Манай улс газар доорх усандаа хяналт шинжилгээ хийх боломжтой болов. БОНХАЖ-ын яам “Газар доорх усны хяналт, шинжилгээ”-ний багажийг нийт есөн аймагт суурилуулж, мэдээллийг боловсруулах баг гарган ажиллаж байна. Хамгийн сүүлд Говьсүмбэр аймгийн Шивээ-Овоогийн нүүрсний уурхайн газарт усны хяналт шинжилгээний 25 дугаар цэгийг суурилуулжээ.

“Газрын доорх усны хяналт-шинжилгээний нэгдсэн сүлжээ” төслийн хүрээнд өнөөдрийн байдлаар Баянхонгор, Өмнөговь, Сүхбаатар зэрэг есөн аймгийн 116 цооногт усны бүрэн болон хагас автомат багаж суурилуулжээ. Ингэснээр газрын доорх усны нөөц, бохирдол, өөрчлөлтийг хэмжихээс гадна усны хэрэглээнд хяналт тавьж, төлөвлөгөө гаргах боломж бүрдэж байгааг БОНХАЖ-ын сайд Н.Батцэрэг онцоллоо.

Газар доорх усны хяналт шинжилгээний төслийг хэрэгжүүлэхэд Дэлхийн банкнаас хөнгөлөлттэй зээл олгожээ. Мөн энэ төсөлд Австралийн Засгийн газраас буцалтгүй тусламж үзүүлсэн байна. Төсөлд нийтдээ 25 сая долларын хөрөнгө оруулалт хийжээ.

Т.Буянаа