МАН-ын дарга Ө.Энх­түвшин  намынхаа   ах­мадуу­­дыг хүлээн авч уул­зах­­даа эхний ээлжинд Ерөн­­хийлөгчийн сонгуульд МАХН-тай эвсэж орохоо ил тод зарлачихлаа.

Хэдийгээр хоёр намын нэгдэх асуудал одоо­гоор нэлээн идэвхтэй яриг­даж байгаа ч энэ нь тийм ч амархан шийдэгдэх асуудал биш. Гэхдээ мэдээж, хоёр на­мынханд хамгийн түрүүнд Ерөнхийлөгчийн сонгууль харагдаж байгаа нь тодорхой.

Ирэх гуравдугаар сарын 25-ныг хүртэл хоёр намын дотор Ерөнхийлөгчийн сонгуульд нэр дэвшигчийг тодруулах марафон явагдах учиртай. Гэхдээ бүр наана нь нэгэн хүч­тэй нэр дэвшигч тодорч ма­гадгүй болоод явчихлаа. Одоогоор МАН-аас Ө.Энх­түвшингээс даргаас гадна экс Ерөнхийлөгч Н.Багабанди, намын экс дарга С.Баяр на­рын нэр дуулдаж байгаа. Гэсэн ч тэдний хувьд олон ний­тэд “очков” алдсан бо­лохоор ялалт байгуулахад эргэлзээтэй.



Одоогоор нэр цэвэр, сонгогч олны дэмжлэгийг хааш нь ч эргүүлж мэдэх Дархан аварга Б.Бат-Эрдэнэ, Монголын улстөрийн “төмөр хүн” болсон Ц.Нямдорж нарын болзошгүй нэр дэвшигчид байж болох ч намынхаа даргын зангаагаар МАХН-тай нэгдэж орвол Ц.Нямдоржоос эхлээд намаа­саа нүүр бууруулж ч мэдэх л юм. Саявтархан л хахир хатуу Ц.Нямдорж “Хэрэв МАХН-тай нэгдвэл би намын харьяаллаасаа татгалзана” хэ­мээн мэдэгдэж байсан билээ.



Мэдээж одоо түүнд Н.Энх­баяртай гар барихаас илүү тарчилгаан байхгүй нь ойл­гомжтой. За энэ ч яах вэ. Хэдийгээр бие нь эзгүй ч Монголын улстөрд хамгийн нөлөөтэй удирдагч хэвээр бай­гаа Н.Энхбаярын хүчирхэг гар тун удалгүй МАН-ыг ч ба­заж эхэлж магадгүй болоод явчихлаа. МАН-ын дарга Ө.Энх­түвшингийн хувьд түүний өмнө буруугаа цайруулахын тулд ямар ч тулгалтыг хүлээж авахад бэлэн байгаа.

 

Энэ нь юу гэсэн үг вэ гэвэл нэгэн үе Монголын тэргүүн хатагтай байсан О.Цолмонгийн нэрийг Ерөнхийлөгчийн сонгуульд шоронд байгаа нөхөр нь дэв­шүүлж УИХ дахь “Шударга ёс” эвслийн МАХН-ын гишүүд уухайлан дэмжсэнээр, одоогийн Ерөнхийлөгч Ц.Элбэгдоржид хамгийн хүчтэй өрсөлдөгч ха­мар дороос нь босоод ирнэ л гэсэн үг юм.



Монголчууд  ядарч зовсон, тусламж хэрэгтэй байгаа хэн нэгэнд хамгийн түрүүнд гараа сунгадаг төрөлхийн  өрөвчхөн  ч юм уу нэг тийм  сонирхолтой чанартай хүмүүс. Монгол Улсын гурав дахь Ерөнхийлөгч, өнөөдрийн хоригдол Н.Энх­баярын эхнэр нэр дэвшээд га­раад ирвэл сонгогчдын талаас илүү хувь нь болсон 40-өөс дээш настнууд хуйлран дэмжих нь гарцаагүй.



Гэхдээ экс тэргүүн хатагтай өрөвдөхөд өр лүү өшиглөж мэ­дэхээр хүн гэдгийг ойр дот­ныхон нь сайн мэднэ. Түүний хувьд баргийн хүнд итгэдэггүй. Тиймдээ ч аливаа ажлыг хийж, гүйцэтгэж буй хүнийг байн­га хардаж сэрдэнэ. Өөрөө ам­жихгүй болохоор бараг л эцэг, хүү, эхнэр, нөхрүүдийг  бие биенийг  мөрдүүлж мэдэх хүн. Өөрөөр хэлбэл, өнөөгийн улстөрчдийн биесээ мэрэх болсон шалтгаан нь түүнийг тэргүүн хатагтай байх үеэс эхэлсэн.

 

Ёстой л бага чулуугаар их чу­­луу доргиож дундаас нь ашиг харж байсан гэх үү дээ. Дунд нь хөөр­хий тэдний гар, хөл болж байсан улстөрчид хагаралдаад бие биедээ хар санасан өстнүүд болоод л хоцорсон. Тиймдээ ч О.Цолмонг нөхрөөсөө ч аюул­тай эмэгтэй гэдэг төдийгүй улстөрчдийн “хар хайрцаг” мэт болсон хүн. Шулуухан хэлэхэд, түүнийг  Ерөнхийлөгчийн сонгуульд нэр дэвшүүлж болохгүй хүн. Яагаад гэвэл, монголчууд бүгдээрээ сө­рөг тагнуулын ажилтан болж хувирна.



Гэхдээ дөрөвхөн сарын да­раа болох Монгол Улсын Ерөн­­хийлөгчийн сонгуульд Нам­барын бэр О.Цолмон хэ­мээх хортой бөгөөд олон хү­ний зүрхэнд айдас, түгшүүр тө­рүүлсэн нэр дэвшигч сарын дараа тодорч болзошгүй байна шүү, Ц.Элбэгдорж Ерөнхийлөгч өө. Тэр үед таны баг ямар ч уран мэхийг уралдуулаад хол тасархай цойлоод гарна гэвэл ёстой л “уучлаарай” болно.