүүн тал руугаа манай байр хазайгаад байна гэсэн. Та нар болохоор тийм биш ээ, харин ч баруун тал руугаа хазайлттай байна гэх юм. Баруун, зүүн тийшээ хазайх нь ямар хамаатай юм бэ. Хамгийн гол нь хэзээ, юунаас болж хазайсныг харьцуулан тогтоох хэрэгтэй биз дээ. Гэтэл хэзээ гэдгийг тогтоох боломжгүй гээд сууж байдаг” гэж бухимдаад авсан.

Эхнээсээ сүр дуулиан болгож 16-р байрыг хэзээ мөдгүй нурлаа хэмээн олон нийтэд мэдээлчихээд араас нь “Танай байр зүгээр байна аа, орж болно” гэхэд асуудал намжина гэвэл эндүүрэл. Монголын барилгын салбарын эмгэнэл болох газрын наймаа, хувийн хэвшлийнхэнийн бизнесийн сүлжээ, ил, далд хууль бус үйлдэл, дүрэм журмыг дуртай нь зөрчдөг үйлдлээ үүгээр зогсоох хэрэгтэй.  Өнөөдрийг хүртэл 240 гаруй хүн зочид буудалд байрлаж байгаа. Бэхэлгээг хийж дуустал оршин суугчид гэртээ харих боломжгүй юм. 

Ийнхүү барилгын салбарын "эмгэнэл"-ээ зарлаж буй нь тод жишээ болсон үйл явдал дуусахгүй нь ээ. Анхнаасаа зөвшөөрөлөө ном журмаар нь аваад хотын зах руу дулаан тохилог орон сууц барьж худалдсан бол ашигтай байх байсан биз. Хуулиа гууль болгодог улс өдөрт 240 гаруй хүнийг хооллож ундалаад буудлынхан мөнгийг төлөхгүй яахав. 

Энэ байрны асуудлыг шийдээгүй байхад дахиад л байшин барих зайгүй газар барилга барихаар нухаа ухчихсан байна. Газар олголтын балаг дуусахгүй үргэлжилж буй нь түгшүүр дагуулж байна гэхэд буруутахгүй. Оршин суугчид гадаа нарлах саравчгүй болж, хүүхдүүд тоглох ч эрхгүй гэртээ бүгэх болж байгаа нь харамсалтай. Хотын мээрээ энэ нийслэл хотынхоо газар олголтыг зогсоовол яасан юм. Гэхдээ, иргэдэд олгож буй 0.7 га газар олголтыг хэлээгүй юм шүү. Зах замбараагүй эрх мэдлээ ашиглан мөнгөний төлөө хийж буй үйлдлийг зогсоож өгөөч. 

Аягүй бол дээрх 16-р байр шиг олон янзын тайлбар гаргаж ирээд таны толгойг эргүүлсэн яриагаа ахиж ярьж мэднэ. Учир нь дараагийн асуудал дагуулах барилгын ажил хэдийнээ эхэлж. Иргэдийн эрх ашгийг боомилж байна. Анх гарааш барина хэмээсэн нь дөрвөн давхар үзвэрийн танхим барихаар барилгынхаа суурийг ухаж эхэлжээ. 

Тодруулбал, Чингэлтэй дүүргийн тавдугаар хорооны нутаг дэвсгэрийн 9А байрны хажуу бөөрөнд барилгын суурь ухаж эхэлжээ. Уг газарт “Улаанбаатар синема” буюу тэнгис кино театрынхан барилгынхаа өргөтгөлийг хийхдээ зэргэлдээх орон сууцанд оршин сууж буй олон арван иргэдийн амгалан тайван байдал болоод эрүүл орчинд аж төрөх эрхийг бүдүүлгээр зөрчиж эхэлсэн байна.

Тус байрны оршин суугчид барилгын ажил эхлүүлэх зөвшөөрөлгүй гэдгийг нотолж байгаа юм. Хууль бус энэхүү үйлдлийг зогсоохыг тус компанийн удирдлагууд болоод дүүргийн эрх мэдэлтнүүдэд удаа дараа ханджээ. Харамсалтай нь, эрх мэдэлтнүүд болон “Улаанбаатар синема” компанийнхан оршин суугчдын эсэргүүцлийг огтхон ч сонсоогүй мэт аашилж байгаа нь Монгол улсын хуулийг уландаа гишгэж буй хэрэг. 

Өнгөрсөн оны наймдугаар сард анх барилгын суурь ухаж эхэлсэн бөгөөд суурийн нүх 9А байрнаас гурван метрийн зайтай байсан өдгөө орон сууцны хананд тулгаж ухжээ. Оршин суугчдын хувьд гомдлоо нийслэлийн удирдлагууд болон мэргэжлийн хяналтын байгууллагад гаргасан ч  хариуг өнөөдрийг хүртэл өгөөгүй байгаа аж. Хэзээ энэ хууль бусаар байшин босгодог залилангаа хэзээ зогсоох вэ. Иргэдийг барилгын компанийхан хамгийн ихээр хохироодог. 

Иргэд нарлах газаргүй болж, мөд Зайсан толгойд ч салхилж амрах эрхгүй болох гэж буй талаар өмнө нь мэдээлсэн. “Жи эн Моторс Тур” ХХК хууль бус үйлдлээ зогсоохгүй байхаар шийдэв үү Мөнгөтэй хүнд хууль үйлчилдэггүй, түрүүвч нимгэн хүнд хууль хатуурхдаг нийгэмд бид амьдраад байгаа бололтой. 

-Ой тогтоолтын ОУ-ын аварга Т.Энхжин “дэлхийн рекорд” -ыг эвдлээ-

Ой тогтоолтын ОУ-ын аварга Т.Энхжин "Images" төрөлд ДЭЛХИЙН РЕКОРД тогтоолоо.  Тодруулбал, АНУ-ын Сан Диего хотод энэ амралтын өдрүүдэд болсон ой тогтоолтын олон улсын аварга шалгаруулах “Extreme Memory Tournament”  тэмцээний "Images" буюу дүрс чээжлэх төрөлд тэрбээр өрсөлдөж 30 дүрсийг ердөө 14 секундэд чээжлэн алдаагүй нэрлэснээр төрөлдөө тэргүүлээд зогсохгүй 2000 ам.долларын шагнал хүртсэн юм.

Түүний дасгалжуулагчаар Б.Баасандорж ажиллажээ. Тус тэмцээн дэлхийн шилдэг 24 тамирчны дунд явагдсан, 76000 ам.долларын шагналын сантай аж. Манай улсаас Монголын Оюун Ухааны академийн таван тамирчин, дасгалжуулагч, шүүгчийн хамт оролцсон юм. Дэлхий дээд амжилт тогтоосон Т.Энхжингийн хувьд тус тэмцээнд оролцохоор шалгарсан хамгийн залуу, 17 настай тамирчин билээ.

-ХААН банканд Монголын аж ахуй нэгжүүд “залгиулж байна”-

Hunnu.mn вэб сайт ХААН банк шүүгч нарт орон сууцны зээл олгодгоороо далимдуулан шүүхийн шийдвэрт нөлөөлөх бичгийн Дээд шүүхэд гаргаж өгсөн баримтыг дэлгэсэн билээ. Тэд үйл ажиллагаагаараа шүүгч нарыг “барьцаалж” өөрт ашигтай шийдвэрүүдийг гаргадаг байна. Хуулийн байгууллагынханы хэлж буйгаар бол шүүх хуралд ХААН банк нэг ч удаа ялагдаж байгаагүй гэх. Магадгүй энэ нь ийнхүү шүүгч нарт нөлөөлдөгтэй холбоотой байж ч болох.

Тиймээс л шүүгч нарын цалингийн асуудал яригдаж, шүүгч нарын нийгмийн асуудал хүнд, орон сууц, хашаа байшингийн зээлтэй байдаг учраас нөлөөлөлд автаж, шударга бус шийдвэр гаргаж байна гэх үгс яригдах болсон байна. ХААН банк Нийслэл Улаанбаатар болон бүх 21 аймгийн бүх суманд салбартай. Малчид ХААН банкнаас малаа барьцаалан зээл авч, зээл болон зээлийн хүүгээ төлж чадахгүй хотоо харлуулж буй тухай өмнө нь хэд хэдэн удаа чих дэлсэж байсан боловч тэгс гээд л нам дарагдсан юмдаг.

Харин энэ удаад бид олон нийтэд хэрэгтэй эмчилгээний бүтээгдэхүүн үйлдвэрлэж буй аж ахуй нэгж ХААН банкны башир арганд унаж, эцэстээ хохирч, олон жилийн турш асуудлаар шийдвэрлүүлэхэр шүүхээр явсан боловч, эцэстээ хөрөнгөө хураалгахад тулаад буй хэргийн тухай цуврал баримтыг дэлгэхээр төлөвлөөд байна. Эндээс бид Монголын шүүх байгууллага шударга ажиллах нөхцөл боломжгүй болсоныг харж болно. Мөн ХААН банкнаас аж ахуй нэгж, үйлдвэрлэл эрхлэгчийн үйл ажиллагааг дэмжихээсээ илүүтэйгээр хөрөнгийг нь, оюуны бүтээлийг нь дээрэмдэх “Дээрмийн” ажиллагаа явуулдаг болохыг ч болж мэдэж болох юм. Монгол улс үйлдвэрлэгч орон болохгүй бол болохгүй нь гэх үгийг Эдийн засагч, Улстөрчид бүгд л хэлдэг. Гэвч тэдний энэхүү үг хий хоосон үг болох нь амьдрал дээр нотлогдсоор л... Үнэхээр брэнд үйлдвэрлэе. Импортыг орлох бүтээгдэхүүнүүдийг бий болгоё гэж үнэн сэтгэлээсээ хүссэн бол үйлдвэрлэл эрхлэгчдээ ХААН банк гэх “мангасын аманд аваачиж тарчлаахгүй л байх байсан” биз.

Ирэх долоо хоногт бид “Сэлэнгэ хангай” ХХК, “Мон Апи” ХХК болон ХААН банк гэсэн гурван байгууллагын дунд үүсээд байгаа маргааны талаар дэлгэрэнгүй мэдээллэж, баримт дэлгэж, хэргийг төрийн байгууллагууд хэрхэн чирэгдүүлж буй тухай цувралынхаа нэгдүгээрхийг хүргэх болно. Ямар байгууллагыг ХААН банк, шүүх хоёр дундаа хавчин дампууруулж, ард түмэнд хэрэгтэй үндэсний үйлдвэрлэлийг хэрхэн нурааж буйг харуулах болно. Монголын брэнд ярьдаг, импортыг орлох бүтээгдэхүүнийг “амаараа мөрөөдөгчид” бидний цуврал нийтлэлийг уншиж, нэгийг бодож, хоёрыг тунгаана гэж найдъя.

Н.Чинзориг  /Эх сурвалж: www.hunnu.mn/

 

-Ц.Оюундарь: Надад мэдэгдэхгүйгээр програм эвдэж захиалгат нэвтрүүлэг гаргахыг үзэв-

Дэлхийн хэвлэлийн эрх чөлөөний өдөр МҮОНТ-ийн телевизийн эфирийн программыг өөрчилж, захиалгат нэвтрүүлэг гаргажээ. Энэ тухай МҮОНРТ-ийн ерөнхий захирал Ц.Оюундарь “Твиттер” хуудсаараа дамжуулан мэдээлсэн юм. Тэрбээр энэхүү үйлдэлд УИХ-ын дарга З.Энхболдыг буруутгасан байна. Тодруулбал, тэрбээр “ОНРТ тэнцвэртэй мэдээлэл гарга гэдгийг З.Энхболд та дандаа тавьдаг. Хянах нэг арга нь хөтөлбөр батлах явдал! Дураар эвдээд байвал хянах аргагүй!”, “Батлагдсан хөтөлбөрийг эвдэнэ гэдэг эфирийн хуулийг ноцтой зөрчсөн гэсэн үг! Ийм ч учраас хууль тогтоогч З.Энхболдод постоо mention хийсэн юм”, “Дэлхийн хэвлэлийн эрх чөлөөний өдрөөр супер сюрприз барьсан З.Энхболд, Д.Энхтуяа нартаа баярлалаа!” “Хэвлэлийн эрх чөлөөний өдрийн "бэлэг"-Эрдэнэс ТТ захиалгат нэвтрүүлгийг надад мэдэгдэхгүйгээр програм эвдэж MNB-гээр гаргахыг үзэв” гэх зэргээр жиргэжээ. Ямартай ч тухайн өдрийн эфирийн программд ҮОНТ-ийн захирал Д.Энхтуяа өөрчлөлт оруулсан гэнэ. 

Баримтыг эндээс 
 

-Африкийн хүүхдүүдэд хайр түгээсэн Монгол бүсгүй-

М.Эрдэнэхүү гэх энэ бүсгүй өөрийн сайн дураар Африкийн хүүхдүүдэд тусалсан байна. Хүнд тус мундахгүй. Хэдийгээр  өлсгөлөн, өвчин зовлонд нирвэгдсэн хүүхдэд эм тариа, хоол хүнс чингэлэг чингэлэгээр нь ачиж очихгүй ч тэдэнд  сэтгэлийн дэм, амьдрах итгэл өгнө гэдэг сайхан.

Тэрээр энэхүү  сайн үйлс, үйл хэрэг, үзэл бодлоо өөрийн цахим хуудсаараа дамжуулан хуваалцсан байна. Товчхон сийрүүлвэл, Монголчууд бид азтай. Би Африкт хөгжлийн бэрхшээлтэй хүүхдүүдтэй  7 хоногт хоёр удаа ажиллаж байлаа. Зүгээр тэдтэй инээлдээд тоглоод л. Тэр хүүхдүүд хоолгүй, ДОХ-ын вирустэй болохоор бие нь улам мууддаг. Тэдний бие өдөр ирэх тутам муудаж байгаа нь маш хэцүү. Зарим хүүхдийн ээж 13-15 насныхан. Монголын эрүүл мэндийн чиглэлээр төгсч байгаа залуус энэ мэт өөр улс орноор явж сайн дурын ажил хийж мэдлэгээ улам дээшлүүлээсэй гэж бодож байна. Би эмч биш, эрүүл мэндийн салбарын ажилтан ч биш. Монголд хөгжлийн брэхшээлтэй хүүхэд болно өвчтэй зовлонтой хүүхдүүдтэй ойр ажиллаж байсан. Мөн би өрх толгойлсон ээж байсан болохоор ийм эцэг эхчүүдэд чадлынхаа хэрээр туслахыг боддог. Би өөрийн жижиг компанийн хажуугаар олсон хэдээсээ иймэрхүү зүйлд зарцуулдагтаа үнэхээр сэтгэл ханамжтай явдаг. Машин авахын төлөө, гоё гар утас барихын төлөө биш сэтгэл санаа, мэдлэгээрээ баян байгаасай гэж хүсдэг. Манай залуучууд нэг үеэ бодвол сайн үйлс их хийдэг болж байгаад би бахархаж байна. Монголчууд минь цайлган сайхан сэтгэлтэй ард түмэн хэмээн сэтгэгдлээ хуваалцсан байна.

Үнэхээр түүний хүсэж байгаа шиг монголчууд бие биенээ хайрлаж, сайхан сэтгэлийг түгээж байх болтугай.

Гэрэл зургуудыг эндээс 

-Б.Жаргалсайхан цагаасаа хоцорч, сэтгүүлчид гар хүрчээ /бичлэг/-

“Ийгл Ньюс” телевизийн энэ сарын 1-ний “Зочны цаг”-т ярилцлагад БНН-ын дарга Б.Жаргалсайхан оролцох байжээ. Гэтэл тэрбээр цагаасаа 30 минут хоцорч ирсэндээ уучлалт гуйх нь бүү хэл асуудал үүсгэж сэтгүүлчид гар хүрчээ. 

Тухайн өдрийн 17:00 цагт ээлжит “Мэдээний өрөө” хөтөлбөр эхлэх байсан тул 30 минутын ярилцлага явуулах боломжгүй болсон гэдгийг Б.Жаргалсайханд тайлбарлаж хэлсэн боловч студид ийнхүү танхайрчээ. Улс төрд ороод олон жил болж буй хүн телевизийн эфир тодорхой цагийн хуваариар явагддаг гэдгийг мэддэг баймаар. 

-“Хөсөгтөн” хамтлаг сүүлийн шатанд шалгарч үлдлээ-

Asia s got talent шоуны сүүлийн шат өчигдөр орой болж Хөсөгтөн хамтлаг дахин шуугиан дэгдээж чадлаа. Сүүлийн шатны санал асуулга 5 сарын 11-ны 23:59 цаг хүртэл явагдах бөгөөд Элэг нэгт Монголчууд та бүхэн саналаа идэвхитэй өгөөрэй ‪‎Asias Got Talent‬ -д санал авах 3 төрлийн боломж бий.

Asias Got Talent‬ -д санал авах 3 төрлийн боломж бий. 

Үүнд:
1. Малайз, Сингапур, Филлипин, Вьетнам, Тайвань, Энэтхэг, Хонг Конг, Индонез, Тайландад амьдардаг бол AGT12 гэж мессеж бичин санал өгөх ба санал өгөх дугаарыг доорхи хаягаар орон харна. http://asiasgottalent.tv/vote/
2. Фэйсбүүкийн AsiasGotTalent -н хуудсан дээрх апп -г ашиглан өгнө.http://www.facebook.com/asiasgottalent/app_1598372720404428 Энэ хаягаар нэвтрэн ороод Khusugtun гэж сонгоод саналаа өгөх бөгөөд найзуудаа бас уриарай. 
3. Та ухаалаг утастай бол "Asia's Got Talent" гэсэн апп -г утсандаа суулган Khusugtun гэж сонгоод саналаа өгөх юм. Эсвэл http://fbvotenow.asiasgottalent.tv/ энэ хаягаар өгөөрэй 

-Азийн аварга болсон Э.Бэхбаяртаа баяр хүргэе!-

Олон улсын хэмжээний мастер Э.Бэхбаяр Азийн аварга боллоо. Тэрбээр Катарын Доха хотноо зохион байгуулагдаж буй бөхийн чөлөөт барилдааны 57 кг-ын жинд хүч үзсэн юм. Манай тамирчин дэлхийн оюутны аварга Японы Ф.Моришитаг 5-0, Азийн АШТ-ий хүрэл медальт Энэтхэгийн Рахул Аварег 8-5, Инчон-2014 Азийн наадмын аварга Ардчилсан Солонгосын Жон Хак Жинийг 3-2, дэлхийн оюутны Универсиад наадмын дэд аварга Кыргызстаны С.Надырбек-Улуг 4-1 оноогоор ялж Азийн аварга боллоо. Э.Бэхбаярт болон түүний багш дасгалжуулагч, Монгол Улсын гавьяат тамирчин А.Энхээ, олон улсын шүүгч Л.Болормаа нарт баяр хүргэе.

 

Тоймыг бэлтгэсэн: Х.Даваа