Гэмт хэрэгт холбогдон шалгагдаж байсан хүмүүс хожим нь албан тушаалд томилогдсон тохиолдол цөөн­гүй байна. Хамгийн сүүлийн жишээгээр Шүүхийн ерөнхий зөв­лөлийн даргаар Д.Лүн­дэн­дорж томилогдож, И.Шастины нэрэм­жит нэгдсэн III эм­нэл­гийн даргын сон­гон шал­гаруулалтад Л.Баяр­цэцэг тэн­цээд байгаа юм. Мөн АТГ-ын дэд дарга Б.Хурц ч тэр дунд багтана.

 

ТАВАН ЖИЛИЙН ЯЛЫГ ГУРВАН ЖИЛИЙН АЛБАН ТУШААЛААР СОЛЬСОН НЬ

Согтуу жолооч хүн дайрч хөнөөсөн хэрэг хоёр жилийн өмнө гарч байв. Энэ хэргийн буруутан нь МУИС-ийн Хууль зүйн сургуулийн дэд захирал Д.Лүндэндорж байж. Муу үг модон улаатай гэдэг юм болохоор төд удалгүй тэр хүн Орос гуравдугаар сургуулийн захирал Ж.Со­ронзонгийн нөхөр, Ерөн­хий­лөгчийн зөвлөх юм бай­на гэсэн шуугиан дэг­дэв. Тэгж шуугисан шигээ гэв гэнэт л дуулиан намжсан. Согтуугаар машин жолоодсоноо “Зүрх муутай учраас долоогоны ханд долоосон” гэж тайлбарлаад ял зэмгүй мултарч байх үедээ “Манай шүүгчдийн чих их зөөлөн юм” хэмээн талархаж суусан. 

Хуулийн сургуульд олон жил багшилсан, олон хуульч төрүүлсэн багшийн хувьд энэ зэргийн юм ч байлгүй яах вэ. Өөртэй нь хамт МУИС-ийн Хууль зүйн сургуульд ажиллаж байх үеэс өмгөөлөгч С.Нарангэрэл түүний талаар таагүй сэтгэгдэлтэй явдгаа нэг бус удаа ярьж байсан.  Хүн дайрсан хэргийнх нь талаар хэвлэлд “Хүн алчихаад зүгээр мултрахад хуулийг урвуулан ашигласан хүн ядаж хэсэг дуугүй байж хуулийн салбарынхны нэр хүндийг хайрлаасай” гэж ярьсан нь бий. Д.Лүндэндорж ч нам гүм болсон. Харин одоо гэнэт гараад ирэхээр хүмүүс нөгөө хэргийнх нь тухай шуугиж эхлэв. ШЕЗ-ийн дарга, гишүүдийн томилгоо яригдахтай зэрэгцэн Д.Лүн­дэн­доржийн нэр сонсогдож, өөрөө ч ил гарч ирсэн. Одоо тэр ШЕЗ-ийн дарга болчихоод байна. Энэ хүн уг нь хоёр жилийн өмнө өдүүлсэн хэрэгтээ Эрүүгийн хуулийн дагуу 5-10 жилийн ял сонсох учиртай байж.

 

ЭРҮҮГИЙН ХЭРЭГТЭН ЭМНЭЛГИЙН ДАРГА БОЛОХ НЬ

Эмнэлэг, сургууль, цэцэрлэгийн дарга нарыг сонгон шалгаруулж тавих гэсэн журам байдаг болохоор Төрийн албаны зөвлөл хуулийн дагуу “тендер” зарлаж, эмнэлгүүдийн дарга нарыг сонгон шалгарууллаа. Сонгогдсон хүмүүсийн дунд эрүүгийн хэрэгт холбогдож байсан нэгэн багтсан нь Л.Баярцэцэг. Түүнийг И.Шастины нэрэмжит гуравдугаар эмнэлгийн даргаар томилох гэж байгаа. Гэвч тэрбээр өнгөрсөн онд өвчтөний түүх өөрчилсөн хэмээн хэрэгт татагдаж байв. Тухайн үед төрсөн ахынхаа ялыг хөнгөлөхийн тулд ингэсэн гэдгийг тогтоосон юм. Л.Баярцэцэг эмнэлгийнхээ төв сервер рүү нэвтэрч ахынхаа өвчний түүхийг эмнэлгийн эмч, лаборант нараар солиулсан нь хожим баригдаж, нөгөөдүүл нь шүүхэд үнэнээ өчсөн байдаг. Эрүүгийн хуулийн 245.2, 226-д зааснаар Л.Баярцэцэгт эрүүгийн хэрэг үүсгэн шалгаж байгаа юм. Түүнийг И.Шастины нэрэмжит гуравдугаар эмнэлгийн даргаар томилох тушаал гаргасан Эрүүл мэндийн сайд нь “Л.Баярцэцэгийг хараахан томилоогүй байгаа. Ерөнхийдөө тэр эмнэлгийн даргаар томилогдох эмч нарын жагсаалтын нэгдүгээрт жагсаж байгаа. АТГ, ЦЕГ-т бичиг хүргүүлсэн. Шалгаж байгаа нь үнэн гэсэн бичиг ирвэл түүнийг томилохгүй” гэжээ.

 

ХҮН ХУЛГАЙЛААД ДЭД ДАРГААР ТОМИЛОГДСОН НЬ

 

АТГ-ын дэд даргаар ажиллаж буй Б.Хурц өмнө нь хэд хэдэн хэргээр шалгагдсан гэх мэдээлэл байдаг. Тагнуулын ерөнхий газрын Сөрөх тагнуулын хэлтсийн даргаар ажиллаж байхдаа бусдаас хээл хахууль авсан, гүйцэтгэх ажлын хууль тогтоомж зөрчиж, тухайн үед Шадар сайдаар ажиллаж байсан М.Энхболд болон УИХ-ын гишүүн асан У.Барсболд нарыг хууль бусаар тагнаж чагнасан хэргээр албан тушаалаасаа чөлөөлөгдсөн. Гэхдээ тэр ажилгүй болчихоогүй, МИАТ-ийн Сөүл дэх ерөнхий төлөөлөгчөөр дэвшин ажилласан. Мөн С.Зориг агсны хэрэгт холбогдуулан Франц улсаас иргэн Д.Энхбатыг хулгайлж авчирсан гэх дуулиан ч нэмэгддэг. 2010 оны есдүгээр сарын 17-нд Англид очиход нь яг энэ хэргээр түүнийг баривчилсан байдаг. Хэдийгээр улсын даалгавраар явсан чекист гэдэг ч өөр улсын хууль журмыг зөрчсөн хэргээр Герман улсын шүүхээр шүүгдсэн нь бий.  Тэрбээр  2011 оны есдүгээр сарын 24-нд Германы шоронгоос суллагдаж, 28-нд Монголдоо ирээд, хоёр сар ч хүрэхгүй хугацааны дараа энэ албан тушаалд томилогдсон билээ.

 

Б.Оюунгэрэл