Монголын түүхэнд Ардчилсан намынхан анх удаа төрийн гурван өндөрлөгийг барьж байна. Амьдрал сайхан болно, гадны хөрөнгө оруулалт улам нэмэгдэнэ, хүнд суртал, авлига, хээл хахууль байхгүй болно гэж итгээд ард түмэн та нарыг сонгосон.

Яагаад гэвэл амьдрал ядуу байгаагийн гол буруутан нь коммунист угшилтай МАН гэж АН-ынхан байнга сурталчилдаг байв. Одоо харин амлаад байсан тэр сайхан амьдрал хаана байна вэ. Ард түмний амьдрал дээшилсэн үү. Та нар амласнаа хийж чадсан уу. Та нарыг харахад гурван биенээ огцруулах гэж дайн дажин үүсгэсэн хүмүүс л байх юм. Нэг нэг рүүгээ хэрүүлийн алим шидэхээс өөр бүтээсэн зүйл харагдахгүй байна. Хэрүүл, тэмцэлдээ тагнуул, цагдааг оруулж байна. Бүр сүүлдээ хэвийн ажиллаж байгаа утасны компанийг хүртэл татаад оруулчихлаа. Та нарыг дагаад ард түмэн хэд хуваагдан талцчихаад байна. Сүүлийн үед хийж байгаа ажлыг чинь харахад ийм л зүйл анзаарагдаж байгаа. Энэ бүх хэрүүл, тэмцлийн үр дүнд АН байхгүй болох юм биш үү. Ард түмэн чинь та нараас сэтгэл буруулах бус уу. Ингэж намаа баллаж хаячихаад дараа нь юугаараа улс төр хийх гээв. Намгүй болсон хойноо юугаараа бодлого барьж улс орноо хөгжүүлнэ, өөд татна гэж ярих гээд байгаа юм бэ. Та нар нэг намынхан. Үзэл санаа нийлэхгүй байгаа бол тэр хэрүүлээ дотроо ярьж болдоггүй юм уу. Заавал ингэж ард түмнийг талцуулан барин нийгэм рүү цацах хэрэг байна уу даа.

Эцэст нь хэлэхэд саяхан та гурав хоёр хөршийнхөө даргыг ирэхэд өөрсдийнхөө даргыг ирж байгаа юм шиг л хөл алдаад байсан. Эзэнгүй мэт байсан улс замаа засаад, мод суулгаад, талбайгаа угаагаад мөн ч их юм боллоо. Гэнэтхэн эзэнтэй улс шиг л болчихсон. Хөрш орнуудынхаа дарга нарын өмнө энийг ч хийнэ, тэрийг ч бүтээнэ гэж амлаад байсан чинь яалаа. Дараа нь хоёр даргынхаа нүүрийг яаж харах гэсэн юм бэ. Хийнэ, бүтээнэ гэснээ хойш тавиад хэрэлдээд суучихаар хэн бидэнд итгэх билээ. Эсвэл тэр хоёр дарга чинь та гурвыг ингээд хоорондоо хэрэлдээд бай гэж захьсан юм уу. Та нарыг сонгосон, энэ өндөрлөгт гаргасан ард түмний ядуурал хамаагүй юм байж гэж бодъё. Гэтэл хөрш хоёр улсынхаа даргатай эргээд ямар нүүрээр уулзах гээ вэ. Эцсийн дүндээ та нарын хэрүүл тэмцэл ардчиллын үзэл санаа, түүнд итгэж сүүлийн 25 жил зорьж тэмцэж ирсэн сэтгэлийг минь мохоож байгааг та нар ухаарахгүй байна уу.

С.АЛТАНЦЭЦЭГ