Нийтийн тээврийн маршрутад өөрчлөлт оруулж иргэдэд ихээхэн чирэгдэл учруулаад жил гаруйн нүүрийг үзэж байна. Өнөөдрийг хүртэл иргэд автобусанд чихэлдэж, хойноос нь гүйсээр суух нь энүүхэнд. Хүнгүй автобус гэж хотын төвийн чиглэлд тун ховор. Өглөө, өдөр, орой ч пиг дүүрэн зорчигчтой. Ажилдаа, гэр рүүгээ яарсан улс чихээд л суухаас өөр сонголтгүй. Хэзээ хүн багатай автобус ирнэ гэж хүлээх вэ дээ. Уг нь энэ чиглэлд олон автобус явж байгаа л гэдэг. Гэсэн хэдий ч ачааллаа дийлдэггүй. Хоёр, гурван буудлаа дундаа орхиж зорчигч авахгүй явж байж арайхийж хүн зөрөх зайтай болдог гэдгийг маршрут сольсон Э.Бат-Үүл даанч мэдэхгүй.

Өвлийн дэн хүйтэнд хөөрхийс дэм дэмэндээ наашаа ор, чи цаашаа бол ийшээ зогсчих нэг хүн ч болтугай оруулчих л даа гэж эхэнд орсон нь зохицуулагч хийсээр хавартай золгосон. Хүүхэдтэй хүн, ахмад настан, жирэмсэн эмэгтэйчүүд бол чихэлдээн дундаас арайхийж амьд гарна шүү дээ. Бас л нийтийн тээвэрт сууж үзээгүй нөхдүүд бол энэ зовлонг ойлгохгүй, мэдэхгүй.

Хуучин кондуктартай байхад хулгайн хэрэг гардаг байсан ч арай л бага байсан байх. Ядаж л орж ирсэн хүмүүстээ "цүнх, түрүүвч, утсаа болгоомжтой авч яваарай, хулгайн хэрэг гараад байгаа шүү" хэмээн анхааруулдаг байв. Гэтэл өдгөө хэнэг ч үгүй хүний цүнхнээс өөрийн эд зүйлсээ авч байгаа юм шиг чихэлдсэн олны дунд хулгайчид гаргууд ажлаа хийнэ. Автобус огцом тоормолзлоход уначихгүйн тулд гадуур хувцасны халааснаасаа гараад гаргаж бариулаас бариад буцаад утсаа авах гээд халаасандаа гар хийхэд л гар утсыг нь туучих явдал олонтаа гарна. Баахан хүнээс хэнийг нь гэж хардахав. "Би утсаа алдчихлаа. Хэн авчихав аа" гээд л эмэгтэйчүүд орилж нэг үзээд тусыг эс олно доо.

Уг нь автобусны маршрутын чиглэлийг өөрчлөөгүй байхад арай ч ингэж их хүнтэй чихэлдэж, явж байгаагүй юм шүү Хотын дарга аа. Ер нь хүнийг бэлгийн дарамтад оруулж байна гэж хэлж болохоор үйлдэл тэнд ч мөн үзэгдэнэ. Өөрөөр хэлбэл, бусдын биед энэ тэндээс нь барьж авах тохиолдолд бишгүй дээ л тохиолдоно. Тухайлбал, 5шар-Офицер чиглэлийн автобусанд суусан нэгэн охины араас 30 нэлээн гарч яваа болов уу гэмээр эр араас түлхээд л байж. Нөгөө эмэгтэй та арайхийж чихэлдсэн хүмүүсийн дундуур зөрж нөгөө эрээс холдоход араас нь ирээд л түлхээд амьсгаадаж байсан тухай сонсоод мэхэл гайхаж билээ. Энэ бол мэдээж бэлгийн дарамт буй хүчирхийллийн нэг хэлбэр. Бид хүсээгүй ийм төрлийн дарамтад эмэгтэйчүүд ихээхэн өртөж байна Нийслэлийн захирагчийн албаныхан.

Иймээс л автобусны маршрутыг хуучин хэвэнд нь оруулж төв чиглэлийн автобусны ачааллыг бууруулсан даргад хайр зарлах ч багадах биз ээ. Богино эргэлттэй болсон гэх ч хотын төвөөр дайрч яваа автобуснууд урт чиглэлээр яваад байна. Тухайлбал, Зүүнсалаа-Халдварт, 5 шар-офицер, ХМК-Офицер. Эдгээр чиглэлд хамгийн их эрэлттэй бөгөөд хүнээ багтааж суулгаж чаддаггүй. Хичнээн автобус дараалж ирээд ч нэмэргүй. Цас, бороотой өдөр бол бүүр ч хэцүүхэн. Маш их хүлээлгэж байж ирнэ.

Угсраа автобус нь гаднаас нь харахад дэмий гонзгой урт. Дотор нь ороод суухаар хүн ч зөрөхийн арга үгүй зай муутай Монголчууд тулдаа л зөрж, чихэлдэж яваа. ХМК-Офицер чиглэлийн монгол инженерийн бүтээсэн гэх ногоон автобус мөн л зай муутай. Хуучин бууны хугархай гэсэндээ Зүүнсалаа-Халдварт л хүн зөрөх зайтайгаараа овоо хэдэн хүнийг багтааж дөнгөнө.

 

 

Холбоотой мэдээ:

Автобус нь дахь тулаанд "Хотын дарга аа дуудья"

Дэн хүйтнээр иргэд автобус хүлээсээр л...

500 төгрөг & Бухимдал