Нийслэлийн Сонгинохайрхан дүүргийн нутаг дэвсгэрт бага насны хүүхэд автомашинд мөргүүлж, эрүүл мэндээрээ хохирсон ноцтой осол бүртгэгджээ.

Тодруулбал, 2026 оны зургадугаар сарын 08-ны өдөр Цагдаагийн байгууллагад “Автомашинд хүүхэд мөргүүлчихлээ” гэх дуудлага, мэдээлэл ирсэн байна. Дуудлагын дагуу шалгалтын ажиллагааг явуулахад, “Делика” маркийн тээврийн хэрэгслийн жолооч хөдөлгөөнд оролцож байх үедээ, явган хүний гарцгүй хэсгээр зам хөндлөн гарч байсан 10 настай хүүхдийг мөргөж, гэмтээсэн нөхцөл байдал тогтоогджээ. Уг хэргийг одоогоор Тээврийн цагдаагийн албаны Мөрдөн шалгах хэлтэст үргжлүүлэн шалгаж байна.

Монгол Улсын Замын хөдөлгөөний дүрмийн 5.5 дахь хэсэгт хүүхдийн аюулгүй байдлыг хангах талаар дараах зохицуулалтыг тодорхой заасан байдаг. Үүнд Явган зорчигч нь 10 хүртэлх насны хүүхдийг замын хөдөлгөөнд харгалзаж явахдаа энэ дүрмийн 5.4-т заасны дагуу жагсаалаар авч яваагаас бусад тохиолдолд өөрөөсөө салгахгүй /хөтлөх, тэврэх, үүрэх, хүүхдийн тэргэнд түрэх гэх мэт/ авч явна гэж заасан байдаг.