Сүүлийн  хэдэн жилд манай улсад интернэт тоглоомонд донтогсдын тоо маш хурдтайгаар нэмэгдсэн гэдэг. 1998 оноос эхлэн “Sega” буюу видео тоглоом орж ирсэнээр одоогийн "PC" тоглоомын газрын суурь нь тавигдсан. Энэхүү "PC" тоглоомын газар нь тоглох дуртай хүүхдүүдийг донтон, цаашлаад өвчтөн болгож эмнэлэг рүү илгээсээр байгаа билээ. СЭМҮТөвөөс өөр газар одоохондоо интернэт донтолтын эсрэг эмчилгээ, үйлчилгээг үзүүлдэггүй бөгөөд манай улсын хувьд уг өвчний оргил үе нь 2008 он байсан хэмээн эмч, мэргэжилтэнүүд хэлдэг.

Өнгөрсөн жил цахим тоглоомын газар ажиллуулах журмыг батлуулсан. Харин ингэснээр зөвхөн мөнгөний төлөө хүүхдүүдийг хонон өнжүүлэн тоглуулдаг газруудын тоо хумигдсан юм.

Тэгвэл Засгийн газрын ээлжит хуралдаан өчигдөр болсон. Энэхүү хуралдаанаараа зөвхөн Улаанбаатарт интернэт кафе, цахим тоглоомын газар 500 гаруй байдаг бөгөөд энд насанд хүрээгүй хүүхэд, залуучууд ихэвчлэн тоглож,  аллага хүчирхийлэлтэй тоглоомыг хэсэг бүлгээрээ баг болж олон цагаар, хоногоор тоглож, архи тамхи хэрэглэж, садар самуун вэб хуудас үзэх зэрэг сөрөг үр дагавар гарч эцэг эхчүүд, багш нарын сэтгэлийг ихээр зовоох болсон. Энэ байдлыг зохицуулах “Цахим тоглоомын газрын үйл ажиллагааг зохицуулах” журмыг Засгийн газрын өнөөдрийн хуралдаанаас гаргаж, хэрэгжилтэд нь хяналт тавьж ажиллахыг Хууль зүйн сайд Х.Тэмүүжинд даалгалаа.

Энэхүү журам нь цахим тоглоомын газрын үйлчилгээ эрхэлж байгаа болон шинээр эрхлэх иргэд, хуулийн этгээдийн үйл ажиллагаанд тавигдах нөхцөл шаардлагыг тогтоох, бүртгэх, хяналт тавихтай холбоотой харилцааг зохицуулах замаар гэмт хэргээс урьдчилан сэргийлэх, хүүхдийн эрхийг хамгаалахад чиглэгдэж байна.

Журамд зааснаар интернэт кафе, цахим тоглоомын газар нэг дор ажиллахыг болиулж, орон сууцны нэгдүгээр давхар, хонгилд байрлахыг хориглож байгаа юм. Мөн цахим тоглоомын үйлчилгээний газрууд нь ажлын байрны дотор болон гадна орчинд камерийн хяналтын систем суулгаж, 21-ээс дээш хоногийн бичлэгийг хадгалах, зуны улиралд 20, өвлийн улиралд 18 цаг хүртэл үйлчлэх, үйлчилгээний ажилтан нь мэдээлэл технологийн анхан шатны мэдэгдэхүүнтэй, 20-иос дээш насны иргэн байх зэрэг зохицуулалт оруулжээ.

Уг журмаар цахим тоглоомын газруудыг 12 насанд хүрээгүй хүүхдэд үйлчлэх, бичиг баримт, эд зүйлс, барьцаалан үйлчлэх, согтуурсан болон мансуурсан иргэнд үйлчлэх зэргийг нь хориглохоор боллоо.

Х.Даваа