Эдийн засгийн хямрал нүүрлэж, иргэдийн худалдан авах чадвар буурахаас эхлээд нийгэмд сөрөг үзэгдлүүд чамгүй олон бий.

Энэ хэрээр үнэ нь тэнгэрт хадаж байсан орон сууцны үнэ ч буурсан. Гэсэн хэдий ч метр квадрат нь дундажаар хоёр сая төгрөгийн үнэтэй байгаа орон сууц худалдаж авах иргэд үгүй болсон. Хэдхэн тооны мөнгөтэй нөхдүүд л энд тэнд орон сууц худалдан авч, хөлслүүлж байна. Зорилтот хөтөлбөр хэрэгжүүллээ ч орон сууц жинхэнэ очих ёстой эзэддээ очихгүй байгаа. Харин тэдгээрийн оронд мөнгөтэй нэг нь худалдаж аваад гадаадын иргэдэд хөлсүүлж байгаа юм. Тиймээс өнөөдөр 3-8 орон сууцтай иргэн ч тодроод байгааг эх сурвалж дуулгалаа.

       Хамгийн эмгэнэлтэй нь энэ хямралт байдал, иргэдийн худалдан авах чадвар буурснаар нийслэлд өдрөөс өдөрт олноор босч байгаа орон сууцыг гаднынхан худалдаж авах нь ихэссэн гэнэ. Тэр тусмаа хятадууд маш олон орон сууц авч байгааг ярьсан юм. Өдөр шөнөгүй рекламдаж байгаа “Хурд” групп болон бусад компаниудын барьж гүйцэтгэсэн орон сууцанд өдөртөө л арав хориор тоологдох хятад иргэд орон сууц худалдан авах нь авч, захиалга өгч байгааг ойрын эх сурвалж хэлсэн юм.

        Чамгүй их мөнгөө шавар тоосго болгочихсон “Хурд” тэргүүтэй группууд ч яахав, хятад ч бай япон ч бай хамаагүй баярлаад л борлуулах нь зүйн хэрэг байх. Тэгэж гэмээнэ түгжсэн мөнгөө олж авна. Харин нийслэлийн нүүр царай, утааны эсрэг хөтөлбөрт хамрагдан босч буй орон сууцны хорооллууд нь хятадаар дүүрчихвэл өнөөх зорилго маань юу болох вэ. Хамгийн гол нь энэ 300 гаруй жилийн түүхтэй Монгол Улсын нийслэл маань хятадын нэг хот шиг л болох нь. Энэ нь алсдаа үндэсний аюулгүй байдалд нөлөөлөх хэмжээнд очихыг ч үгүйсгэх аргагүй. Энэ бүгдийг зохицуулах эрх зүйн орчин хэрэгтэй болжээ.

           Хэдийгээр түр оршин суух, иргэншилтэй болох гэх мэт гадаадын иргэдэд зориулсан эрх зүйн орчин бий. Гэтэл ийн олноороо орон сууцны хорооллыг эзэгнэж байгаад анхаарах нь зүйн ёсны хэрэг болов уу. Манай эрх баригчид болохоор орон сууцны тоо өдрөөс өдөрт нэмэгдэж, нийслэлийн өнгө төрх сайжирч байгаа тухай сайхан бурж байна. Гэтэл нийслэлийн гэр хорооллын тоо өдрөөс өдөрт нэмэгдэж өдгөө 180 гаруй мянган өрхтэй болсон. Уг нь саяхан буюу 2010 оны статистик баримтаар нийслэлийн гэр хороололд 130 мянга өрх амьдарч байсан судалгаа бий.

          Энэ тооноос харвал эрх баригчдын маань яриад байгаа нийсэлийн өнгө төрх сайжираад, орон сууцны тоо нэмэгдэх хэрээр гэр хорооллын өрхийн тоо хасагдаж байгаа хэрэг огт биш. Эсрэгээрээ гэр хорооллын өрхийн тоо нэмэгдэж, өнөөх утаа нь улам л өтгөрсөөр. Харин шинээр сүндэрлэж буй үнэтэй орон сууцны хороололд харийнхан буюу хятадууд л тухалж байгааг харж болно. Энэ тал дээр гарцаагүй эрх зүйн орчин хэрэгтэй байгааг анхаарах цаг болжээ.

Н.Дөл