Ерөнхий сайд Ч.Сайханбилэг АНЭУ-д айлчлах үеэрээ Оюутолгойн хоёрдугаар шатны хөрөнгө оруулалтын төлөвлөгөөнд гарын үсэг зурсантай холбоотойгоор УИХ-ын гишүүн Г.Уянга, Б.Бат-Эрдэнэ, Ц.Даваасүрэн, Х.Болорчулуун нар Ч.Сайханбилэгтэй хариуцлага тооцож, Засгийн газрыг огцруулахаар санал нэгдсэн тухайгаа мэдээлсэн. Одоогийн байдлаар дээрх гишүүд огцруулах бичигт гарын үсэг зураад байгаа бөгөөд бусад гишүүдээс гарын үсэг цуглуулж байгаа гэсэн. 

УИХ-ын гишүүдийн тоо 19 хүрсэн тохиолдолд саналыг өргөн барьдаг учиртай. Тэгвэл УИХ-ын гишүүн Ж.Батзандан үүнд нэгдэх бололтой. Тодруулбал, тэрбээр өөрийн “Твиттер” хуудаснаа өчигдөр “Дубайн гэрээг АББХ-оор хаалттай хэлэлцлээ. Энэ гэрээ энэ Засгийн газрын хойдхыг нь уншжээ. Харамсаж байна”, “Оройн цагаар улс төр яриад яах вэ дээ. Монголын буян заяа их. Өнөөдрийн алдааг маргааш засч болно. Дээдсийн буяныг зөв л эдлэх нь чухал”, “Харж л байя. Хариуцлагын олон хэлбэр бий” гэх зэргээр жиргэсэн юм. Үүнийг нь харсан хүмүүс түүнийг Ерөнхий сайдыг огцруулахаар гарын үсэг зурсан гишүүдтэй нэгдэх нь хэмээн ярилцаж байгаа юм. Ямартай ч Ж.Батзандан гишүүний хувьд Засгийн газрыг огцруулах саналтай хүмүүсийн нэг бололтой.