Сүүлийн үед Хүүхэд, гэр бүл хөгжлийн «Өнөр бүл» төвийн шинэ удирдлагуудын талаар таагүй мэдээлэл гарах боллоо. Бид өнгөрсөн долоо хоногт тус төвийн шинэ захирал Б.Бурмаагийн хууль бус үйлдлүүдийн талаар хүргэсэн билээ.

Тэгвэл энэ удаад Хуулийн зөвлөх М.Чинзориг хүүхдийн эрхийг ноцтойгоор зөрчиж байгаа тухай мэдээлэл манай сонинд ирсэнийг хүргэж байна.Тэрхүү мэдээлэлд «Хүүхэд асран хүмүүжүүлэх төв» нь татан буугдаагүй. Зөвхөн нэрээ өөрчлөн Хүүхэд, гэр бүл хөгжлийн «Өнөр бүл» төв болсон. Гэтэл эл төвийн захирлаар
томилогдож ирсэн Б.Бурмаа гэгч эмэгтэй ажлаа авсан даруйдаа шинэчлэлт, өөрчлөлт хийх нэрийдлээр өмнө нь ажиллаж байсан 30 гаруй багш, ажилчдыг хууль бусаар ажлаас нь халсан.

Улмаар ажлаас халагдсан багш, ажилчдын оронд хүүхдийн тухай ямар ч мэдлэггүй, энэ чиглэлийн боловсрол дулимаг хүмүүсийг ажилд авсан. Яг ийм замаар тус төвд ирж ажиллах болсон Хуулийн зөвлөх М.Чинзориг гэгч эр өнчин хүүхдүүд болон багш, ажилчдыг хэл амаар доромжилж, дарамтлах болжээ. Тэрбээр асрах газрын өнчин хүүхдүүдийг «Чамд эзэнгүй хэрэг тохно, хүүхдийн колонд явуулна, амьдралаар чинь тоглоно» гэх зэргээр айлган сүрдүүлж, дарамталдаг гэсэн байв.

Түүний хууль бус үйлдэл дарамт шахалтыг тэсэлгүй хүүхдүүд хэд хэдээрээ асрах газраасаа оргосон тохиолдол гарчээ. Тухайлбал энэ оны дөрөвдүгээр сарын 19-нд тус газарт хүмүүжиж байсан Ч.Цогоо, Мандахбаяр, Ариунболд нарын дөрвөн хүүхэд шөнө дөлөөр оргожээ. Мөн үүнээс гадна сурагч Отгонбаяр оргох гэж байгаад гурван давхраас унаж, гараа хугалсан байна. Гэтэл түүнийг оргох үйлдэл хийснийх нь төлөө шинэ удирдлагууд нь асрах байрнаас нь хөөн явуулсан аж.

Бас нэгэн баримт дурдахад өнгөрсөн хоёрдугаар сард тус төвд хүмүүжиж буй 53 дугаар сургуулийн 11дүгээр ангийн сурагч Д.Ганбат, Д.Алтанжигүүр нарыг Хуулийн зөвлөх М.Чинзориг өрөөндөө дуудан ирүүлж, улмаар дарамталжээ. Баттай эх сурвалжийн мэдээлснээр тэрбээр сурагч Д.Ганбат, Д.Алтанжигүүр нарыг “Энд амьдарч чадахгүй бол хүүхдийн колонд хийчихнэ шүү. Надтай байлдмаар байвал чиний амьдралаар тоглож, эзэнгүй хэрэг тохно” гэж айлгажээ.

Энэ талаар сурагч Д.Ганбат өргөдөлдөө «Манай асрах байранд өмнө нь шоронд ажиллаж байсан М.Чинзориг гэдэг хүн Хуулийн зөвлөхөөр ирсэн. Хоёрдугаар сарын дундуур намайг өрөөндөө дуудаж уулзсан юм. Намайг чи их хүүхэд зодож, юмыг нь дээрэмддэг гэсэн. Тэгээд энд амьдарч чадахгүй бол хүүхдийн колонд хийнэ шүү гэж хэлсэн. Надтай байлдмаар байвал чиний амьдралаар тоглож чадна. Эзэнгүй хэрэг тохно гэж айлгасан. Би хүүхэд асрах төвд 11 жил амьдарч байна. Энэ хугацаанд ингэж доромжлуулж, дарамтлуулж үзээгүй. Тэр өдөр би шүдээ зуугаад л өнгөрсөн» гэж бичжээ.

Мөн сурагч Д. Алтанжигүүр”Миний нэрийг Д.Алтанжигүүр гэдэг. Би хүүхэд асрах газарт 10 жил амьдарч байна. Хоёрдугаар сарын дундуур надтай хуулийн зөвлөх М.Чинзориг гэдэг хүн уулзсан. Намайг хилсээр шоронд явуулна гэж янз бүрийн юм ярьж айлгасан. Өөрөө өмнө нь шоронд ажиллаж байсан гэсэн. Ойрын таван жил хэнтэй ч байлдахад бэлэн, нээлттэй байна гэж байсан. Надтай гоё эр хүн шиг найзалж чадвал би ч гэсэн эр хүн шиг гоё байж чадна гэсэн. Бас та нарын дунд нохой тавьчихсан байгаа гээд байна лээ” гэжээ. Бид эл мэдээллийнхээ мөрөөр тус төвийн Хуулийн зөвлөх М.Чинзоригтой уулзсан юм. Тэрбээр дээрх бүх мэдээллийг үгүйсгэж байв.

Мөн тус газарт өмнө ажиллаж байсан зарим багш, ажилчидтай уулзаж тодруулахад ажлаас халагдсан шалтгаанаа «Дээрээс бидэнд дарамт, шахалт үзүүлсээр байгаад халчихсан. Өмнө нь ажиллаж байсан 30 орчим хүн бүгд аргагүй эрхэнд л гарсан шүү дээ. Зарим нэгийг нь идэж уусан байна гэж хэлээд гаргасан. Нөгөө хэсгийг нь «Та нар хуучин захиралтайгаа адилхан илжирчихсэн байгаа. Тиймээс шинэчлэгдэх болсон» гэж ажлаас халчихсан. Биднийг ажлаас халчихаад нэг хүний оронд гурав, дөрвөн хүн авчихсан. Худалч хүнд одоо¬гийн ажилчид нь өнчин хүүхдүүдээсээ их байгаа. Тэр ч бүү хэл биднийг үндсээр нь устгах ёстой гэсэн шиг 10,11 дүгээр ангийн хүүхдүүдийг бүгдийг нь өөр тийшээгээ явуулчихсан” гэж байлаа.

Түүнчлэн «Асрах газрын хүүхдүүдийг дарамталж байгааг нүдээрээ хараагүй. Гэхдээ хүүхдүүдийн ярьж байгааг сонссон. Тэднийг «Та нар энд аятайхан байж чадахгүй бол явдаг газар болох шоронд чинь явуулна шүү» гэж айлгаж, дарамталдаг гэсэн. Хуулийн зөвлөхөөр ирсэн М.Чинзориг биднийг нэг нэгээр нь дуудаж уулзаад тэр чамайг тэгж хэлж байна, энэ чамайг ингэж ярьж байна. Тэрний тухай юу мэдэх вэ, энэний тухай юу хэлэх үү гэх зэргээр байцааж байсан» гэсэн юм.

Ийнхүү эрх мэдэлдээ бардан дураараа дургиж, дугарсан багш, ажилчин болгоныг ажлаас нь халдаг гэх өнчин хүүхдүүдийн асрах сургуулийн шинэ удирдлагуудын хууль бус үйлдэл хэрээс хэтэрчээ.

Бүр сүүлдээ хууль сахиулах үүрэг бүхий Хуулийн зөвлөх нь хүртэл өөрт «таалагдаагүй» нэгнийг өрөөндөө дуудан ирүүлж дарамталдаг болсон талаар эх сурвалжууд хэлж байна.

Асрах газрын өнчин хүүхдүүд болон багш, ажилчдын амьдралыг орвонгоор нь эргүүлсэн одоогийн удирдлагуудад нэн даруй хариуцлага тооцохгүй бол цаашид гэмт хэрэг гарахгүй гэх баталгаа алга. И.Нарантуяа дарга аа.