Олон нийтийн цахим сүлжээнд "Монгол Улсын иргэн бүр гэр бүлийн тэтгэлэгт хамрагдах хүсэлтээ үнэ төлбөргүй авах боломжтой тул энэхүү албан боломжийг ашиглан хувийн мессежээр "Тийм" гэж бичээрэй. Амжилт хүсье", "Өнөөдөр 100 жилд нэг тохиодог азтай өдөр "Азтай" гэж бичсэн хүн бүр гэр бүлийн тэтгэлэгт үнэ төлбөргүй хамрагдах азтай байх болно, найзын хүсэлт илгээнэ үү", “Ялагч 5,000,000-аас 500,000,000 хүртэлх эргэн төлөгдөхгүй зээл хожих болно", "Иргэн бүр Төв банкны гэр бүлийн тэтгэлэгт хөтөлбөрт хамрагдах боломжтой тул чатаар мэдээлэл аваарай гэх мэтээр хуурамч хаягаас бичсэн мэдээлэлд иргэд олноороо “Тийм”, “Ок”, “Азтай”, “Мэдээлэл авъя” гэж хариу үйлдэл үзүүлж, хувь чатаар мэдээлэл солилцох хүсэлт тавьжээ.

Хил хязгааргүй цахим орчинд гадаад нэршилтэй хуурамч хаягуудаас иргэний хувийн мэдээллийг авч нэвтрэх нэр, нууц үг, цаашлаад банкны данс, карт зэрэгт хууль бусаар нэвтэрч иргэдийг залилах үйлдэл олон улсад өдөр бүр явагдаж байна. Монгол Улсад хууль ёсоор үйл ажиллагаа явуулж буй банк, санхүүгийн байгууллага хэзээ ч иргэд рүү олон нийтийн цахим сүлжээгээр холбоос линк, нэвтрэх нэр, нууц үг, бусад мэдээллийг авахыг хүссэн асуумж илгээж, харилцдаггүй болно.

Иймд энэ мэт хуурамч хаягаас ирж буй мэдээлэлд автахгүй байхыг цагдаагийн байгууллагаас сэрэмжлүүлж байна.