МАХН-ын бага чуулганыг яаралтай хуралдуулах талаар Бага чуулганы гишүүдийн гуравны нэгээс илүү (86 хүний) хүний  гарын үсэг бүхий албан шаардлагыг 6 сарын 22-ны өдөр нарийн бичгийн дарга Г.Бямбасүрэн,Гүйцэтгэх товчооны гишүүн Г.Доед нарт гардуулан өгсөн талаар хэвлэлүүд урьд нь мэдээлсэн.

Уг шаардлагыг хэрэгжүүлэх ажлыг шуурхай зохион байгуулахын оронд тус намын  Ерөнхий нарийн бичгийн дарга Г.Шийлэгдамба  нь уг шаардлагыг хүлээн авахгүй хөдөө явах нэрээр зугтаж, саатуулж байсан бол Намын дэд дарга Г.Тэрбишдагва санаачлан өчигдөр Гүйцэтгэх товчоогоо яаралтай хуралдуулсан байна.

Энэ шаардлагыг МАХН-ын Гүйцэтгэх товчооны хурлаар нухацтай хэлэлцсэн бололтой. Тус хурал дээр УИХ дахь бүлгийн  гишүүн Д.Тэрбишдагва,Ч.Улаан, Л.Цог, Гүйцэтгэх товчооны гишүүн У.Доёд,Г.Бямбасүрэн,МАХН-ын оюутны холбооны удирдлагууд шаардлагыг хүлээн авч тулгамдсан асуудлаа хэлэлцэх нь  зүйтэй гэж үзсэн бөгөөд МАХН-ын зарим нарийн бичгийн дарга нар,гүйцэтгэх товчооны олонх гишүүд шаардлага нь намын дүрмийн дагуу байгааг зөвшөөрч дэмжжээ.

 УИХ-ын гишүүн З.Баянсэлэнгэ, намын ерөнхий нарийн бичгийн дарга Г.Шийлэгдамба,нарийн бичгийн дарга Лхагвацэдэн,Залуучуудын холбооны Буяннэмэх, нарын цөөн хүмүүс шаардлагыг шүүмжилж, бага чуулганы гишүүдийг буруутгасан зүйл ярьсан бөгөөд санаачлага гаргаж байгаа бага чуулганы гишүүдийг ад шоо үзсэн, тэднийг хардсан өнгө аяс илэрхийлж, дүрмийн дагуу тавьсан асуудлыг үл ойшоож, намын дүрэм хамаагүй мэтээр ярьж бүдүүлэг, ёс зүйгүй байдал гаргасан  талаар намын хамт олон буруушааж  байгаа гэсэн мэдээлэл ирсэн.

 Гүйцэтгэх товчоо нь энэ асуудлаар шийдвэр гаргахаа түр хойшлуулж, гадаадад байгаа МАХН-ын дарга  Н. Энхбаярт танилцуулна гэсэн бололтой.

Ерөнхий нарийн бичгийн дарга Г.Шийлэгдамба, УИХ-ын гишүүн З.Баянсэлэнгэ, нарийн бичгийн дарга гэх Лхагвацэдэн тэргүүтэй хүмүүс шаардлагын талаар намын даргадаа хов хүргэж,бага чуулганы гишүүд болон удирдлагын зарим хүмүүсээ буруутган ховлох, намд хагарал үүсгэх гэж байгаа хүмүүс гэж матахаар Н.Энхбаяр луу яаралтай явахаар зэхэж байгаа мэдээлэл авлаа.

МАХН-ын дээрх удирдлагууд дүрмээ барьдаг,шударга,ажлаа мэддэг бол дүрмийн дагуу тавьсан шаардлагыг хэлэлцэн шүүмжлэж буруутгахын оронд  Намынхаа бага чуулганыг хуралдуулахбэлтгэлээ базаах,улс орны байдалд улс төрийн дүгнэлт хийх,намынхаа дүрмийн бус үйл ажиллагааг таслан зогсоох зэрэг арга хэмжээ авах ёстой баймаар.Гэтэл эдэнд тийм ёс суртахуун, улс төрийн соёл байхгүй бололтой юм.

Асуудал ийм байдлаар өрнөвөл тус намын эв нэгдэлд хор хөнөөлтэй бөгөөд “Шударга бус нам” хэмээн Ц. Нямдоржийн хэлснийг батлах бөгөөд шаардлага тавьсан бага чуулганы 86 гишүүнийг  дараагийнхаа тэмцэл хийхэд хүргэх нигууртай. МАХН-ын дарга Н.Энхбаяр дээрх буруу бодолтой,бүтэлгүй хүмүүсийнхээ хов,ятгалгад урьдын адил автан  итгэж, шударга шаардлагад тоомжиргүй,хугацаа алдаж хандвал МАХН орших эсэх асуудал ч үүсч болзошгүйг урьдчилан харж, том улс төрчийн буурь зааж үүрэг чиглэл өгөх буйзаа.

Улс төрийн гуравдагч хүчний орон зайг эзлэж байгаа МАХН энэ мэт асуудлаа дотооддоо хурдан шийдвэрлэхгүй бол Тус намын нэрээр  УИХ, Засгийн газарт сууж байгаа эрхэмүүд 2016 оны сонгуульд хар толгойгоороо бие даан оролцох,эсвэл өөр нам хүчинд урвахаас өөр гарц байхгүй гэдэг үнэнтэй  нүүр тулах нь дамжиггүй бөгөөд сонгуульд ялалт байгуулж, сайд, дарга болох мөрөөдөл нь  лөөлөө болно  гэдэгээ эрхбиш ойлгомоор юм.

 Шударга хүмүүсийнхээ шаардлаганд яаж хандсанаас МАХН-ын хувь заяа шийдэгдэх нь тодорхой. Бага чуулган хуралдуулах шаардлагад хэрхэн хандахыг  хүлээх  л үлдлээ.

С.Намар