Нийслэлийн 2015 оны шилдэг тохижилт, ногоон байгууламжтай, цэмцгэр аж ахуйн нэгж, байгууллага шалгаруулах болзолт уралдааy зарлагдаад байгаа. Уралдааны хүрээнд нийслэлийн хэмжээнд байгуулагдсан 51 ажлын хэсгээс аж ахуйн нэгжүүдийн цэвэрлэгээ тохижилтод  хяналт тавьж, үнэлгээ өгч эхэлсэн байна. 

Үнэлгээний багийнхан эхний ээлжинд аж ахуйн нэгжүүдэд тохижилт, ногоон байгууламж, цэвэрлэгээгээ сайжруулах хугацаат үүрэг өгч,  хэрэгжилтийг 14 хоног тутам шалгаж тохижилтыг нь үнэлсэн наалт нааж байгаа. 

Одоогийн байдлаар Хан-Уул дүүргийн хоёрдугаар хорооны “Туул” сууц өмчлөгчдийн холбоо, Баянгол дүүргийн 12 дугаар хороод хангалттай гэсэн үнэлгээ авснаар  "Баярлалаа" гэсэн бичиг бүхий  инээмсэглэж буй хүний дүрс үүдэндээ наалгаад байгаа юм. 

Харин Хан-Уул дүүргийн Хаан банкны Жаргалан салбар гадна орчноо цэвэрлээгүй, үүдний довжооны наалт  нь ховхорсон, байшингийн нь эргэн тойрон угаагаагүй, бэлэн мөнгөний машины гадна дотор тал үзэмжгүй, шаардлага тавьсан ажлын хэсгийнхэнийг эсэргүүцэж зохисгүй авир гаргасан тул хангалтгүй үнэлгээ авсан.

Хангалтгүй үнэлгээ авсан аж ахуйн нэгжүүдэд “гахай”-ны дүрс бүхий тохижилт муутай бохир байгууллага гэсэн наалт наасан бөгөөд уг наалтыг  Хан - Уул дүүргийн 2 дугаар хороо “Цайны зам трейд”-ын дэлгүүр, караоке, ресторан цэвэрлэгээ муутай байсан тул мөн авсан гэж Улаанбаатар хотын захирагчийн албанаас мэдээллээ.