Гурван удаа допинг хэрэглэсэн нь баталгаажсан Улсын арслан Э.Оюунболд наадмын барилдаанд зодоглохоор салбар хороонд хандсан. Харин салбар хороо түүнийг "Арбитрын шүүхээр асуудлаа шийдүүл" гээд буцаасан гэгдэж буй.

Энэ хүрээнд Э.Оюунболдын нэхэмжлэлтэй МҮБХ-ны дэргэдэх хараат бус хорооны хуралдаан өчигдөр /2024.07.08/ болохоор товлогдсон. Тус хурлаар түүний барилдах эрхийг сэргээх эсэхийг шийдэх юм.

Үүнтэй холбоотойгоор түүний барилдах эрхийг сэргээлээ гэх мэдээлэл цацагдаж эхлээд буй.

Иймд тус асуудлаар МҮБХ-ноос тодруулахад, "Ийм мэдээлэл хэн өгч, хаанаас гараад байгааг мэдэхгүй байна. Э.Оюунболдын барилдах эрхийг сэргээгүй хэвээр байгаа. Учир нь хараат бус хорооны хуралдаан эхлээгүй байна. Тиймээс сэргээх шийдвэр гараагүй гэсэн үг. Албан ёсны мэдээллийг тус хороо хуралдааны дараа өгөх байх" гэсэн.

Харин хараат бус хороо өчигдөр орой хуралдсан ч эцсийн шийдвэр гараагүй байгаа тухай эх сурвалж мэдээллээ. Тодруулбал, 2024*07*09-ний 17 цагаас тус хороо шийдвэрээ танилцуулах аж. Иймд түүний барилдах эрхийг сэргээсэн гэх мэдээлэл худал болж таарч байна.