Өчигдөр АН МАН-ын 6 сайдыг огцрууллаа. Ингэхээр тэдний орны сайдуудыг хэрхэн томилох вэ, хэн байх вэ гэдэг асуудал анхаарал татаж байна.

 

 

ИЗНН, БИЕ ДААГЧДАД САЙДЫН СУУДАЛ ӨГӨХГҮЙ

 

Тэгвэл АН-ын гишүүд сайдуудыг зөвхөн дотроосоо буюу гишүүдээсээ л бүрдүүлнэ гэсэн байр суурьтай байна. Бүр ИЗНН, бие даагчдыг энэ суудал руу дөхүүлэх ч ёсгүй гэсэн шийдэл зүйл саарал ордонд яригджээ.

 

УИХ-д АН-ын 34 гишүүн, Шударга ёс эвслийн 11 гишүүн сууж байгаа. Тэгэхээр нийт 45-уулаа учраас АН өөрсдийгөө үнэмлэхүй олонд тооцож, хоёрхон суудалтай ИЗНН, гуравхан бие даагч мэтийн хүмүүст суудал өгөхгүй гэсэн шийдвэр гаргаад байна.

 

Тиймээс ИЗНН болон бие даагчид МАН-тай нийлж сөрөг хүчний үүрэг гүйцэтгэх таамаг харагдаж байгаа юм.

 

АН ДОТОР ИЙМ ТОХИРОЛЦОО ЯРИГДСАН Ч ЭЦСИЙН ШИЙДЭЛД ХҮРСЭНГҮЙ

 

Саарал ордны эх сурвалжийн мэдээлснээр зургаан сайдын 5 нь АН-аас, 1 нь Шударга ёс эвслээс байхаар тохирсон байна. Хэлэлцсэн ёсоор бол Э.Батшугар Шадар сайдаар, А.Бакей БОАЖНХ-ийн сайдаар, Б.Зоригт Барилга хот байгуулалтын сайдаар, Б.Гарамгайбаатар Сангийн сайдаар, Г. Баярсайхан Зам тээврийн сайдаар, Л.Эрдэнэчимэг Хөдөлмөрийн сайдаар сууна гэсэн яриа хийж. Ямар ч байсан АН 5 сайдаа гишүүдээсээ томилох юм байна.

 

Эд нар дээр нэмэгдээд М.Батчимэг гэдэг хүний нэр яригдаж байна. АН-ын гишүүд өчигдөр шөнөжингөө сайдуудад хэн суух вэ гэдэг асуудлыг хэлэлцэж ийм дүр зураг гаргасан ч эцсийн байдлаар тохирч чадаагүй байна.

 

Тэгэхээр өнөөдөр 6 сайдын нэрийг зарлаж амжихгүй бол АН-ын гишүүд хагас, бүтэн сайн өдрүүдэд дахин энэ асуудлаар хэлэлцэх ёстой.

 

Харин ИЗНН болон бие даагчдад МАН-аас суусан 7 дэд сайдын суудлыг өгье гэсэн санал АН дотор яригджээ. Тэгэхээр ИЗНН нэмж нэг дэд сайд тавих эрхтэй болж байгаа юм. Харин бие даагчдын хувьд бухын доодох харж үнэг турж үхнэ гэгчээр дэд сайд хийж онигоонд орохгүй нь ойлгомжтой юм.

 

ЕРӨНХИЙЛӨГЧ ХОРИГ ТАВИХ УУ?

 

Ерөнхийлөгч Ц.Элбэгдорж сайд нарыг гаднаас томилох нь зүйтэй гэдэг байр сууриа илэрхийлсэн. Гэтэл АН дотроосоо томилно гээд байна. Тэгэхээр сайдуудыг давхар дээлтэй байлгах эсэх асуудлыг Ерөнхийлөгчтэй хэлэлцэхэд хүлээж авахгүй байх гэсэн хүлээлт өндөр байгаа юм. Тэгэхээр давхар дээлтэй сайд нарыг томилох асуудал сунжрах нь ойлгомжтой боллоо.  

 

АН 2016 ОНД ХЭЛЭХ ҮГГҮЙ БОЛОХ ВИЙ

 

МАН-ыг Шийдлийн засгийн газраас хөөсөн асуудал сонгуулийн өмнөх улстөрийн хамгийн том үйл явдлуудын нэг болж, АН-ын нэр хүндийг ч шалан дээр өнхрүүлж эхэллээ.

 

Н.Алтанхуяг намын дарга байхдаа МАН-аас бусдыг засагтаа урьж байсан. Харин З.Энхболд зөвхөн өөрсдийгөө аваад бусад гурвыгаа жийж байна. Эндээс АН-ын дарга нарын хандлага, улс төрийн ноён нуруу хэнийх нь илүү болохыг харж болохоор байна.

 

АН хамтрагчаа хөөх шийдвэр гаргаж, тэдний оронд гишүүдээсээ сууна гэснээр арай л  дэндүү улайрч байгаагаа батлаж байна. Засгийн газарт ганцхан Шударга ёс эвсэл л хамт байхад болно хэмээн үзэж буй нь АН-ын бусдад юмаа өгөхгүй, ганцхан өөрсдөө хувааж иднэ гэсэн занг ил гаргачихлаа.

 

АН өмнө нь МАН-тай нийлж дан дээл, давхар дээлний асуудлыг ихээхэн дэвэргэж байсан. Тухайн үед үндсэн чиглэлийн дөрвөөс бусад яамны сайд нь дан дээлтэй байх ёстой хэмээн шүүмжилж байв. Гэтэл бүлгийнхээ хуралдаанаар давхар дээл өмсөцгөөе гээд шийдчихсэн.

 

Магадгүй 2016 онд МАН олонх болоод сайд нараа бүгдийг нь дотроосоо томилно гээд дайрчихвал АН хэлэх үггүй, үг дуугарах нүүргүй болохоо мэдэж байгаа болов уу?

Д.Идэр

www.24tsag.mn