“Мөнх тэнгэр оньс” ТББ-аас Их эзэн Чингис хааныг тодруулан залах ёслол, цэнгүүнийг Төв цэнгэлдэх хүрээлэнд эхэлжээ. Ёслол үнэ төлбөргүй болох бөгөөд оролцсон хүн бүр эрт үед өөрийнхөө ямар хүн байснаа мэдэж болох гэнэ.  Одоогоор зохион байгуулагчид Чингис хааны сургаалыг уншиж байгаа бөгөөд хойд дүр тодорсны дараагаар хааны дагалдагчид, ойр дотнынхон, хамгаалагчдыг тодруулж, тамгалах зан үйл хийх талаар мэдээлэл байна.  Ёслолыг зохион байгуулагчид өөрийн цахим хуудаснаа  “Их Эзэн Чингис хаанаа залан буулгах тул Монголчууд бүгдээр баярлан угтаж, идээ ундаагаа дээдлэн баясаж, эцэг өвгөдийн буянаар эрин зуунд тохиож буй энэ сайхан өдрийн хишиг буяныг нь хүртэж, эрч хүчээ нэмж, гал голомтоо тэтгэн газар дэлхийнхээ хайр энэрлийг гэрэлт их тэнгэр бүхний хувь хишиг бүхнийг үр ач, өргөө гэртээ өргөж бүгдээр дээдлэн аваарай. Үүний тулд өөр өөрийн харсан тэнгэр, өвөг дээдэс бүхэндээ сайн сайхны ерөөлийг дуулгаж, овог нэрээ хэлэн сүү, идээ будааныхаа дээжийг өргөж, эзэн их хаанаа дагаж үерлэн буух тэр их хувь хишгээс хүртэж авахыг хичээх хэрэгтэй” хэмээн уриалж байсан.