Муу дээрээ муухай гэгчээр Богд-Арт болж бүтэх юм нэгээхэн ч үгүй мэт. Өглөө бүр тэндээс хэн нэгэн асуудал хэлж үгүй бол аврал эрж албаны, мэддэг чаддаг хүнд нь хэл хүргээч хэмээн утасны цаанаас гуйх… өр өвдөм ийм мэдээг өглөө бүр ажил эхлэхтэй зэрэгцэн сонсох нь Богд-Араар өдөржин өвчлөх тэднээр өвчигнөх гол үндэс болох юм.

Хэдэн хүүхэд мөөгөнцөрт идэгдэж хэд нь эхүүн үнэрт нь эвгүйцэн түүнээ илэрхийлж чадахгүй тарчилж байгаа бол гэж бодохоос гол зурна. Тайван сууж үл чадна. Орцны ч бай захын айлынх нь хаалгыг татаад ороход л хамар сэтлэм, дотор эвгүйрхэм хөгц мөөгөнцөрийн үнэр сэнхийнэ. Оршин суугчид нь энэ үнэрт хэдийнэ дасал болжээ. Гадны хүн бол арав хүрэхгүй минут энэ орчинд байхад л агаар хайж хаалга цонх онгойлгож амь тэмцэнэ. Орон гэртээ ингэж амьдрах эмгэнэл биш гэж үү. Тийм ээ, энэ бол дөрвөн жилийн сонгууль биш. 40, 50 түүнээс ч олон жилийн амьдрал энэ л байрнаас хөвөрнө гэж бодохоор эндхийнхний ирээдүй үнэхээр бүрхэг санагдах нь хэнд ч лавтай Ямар сайндаа л 8а байрны нэгэн оршин суугч өөрийгөө Дагвадорж хэмээн танилцуулж “Танай сонин 7а байрны оршин суугчдын эрхийг л хамгаалаад дуу хоолойг нь хүргээд байх юм. Манайх ч мөн асуудалтай. Албаныханд нь хүргэх үг манай 8а байрныханд багагүй байна. Гэрлийн унтраалганаасаа эхлээд хана, таазны цууралт, ил, далд монтажны асуудлыг сөхөх юм бол хүн итгэмгүй дүр зурагтай өдийг хүртэл амьдарлаа. Богд-Арын 8а байрны оршин суугчдын асуудлыг “Богда Холдинг” болон МХЕГ, ШӨХТГ үгүй бол Монгол Улсын Шадар сайдад хүргэж өгөөч. Энд 300 гаруй айл өрх байдаг ч түүний цаана хэчнээн хөгшид, хүүхдийн эрүүл мэнд, амь нас, аз жаргал яригдаж байгааг бодох хэрэгтэй” хэмээн учирлалаа. Түүний зөв. Дагвадоржийнх энд 2006 онд орж байжээ. Гурван өрөө байраа ам.метрийг нь 375 мянган төгрөгөөр үнэлж авч байсан гэнэ. Гэтэл жил бүр гэртээ тодорхой хэмжээний мөнгөөр засвар хийсээр өдгөө дахин нэг байр авах хэмжээний төсвийг зарлагадсан тухайгаа хэллээ.

Энэ бол дан ганц Дагвадоржийнд тулгарсан асуудал биш бөгөөд 8а байрныхан оршин суугчдын нэлээд хэсэг нь 30-40 сая төгрөгөөр орон гэрээ өөд нь татжээ. Гэвч байдал дээрдсэнгүй гэнэ. Гараашных нь гэрэл үе үе шатчихдагаас болж нүдээ аньсан мэт харанхуйд тэмтчидэг аж. Орцны хаалганы бариул, түгжээ нь хугарчихсанаас шөнө оройдоо түгжигдсэн хаалганы цаана гацах тохиолдол бишгүй гэж байна. Энэ бол Богд-Ар дахь хамгийн наад захын жишээ аж. Байсгээд л ус алдах нь жинхэнэ аюул гэсэн. Ингэхдээ халуун хүйтэн усны хоолой айлуудын тааз, шалаар ямар ч зураг төсөлгүй, стандартын бус тавьсан байдгаас үүдэж ус алдах аюулд айлууд нэрвэгдэх нь өвлийн улиралд бол толгойн өвчин болдгийг тэрбээр дуулгана билээ. Энэ аюул биш гэж үү.

Шадар сайд аа, балаг дагуулсан Богд-Арыг газрын хөрснөөс арчъя. Сууринаасаа эхлээд цуурч, хэдийнэ ганхахад бэлэн болчихсон дүр зургийг харах аймшигтай байна. Худлаа гэвэл очоод хараарай. Энэ хорооллын байрууд сууринаасаа эхлээд цуурч хагарсан хүний гар битгий хэл хөл яваад орчиход торохгүй багтах хэмжээний хагарал үүсчээ. Аюул энэ биш гэж үү. Ниргэснийх нь хойно хашгирав гээч л болох вий дээ. Барилгын салбарт энэ мэт овоолсон шавар тагз барьж өндөр үнээр иргэдэд борлуулчихаад өдгөө юу ч болоогүй юм шиг чив чимээгүй яваад буй олон олон хүмүүст үүрэх хариуцлагийг нь давхар яръя. 300 гаруй иргэдийн амь нас, аюулгүй байдал, эд мөнгө, эрүүл мэндийг уландаа гишгэсэн эрх дархтанууд өдгөө хаана явна вэ.

Идэр ёсийн жавраар хаалга, салхивчнаас нь хүйт үлээж хоол хийх зуурт л хана, тааз нь хөлөрч эргээд хөлдөж мөсөн унжлага үүсдэг байна. Энэ аюул биш гэж үү. Мэргэжлийн хяналт гэх газрын өнөөх өндөр сэнтийд тухлагчдаас аюул гэж чухам юу болохыг асуумаар байна. Хороолол нурж олон арван хүн осолдох нь аюул юм гэж үү. Түй, түй муу ёр байгаа даа. Хатуу сонсогдож байна уу. Бодохоос ч айдаг үнэн гэж ийм л хатуу сонсогдож уншигддаг учир энд хүргээд дуусгая. Юутай ч Богд-Арынхныг төр анхааралдаа авъя.

Үргэлжлэл бий…