-  ЭРҮҮЛ МЭНДИЙН САЛБАРЫН ЛУЙВАР ХЭЗЭЭ ДУУСАХ ВЭ -

Эрүүл мэндийн тусламжийг хүн өөрийн биеэр ирж чадахгүй байгаа хүнд өвчтэй,  зайлшгүй тохиолдолд дууддаг.  Иймд тусламж дуудсан өвчтөнг эмнэлэг хүртэл зөөвөрлөх хугацаанд бэртэл гэмтлийг даамжруулахгүйгээр хөдөлгөөнгүй авч явах, шаардлагатай тусламж үзүүлэх, зайлшгүй тохиолдолд мэс засал хийх боломжтой зориулалтын автомашинаар үйлчилдэг байх ёстой. Харин манай улсын хувьд ямар ч хүнд өвчтөн байсан зориулалтын бус, зорчигч тээвэрлэх зориулалттай  Фургонд сууж түүний аяыг дааж, УАЗ 469-д суугаагаараа сууж эмнэлэгт хүргэгдэн ирэх нөхцөл байдалтай байдаг энэ цаашид ч үргэлжлэх нь ...

Манай улсад явж байгаа түргэн тусламжийн машин гэх эдгээр Оросын Цэргийн зориулалттай бүтээгдсэн хатуу явдалтай машинуудад агааржуулалт, амилуулах тусламж "дефибриллятор", амьсгал дэмжих, зүрх, судас хэмжих аппаратууд, гар угаалтуур гээд аль нь ч байхгүй.  Уг машинд өвчтөн аюулгүй зорьчих баталгаа огт байхгүй.

Явдал зөөлөн тохь тухтай зориулалтын унаагаар ард иргэддээ үйлчилмээр байна. МОНГОЛЧУУДАА ХУУЧИН СЭТГЭХҮЙГЭЭС САЛЦГААЯ.  Одоо орос тэрэг унадаг сумын засаг байхгүй. Дарга нар болохоор жийп унадаг ард түмэн болохоор УАЗ аар үйлчлүүлэх ёстой юу тийм хууль баталчихсан юм уу?

Энэ шудрага бус үйлдлээс болж манай улсад газар дээр нь үзүүлж байгаа түргэн тусламжийн 30 хувь нь зөөвөрлөх явцдаа буюу эмнэлэгт ирэхээсээ өмнө нас бардаг тухай УНТЭ-ийн Яаралтай тусламжийн тасаг мэдээлж байна. Мөн 20 хувь нь зөөвөрлөгдөх явцад түргэн тусламж авч чадаагүйгээс гар, хөлөө алдах, нуруу, нугасны гэмтэлтэй, суунги болох зэрэг үр дагаврууд тохиолддог аж. Цөөн үгээр хэлэхэд тээвэрлэгдэж ирэх явцдаа шаардлагатай тусламж, үйлчилгээг авч чадаагүйгүйгээс болж зориулалтын бусаар тээвэрлэгдэн ирсэнээс болоод нас бардаг ажээ. Хэчнээн сайн эмч байгаад ч нэмэргүй.

Одоогийн эрүүл мэндийн үйлчилгээнд явж байгаа автомашины 90 орчим хувь нь Фургон болон УАЗ 469 байна. 2017 оноос хойш Эрүүл мэндийн салбар 20 орчим тэрбум төгрөгөөр 415 ширхэг Фургон болон 69-ийг худалдан авсан. Үүний дийлэнх нь буюу 75 хувь нь 69 байх бөгөөд тус автомашины суудал нь хойшоо налдаггүй учир ямар ч төрлийн өвчин, гэмтэлтэй байсан суугаагаараа ирэхээс өөр сонголтгүй. Фургоны хувьд суудлыг нь авч, зөөврийн ор тавьдаг учир эмнэлгийн стандартын автомашинаас зай багатайн дээр нумтай учир маш хатуу явдалтай. Энэ нь хөдөлгөөн хязгаарлагдсан, зөөвөрлөх боломжгүй оноштой өвчтөнийг эмнэлэгт хүргэх хооронд өвчнийг даамжруулах эрсдэлд хүргэдэг. Мөн бусад төрлийн автомашин нь жилд 20 мянган км туулах чадвартай бол фургон нь 10 мянган км зам туулдаг, 100 км газарт 22 литр бензин зарцуулдаг, мотор нь хоёр жил болоод "цохидог" гээд асуудал ихтэй, урсгал зардал өндөртэй автомашин.

Бусад төрлийн эвдрэл ч хөдөө, хээр замд түгээмэл тохиолддог тухай орон нутгийн түргэний жолоочид хэлж байгаа юм. Ийнхүү эмнэлгийн автомашин гэдэг шаардлагатай үедээ эмнэлгийг орлох чухал үйлчилгээ атал өнөөдөр энэ хэмжээнд үнэлэгдэж байна. 

Яагаад? ямар учраас Фургон, УАЗ 469 маркийн автомашиныг цэргийн байгууллагадаа ч авдаггүй байж Эрүүл мэндийн салбарт аваад байна вэ. Гэтэл Эрүүл мэндийн салбар ялангуяа хөдөө, орон нутгийн тендерийн шалгууртаа Фургон, УАЗ 469 хэмээн заадаг. Автомашины маркийг заагаагүй тохиолдолд хөдөлгүүр, моторын заалт сэлт тавигдах шалгуурыг зөвхөн Фургон, УАЗ 469-д зориулан гаргадаг. Өөрөөр хэлбэл, бусад төрлийн маркийн автомашин өрсөлдөх боломжгүй. ОХУ өөрөө ч энэ загварын автомашинаа Эрүүл мэндийн салбараас 10 гаруй жилийн өмнө халсан байтал манайх худалдан авсаар байна.

Өмнө нь 2015 онд Шадар сайд асан Ц.Оюунбаатарыг салбарын сайдын үүрэг гүйцэтгэгчээр хавсран ажиллаж байх үед өвчтөнг зөөж, тээвэрлэх үеийн тав тух, аюулгүй байдлыг эрхэмлэсэн автомашинаар хот, хөдөөгийн эрүүл мэндийн төвүүдийг хангах зорилгыг Эрүүл мэндийн яам дэвшүүлж, тушаал хүртэл гаргаж байжээ. Үүгээр цаашид түргэн тусламж, эмнэлгийн үйлчилгээнд фургон ашиглахаа болих асуудлыг журамласан байтал өнөөдрийг хүртэл Фургон, УАЗ 469 автомашин авсаар байна вэ ???

Ингээд тендерээр яаралтай түргэн тусламжийн зориулалтын буюу тав тух хангасан, яаралтай эмчилгээ, шуурхайн оношилгоо хийх бололцоотой эмнэлгийн тоноглол бүхий NISSAN, HYANDAI, TOYOTA маркийн машинуудыг худалдан авч байв. Эдгээр автомашин нь тав тухтай,  туулах чадвар өндөртэй, ашиглалтын зардал ч маш бага ажээ. МӨН ЭМНЭЛГИЙН ТҮРГЭН ТУСЛАМЖИЙН ЗОРИУЛАЛТААР ЗАХИАЛАН ҮЙЛДВЭРЛЭХ БОЛОМЖТОЙ.

2016 оны намраас эхэлсэн Эрүүл мэндийн салбарт хуучны Зөвлөлтийн Фургон, УАЗ 469-ийн үе эргэн ирсэн байдаг. Ингэхдээ хөдөө, орон нутагт эмчийн гар цүнхнээс өөр эмнэлэгийн автомашины тоноглолгүйгээр худалдан авсан байдаг.  Түргэн тусламжийн үйлчилгээний  стандарт, өвчтөн тээвэрлэлтийн журам гэж байхгүй хэрэг үү? Түүнийгээ даган мөрдөдгүй тийм үнэ цэнэгүй хүний амь юм уу.

ОХУ-д Фургон, УАЗ 469-ийг үйлдвэрлэдэг "Ульяновский автомобильный завод" хэмээх "ганцхан" үйлдвэр бий. Эндээс Монгол Улсын хэмжээнд эдгээр автомашиныг нийлүүлэх албан ёсны эрхтэй "ганцхан" компани бий. Энэ тохиолдолд тендер зарлачхаад хэн нь хэнтэйгээ өрсөлдөх вэ. Нөгөөтэйгүүр тухайн автомашины урсгал зардлыг төсвийн мөнгөөр хийх учир мөн л тендерээр явагддаг. Энэхүү тендерийг хэн авах бас л тодорхой. Өөрөөр хэлбэл, салбар нь өөрөө тендерийн шалгуур, өрсөлдөгчид гээд нэг хүний, нэг компанид зориулсан бодлого явуулж байгаа нь төрд шургалсан луйвар гэдгийг харуулж байна.

Фургон, УАЗ 469 авахаар төлөвлөгдсөн. Учир нь сайд, дарга нар эмнэлгийн тусламж авахдаа Фургон эсвэл УАЗ 469-өөр явахгүй. Тэд зовлонг нь мэдэхгүй. Үүний горийг ард түмэн л амсдаг. Иргэддээ хатуурхсан энэ үйлдэлд эмнэлгийн байгууллагууд нь ч "Өгч байгаа нь их юм" хэмээн дасан зохицон хүлээн авдаг. Гэтэл дэлхийн хамгийн ядуу улсууд ч эрүүл мэндийн салбараа эмнэлгийн тусгай зориулалтын бүрэн тоноглогдсон автомашинаар хангадаг.
Ямартай ч хурдан муудаж, "ээлж хийдэг" уг машинуудыг авсаар байгаа энэ тохиолдолд эрүүл мэндийн салбарт автомашины дутагдал чөтгөрийн тойрог мэт мөнхөд үргэлжилнэ. Хэсэг бүлэг хүмүүс ч мөнгөөр тасрахгүй байх нь. Ядаж хэдүүлээ дэлхийн хамгийн ядуу улс Зимбабийн хэмжээнд эмнэлэгийн тусламж авчих юмсан даа.

Эрүүл мэндийн үйлчилгээнд явж байгаа автомашины 90 орчим хувь нь Фургон болон УАЗ 469 байна.

Дэлхийн хамгийн ядуу улс орны эмнэлгийн автомашин


Зимбаби Улс (Ядуурлаараа 195-р байр)

 

Эх сурвалж: www.seen.mn