-ОЮУТОЛГОЙН ХАНГАН НИЙЛҮҮЛЭГЧДИЙН МЭДЭЭЛЭЛ НУУЦ БАЙХ ЁСТОЙ ГЭНЭ-

 

Монголоос хүний нөөцөө бүрдүүлж, манай үндэсний бараа бүтээгдэхүүний байнгын хэрэглэгч байхаа зарлаж, эхэндээ чих зөөлөн байсан Оюутолгойнхон хэлсэн ярьсанаасаа буцаж эхэлжээ.Өмнөговийн нутгийн иргэдээс ингэний хоормог авч, ажилчдынхаа хэрэгцээнд нийлүүлнэ гэж байсан ч тэгсхийгээд таг болсон юм билээ.Учир нь гадаад ажилчид нь ингэний хоормогийг таалаагүй учраас үндэсний бренд маань гологдсон гэдэг.Харин оронд нь БНХАУ-аас өргөн хэрэглээний барааг ханган нийлүүлэгчээр татах болсон гэж байгаа.Оюутолгой компани нийт 3000 орчим том, жижиг ханган нийлүүлэгчтэй хамтран ажилладаг байна.Монголын гэхээсээ илүүтэй гадны бараа бүтээгдэхүүн зөөдөг Монгол эзэнтэй компани, нөгөө хэсэг нь гадаадын компаниуд.Монгол эзэнтэй импортын компаниуд ханган нийлүүлэгчийн үүрэг гүйцэтгэж байгааг үндэсний үйлдвэрлэлээ дэмжиж байна гэж манайхан ойлгодог юм шиг байгаа юм.

Энэ талаар мэдээлэл авахыг хүссэн ч “Оюутолгой” компанийнхан татгалцлаа.Ханган нийлүүлэгчдийн талаар мэдээлэл өгөх боломжгүй гэнэ.“Оюутолгой” ХХК-ийн Олон нийт, хэвлэл мэдээлэлтэй харилцах хэлтсийн ажилтан Ч.Бүрэнбаяр тэгэж тайлбарласан.

Нөгөөтэйгүүр, ханган нийлүүлэгчид ч “Оюутолгой” компанийн зөвшөөрөлтэйгөөр ханган нийлүүлэлтийн талаар мэдээлэл өгөх ёстой гэж учирлаж байна билээ.Энэ талаар тус компани албан ёсны ot.mn сайтад тодорхой дурьджээ. Мэдээлэлд “Оюутолгойн ханган нийлүүлэгч нар эсвэл боломжит ханган нийлүүлэгч нар нь тус компаниас урьдчилан бичгээр зөвшөөрөл авалгүйгээр Оюутолгойн нэр болон логог ашиглах, эсвэл олон нийтэд зориулсан мэдээлэл хийх, Оюутолгой ХХК-тай хамтран хийж буй бизнесийн талаар олон нийтэд мэдээллэхийг хориглоно. Олон нийт болон хэвлэл мэдээлэлд зориулан мэдээллэх зөвшөөрөл өгсөн тохиолдолд тухайн мэдээллийг агуулга болон үг хэллэгийг Оюутолгой хянан бичгээр гарган өгнө” гэжээ. Оюутолгойтой хамтран ажиллаж, ханган нийлүүлэгч байсаныхаа төлөө олон нийтэд мэдээлэл өгөх эрхгүй болж байна гэсэн үг биш үү.Өөрсдөө ч ханган нийлүүлэгчдийнхээ талаар мэдээлэл өгөхгүй гэхээр энэ талаар хэнээс, яаж, хэрхэн мэдэх болж байна вэ.Ингэх шалтгаан Оюутолгойд байдаг юм болов уу гэх хардалт төрөх. УИХ-ын гишүүн С.Ганбаатар” Оюутолгой төслөөс бараа бүтээгдэхүүн худалдан авч байгаа компаниуд нь дандаа гадаад болон УИХ-ын гишүүдийн компани байна” гэж мэдэгдсэн нь бий. Оюутолгойнхонд нааштай ханддаг Монголын нөлөө бүхий эрхмүүдийн талд бизнес тэнд явагдаж байгааг баттай эх сурвалжууд мэдээлдэг.Оюутолгойд ханган нийлүүлэгч компаниудаас Монголын газар нутагт бараа, бүтээгдэхүүн үйлдвэрлэдэг үндэсний компани тоотой бий.Байгаа нэг нь эрх ашгийн зөрчилтэй гэгдэх юм билээ.

Тухайлбал, “Оюутолгой” компанитай хөрөнгө оруулалтын гэрээг үзэглэж байсан УИХ-ын гишүүн С.Баярцогт /Сангийн сайд байхдаа/ өөрийн эзэмшлийн “Модерн номадс” сүлжээ хоолны ресторанаа сонгон шалгаруулчихсан. Оюутолгойн орд, Өмнөговийн Цогтцэцийн суманд энэ ресторан салбараа нээсэн нь ч шалтгаантай.Оюутолгойн нэг ажилчны өдрийн хоолыг 30 ам.доллараар бодож “Модерн номадс” компани хариуцан дангаараа нийлүүлдэг гэж байгаа.Энэ тоо бол жил гаруйн өмнөх үнэ.Өнөөдөр энэ үнэ яаж нэмэгдсэнийг мэдэх юм алга.Баялгаа харийнханд хямдхан өгч байгаа Монголд бол ашиггүй наймаа.“Модерн номадс” сүлжээ рестораны нууц эзэн С.Баярцогт эрхмийн хэтэвчийг нь нэмэхээс өөр нигургүй. Өөрөөр бол наалдах ашиг хэнд ч байхгүй. С.Баярцогтын энэ бизнес цаашлаад уул уурхайн том компаниудыг эзлэх зорилготой гэсэн шүү.Оюутолгойд ийнхүү бизнесийн ноёрхлоо тогтоосон тэрбээр Тавантолгойд ч үргэлжүүлэхээр шийдсэн гэнэ.Өмнөговийн Цагаан хадны гааль дээр “Модерн номадс”-ын сүлжээ Катерингийн үйлчилгээ үзүүлэх салбар нээгджээ.Тавантолгойнхон эндээс хоолны цогц үйлчилгээ авна.Оюутолгойд хэрэгжүүлж буй “Өмнөд камп” шиг өндөр үнээр хоолоо шахах нь ойлгомжтой.Ингэхээр С.Баярцогтын шахааны бизнесийн эрэн үе эхэлжээ гэж ойлгож ч болохоор байна.

“Оюутолгой”-д нөлөөгөө тогтоож, ханган нийлүүлэгчээр шалгарч, бизнесийнхээ эрх ашгийг гүйцэлдүүлж яваа эрхэм С.Баярцогтоор дуусаагүй. “Оюу­толгой”-н шатахууны хэрэгцээг “Петровис” дангаараа хангадаг гэж байгаа.Монголын нефтийн магнат компанийг амжилттай толгойлж яваа эмэгтэйчүүдийн нэг бол “Петровис”-ын Ж.Оюунгэрэл.Түүний арын нууц ноёнтон нь Ерөнхий сайд асан С.Баяр гэх.Тэрбээр Засгийн газрын тэргүүнээр ажиллаж байх үедээ Оюутолгойн гэрээг үзэглэсэн.Иймдээ ч “Петровис” компани “Оюутолгой” компанийн ханган нийлүүлэгч болоход ч С.Баяр хувь нэмрээ оруулсан гэдэг.УИХ-ын гишүүн, “АПУ”-гийн Г.Батхүү “Оюутолгой”-д шатахуунаа нийлүүлэх сонирхолтой байсан ч чадаагүй гэх юм билээ.Угтаа бол Оюутолгойд ганц компани шатахуун нийлүүлэх шаардлага ч байхгүй гэнэ.Гэвч энэхүү дархан эрхийг Ж.Оюунгэрэл хатагтай атгачихсан.Томчуудын эрх ашиг ханган нийлүүлэлттэй холбоотойгоор явагддаг жишээ энэ мэт олон.Мэдэгдэж, мэдээлэгдсэн нь ердөө л энэ.Иймээс “Оюутолгой” компани ханган нийлүүлэгчдийнхээ мэдээллийг өгөхөөс татгалцаж, тэднийгээ ч ам нээхгүй байхыг хатуу анхааруулж суугаа болов уу.

 

Т.АМАРТҮВШИН