УИХ-ын гишүүн Р.Бурмаа хэлсэн үгэндээ хүрсэнгүй. Сонгогчдын боловсролын төвийн тэргүүнээс УИХ-ын гишүүн болсон азтай эмэгтэй. Нийслэлийн Чингэлтэй дүүрэгт нэр дэвшин өрсөлдөөд сонгогдоогүй, 2012 онд АН-ын жагсаалтаар УИХ-ын гишүүн болсон.

Ерөнхийлөгчийн, МоАХ фракцын хүн гэгддэг. Тиймээс “давхар дээл”-тэй сайдыг хамгийн их эсэргүүцдэг, шүүмжилдэг гишүүн байлаа. Ард түмэнд АН доторх шударга  цөөн гишүүний нэг нь хэмээн  тоогдсон цаг  саяхан. АН-аас  хөөгдөхдөө, УИХ-ын гишүүнээсээ эргүүлэн татуулах яриа хүртэл гаргуулж, тэмцэгч нэр олоод байлаа. Гэвч “хуурамч баг”  өмссөн нь илрэв. Н.Алтанхуягйн Засгийн газрыг огцруулахад хувь нэмрээ оруулсан гишүүдийн тоонд багтдаг.   Р.Бурмаа гишүүнийг “Төрийг тогтвортой байлгахын төлөө саналаа өгсөн юм. Парламент гэдэг утга учраа алдаж байна. УИХ-ын гишүүнийхээ товчлуурыг дарж байхдаа хүртэл  дарамтаар саналаа өгдөг. Ерөнхийлөгчийн санал санаачлагыг дэмжиж байгаа.  Эмэгтэй болохоор АН бүлгээрээ дайраад байлаа” гэхэд нь ард түмэн өрөвдсөн. Бас “76 гишүүний 39 нь ирц бүрдүүлдэг. Гэтэл 17 нь сайд  учраас УИХ нь Засгийн газартаа хяналтаа тавих чиг үүрэг нь алдагдаж байна. Засгийн газрын гишүүнийг огцруулах, тайланг хянах гэхээр УИХ-ын гишүүний кнопон дээрээ сайдын эрх ашгаар хандаад байна. УИХ олон талаас нь хэлэлцэж, нухацтай хандаж, шүүмжилж, амьдралд хэрэгжих  цоорхойгүй хууль батлах ёстой. Засгийн газартаа хяналт тавьж, шахаж шаардаж ажилладаг шаардлагатай” гэсэн. Өнөөдөр  хэлсэн ярьснаасаа 100 хувь эсрэг болсон.  Үзэн яддаг байсан “давхар дээл”-ээ өмсчихлөө. МоАХ фракцын тэргүүн Х.Баттулга, “давхар дээл”-ийг өөрийн санаачлагаар тайлж, “дан дээл”-тэй болсон. МоАХ фракцын Ш.Түвдэндорж  зөрүүлээд “давхар дээл” өмссөн. Одоо УИХ-ын гишүүн Р.Бурмаад өвлөгдлөө. Сайдаар томилогдох сургаар байр суурийг нь сонирхоход “УИХ-ын чуулганы нэгдсэн  хуралдаан дээр тодорхой хариулна” гэсэн. Энэ үгнээс нь УИХ-ын гишүүний бүрэн эрхээсээ түдгэлзэж, “дан дээл”-тэй сайд болно гэх хүлээлт гарсан ч талаар өнгөрлөө.

УИХ-ын дарга З.Энхболд “УИХ-ын гишүүнээсээ түдгэлзэх үү” гэж асуухгүй байхыг гишүүдэд лүндэн болгосноор “Р.Бурмаа гишүүн” санаа амар сайдын сэнтийд заларсан түүхтэй. УИХ-ын гишүүн хэлсэн амнаасаа буцдагийг Р.Бурмаа, улстөрийн нам эрх мэдлийн төлөө яаж улаардагийг МАН хоёр л харуулах шив дээ. УИХ-ын гишүүн Р.Бурмаа үнэн дүр төрхөө ард түмэндээ харууллаа.