Төсвийн хэмнэлтийн бодлогыг хэрэгжүүлж байгаатай холбогдуулан Монгол улсын Засгийн газраас төрийн өмчит болон төрийн өмчийн оролцоотой компани, төрийн өмчит үйлдвэрийн газруудад хэмнэлтийн бодлогыг дараах чиглэлүүдэд хэрэгжүүлэх тухай албан тоот хүргүүлсэн байна. Ажлын байрны давхардлыг арилгаж, орон тоо нэмэхгүй, сул чөлөөтэй орон тоонд томилгоо хийхгүй байх замаар цалингийн зардлыг өсгөхгүй. Захиргааны болон удирдлагын зардлыг бууруулж, салбар, нэгж, төлөөлөгчийн газар шинээр байгуулахгүй байхын зэрэгцээ шаардлагагүй засвар, тохижилт хийхгүй байх зарчмыг баримталж ажиллахыг үүрэг болгожээ. Мөн аялал, зугаалга, урлагийн наадам, уралдаан тэмцээн санхүүжүүлэхгүй байх, байгууллагын ой, баяр, ёслол, тэмдэглэлт өдрүүдийг тэмдэглэхгүй байх, хууль, тогтоомж болон түүний хэрэгжилтийг сурталчилахаас бусад зорилгоор хэвлэл мэдээллийн хэрэгслээр төлбөртэй зар сурталчилгаа явуулах, бэлэг дурсгал, мэндчилгээ илгээх, хандив өгч ивээн тэтгэхийг хориглосон байна. Гадаад, дотоодын томилолт, бараа, ажил, үйлчилгээний зардлыг бууруулах, хот доторх үйлчилгээнд том оврын, туулах чадвар өндөртэй, шатахуун их зарцуулдаг автомашин ашиглаж үргүй зардал гаргахыг таслан зогсоохыг мэдэгджээ. “Эрдэнэт үйлдвэр” ХХК-ийн Ерөнхий захирлын тушаалаар ажлын хэсэг байгуулагдаж, Төрийн өмчийн хорооноос ирүүлсэн албан бичгийн дагуу арга хэмжээ авч эхэллээ. Тус үйлдвэр нь зэсийн үнийн уналттай холбогдуулан хямралын эсрэг арга хэмжээний төлөвлөгөөний дагуу дээрх чиглэлүүдэд хэмнэлтийн бодлогыг хэрэгжүүлэн ажиллаж байсан юм.