Орон гэргүй, архины хамааралтай эсвэл шоронгоос суллагдсан хүмүүсийг хүмүүжүүлэхийн зэрэгцээ нийгэмшүүлж байгаа ТББ-ын нэг нь “Зөв амьдрах ухаан”. Тус байгууллага төрийн байгууллагатай гэрээ хийж, үйл ажиллагааг тодорхой хэмжээгээр санхүүжүүлэх тохироо хийгдсэн байдаг. Гэтэл санхүүжилт өгсөн өгөөгүй, өгнө өгөхгүй хэмээн сүүлийн үед маргаан гарч байгаа. Энэ талаар маргалдагч талууд дараах тайлбарыг өгч байна.

НЗДТГ:

Нийслэлийн шинэчлэлийн баг ажлаа авсан цагаас эхлэн иргэд рүүгээ чиглэсэн олон ажил хийсний нэг нь “Орон гэргүй тэнэмэл иргэд”-ийг нийгэмшүүлэх төрийн үйл ажиллагааг төрийн болон төрийн бус байгууллагуудаар гүйцэтгүүлж, санхүүжилтийг шийдвэрлэсээр ирсэн. Анх 2013 оны 2 дугаар сард Нийслэлийн Цагдаагийн газраас/тухайн үеийн нэршил/ нэр бүхий 60 иргэнийг тус ТББ-д хүлээлгэж өгөхдөө 4 сарын хугацаатай гэрээ байгуулан доорхи задаргаа бүхий зардлыг шилжүүлжээ.

2013 оны 8 дугаар сараас Нийслэлийн Засаг даргын Тамгын газар гэрээг үргэлжлүүлэн Хүн ам нийгмийн хамгааллын сайдын 2012 оны А/51 тоот тушаалын дагуу нэг үйлчлүүлэгчийн хоногийн зардлын хэмжээг 9000 төгрөгөөр тооцож, гурван жилийн хугацаанд нийт 373 666 000 төгрөгийг тус байгууллагад шилжүүлээд байна. Үүнд дээрх Цагдаагийн газрын санхүүжилт тусдаа байна.

Анх Нийслэлийн Цагдаагийн газраас хүлээлгэн өгсөн нэр бүхий 60 хүнээс одоо тус төвд 17 иргэн л бүртгэлтэй байгаа ч НЗДТГ-аас санхүүжилтийг бүтнээр нь өгсөн ажээ. Улмаар Засгийн газрын 2015 оны 377 дугаар тогтоолоор хэмнэгдэх боломжтой нийгмийн халамжийн зарим тэтгэмжийг танах зөвлөмж өгсний дагуу 2015 оны 2,3 дугаар улирал буюу урин дулаан цагийн санхүүжилтийг өгөх боломжгүй болсон бөгөөд хүйтэн сэрүүний улирал эхэлсэнтэй холбогдуулан энэ оны 4 дүгээр улиралын 40 500 000 төгрөгийн санхүүжилтийг шийдэж өгсөн ажээ. Нийслэлээс нийгмийн халамж шаардлагатай иргэдийн эрхийг хамгаалах, орон гэргүй иргэдийг нийгэмшүүлэх зорилгоор Нийслэлийн Засаг даргын ивээл дор байгуулсан “Хүүхэд, залуусын сургалт хүмүүжлийн тусгай төв”, “Амьдрах ухаан” сургалт үйлдвэрлэлийн тусгай төв зэрэг төрийн, “Эгэл амьдралын мөр”, “Эрчүүд эрүүл гэр бүл”, “Зөв амьдрах ухаан”, “Заюу тайж” зэрэг ТББ-уудтай хамтран ажиллаж, хуулийн дагуу үйл ажиллагаанд нь дэмжлэг үзүүлсээр ирсэн. Төрийн бус байгууллага төрөөс дэмжлэг авч, хамтран ажиллах, төрийн зарим үйлчилгээг гэрээгээр хийж гүйцэтгэж болох ч Төрийн байгууллагыг дарамтлах, ажил үйлчилгээг тасалдуулах, төрийн албан хаагчдыг доромжлох, хууль эрхзүйн үндэс байхгүй хэмээн НЗДТГ-аас мэдэгдэж байна.

Харин энэ талаар “Зөв амьдрах ухаан” ТББ-ын тэргүүн Г.Загдаа арай өөр мэдээлэл өгч байна.